Mālohi Fakafolofolá
Ne liliu e moʻuí ʻa ha ongo tamaiki Tahiti ʻi heʻena ʻoange ha faingāmalie ki he folofolá.
Naʻe ʻikai ke fie ako folofola ʻa Luma. Naʻe ʻikai fie ʻalu ʻa Vaisiale ki he seminelí. Pea naʻe ʻikai fie maʻu ia ke na fai ʻeni. Ka naʻe liliu ʻena moʻuí ʻi he taimi naʻá na fili ai ke fai iá.
Ko e hā nai hono ʻuhingá?
Ko e hā ka fili ai ha taha taʻu hongofulu tupu ke fakamoleki ha houa ʻe ua ʻi he pō Tuʻapulelulu kotoa pē ke ako e folofolá mo ʻene faʻeé? Mahalo naʻe mei fifili tatau pē mo Luma Teluatea ʻo Tahití ʻi he taʻu ʻe taha kuo hilí.
Mahalo te ne fehuʻi he taimí ni pe ko e hā nai ka fili ai ha talavou ke ʻoua te ne fai ʻeni.
Lolotonga e taʻu ʻe tolu naʻe ʻi he seminelí ai ʻa Lumá, naʻe ʻikai pē tokanga ia ʻi hono vahe ange ʻe heʻene kau faiakó ʻa e folofola ke lau ki he lēsoni hokó. ʻOkú ne pehē ʻe ia, “Naʻe ʻikai ke u fie lau kinautolu. Naʻe ʻikai ke u saiʻia au he folofolá.”
Ka naʻá ne fifili pe ko e hā koā naʻe fakaʻaongaʻi maʻu ai pē ʻe he kau taki ʻo e Siasí ʻi hono uōtí mo e siteikí ʻa e folofolá ʻi heʻenau ngaahi leá mo e ngaahi lēsoní. Naʻá ne siofi ʻene kau takí. Naʻá ne fakatokangaʻi ʻa e faingofua ke lau ʻene palesiteni fakasiteikí mei he folofolá. scriptures.
ʻI he taimi ko ia ne vahevahe ai ʻe he Siteiki Faʻa Tahití e fānau ako seminelí ki ha ngaahi timi pea fai ʻenau feʻauhi kumi folofola ʻi he taʻu fakaʻosi ʻo Luma he seminelí, naʻá ne pehē ke ʻoange ha faingamālie ʻo e folofolá.
Ko e taimi ia ne kamata ai ʻena ako folofola fakauike mo ʻene faʻeé. Naʻá na ako fakataha ʻi he pō Tuʻapulelulu kotoa pē ki he feʻauhi fakakalasí he ʻaho hono hokó, ʻo ako e tuʻuʻanga ʻo e ngaahi veesi mahuʻingá pea aʻu ki hono ako maʻuloto e ngaahi veesi folofola lahi.
Pea ko e taimi ia naʻe kamata ke hoko ai ha ngaahi liliu maʻa Lumá. Naʻe fakamālohia ʻe heʻene ako folofolá ʻene vā fetuʻutaki mo ʻene faʻeé. Naʻe kamata ke ne sio ki he tatau ʻo e ngaahi meʻa naʻe akoʻi ʻe he folofolá mo ia ʻoku lolotonga hoko ʻi māmani he ʻaho ní. ʻI heʻene lotua e meʻa naʻá ne laú, naʻá ne ʻiloʻi naʻe ʻo e ʻOtuá ia.
Naʻe tokoni foki ia ki heʻene tataki ʻene timí ke nau ikuna ʻi he feʻauhi kumi folofola fakasiteikí.
Naʻe fakatokangaʻi ʻe Luma ʻi he ngaahi tāpuaki naʻá ne maʻú ha lēsoni naʻá ne ako ʻi heʻene ako folofolá. ʻOkú ne pehē, “Naʻe akonaki ʻa e Tuʻi ko Penisimaní ʻi he Mōsaia 2:24 ʻo pehē, ʻi he taimi ʻoku tau fili ai ke fai ʻa e meʻa ʻoku kole mai ʻe he ʻEikí, ʻoku tāpuakiʻi kitautolu ʻi he taimi pē ko iá.” Ko e taha ʻo e ngaahi tāpuaki maʻongoʻonga taha naʻá ne maʻú ko e “hili ʻeku ako ʻa e folofolá he taʻu ní, ʻoku ou ʻilo ai ʻoku moʻoni e Tohi ʻa Molomoná.”
ʻOua Te Ke Talamai e Meʻa ke u Faí
ʻI he kamataʻanga ʻo e taʻu fakaakó, naʻe teʻeki ai ke kau ʻa Vaisiale Pito ia ki he Siasí. Naʻe anga fēfē leva hono tokoniʻi ʻe ha mēmipa foʻou kuo teʻeki ai ke ne ʻalu kimuʻa ki he seminelí ʻa ʻene timí ke nau ikuna ʻa e feʻauhi kumi folofola ʻa e siteiki Faʻá?
ʻOkú ne pehē, “Naʻe ʻikai ke u hohaʻa au ki he siʻisiʻi ʻeku taukeí. Ne u ako e konga lahi ʻo e ngaahi veesi ko iá lolotonga hono fai e ngaahi lēsoni ʻa e kau faifekaú.”
Ne kau e tokolahi ʻo e fāmili ʻo Vaisialé ki he Siasí hili e mālōlō fakafokifā ʻa ʻene tamaí pea ʻomai ʻe he taki ngāue fakafaifekau fakauōtí e ongo faifekaú ki he ʻapi ʻo Vaisialé. Naʻa nau talanoa ki he uouangataha ʻa e fāmilí mo ʻenau fakataha ʻo taʻengatá. ʻOkú ne pehē, “Naʻá ne ʻomi moʻoni ha liliu ki homau fāmilí.”
Neongo ia, naʻe ʻikai ke ne liliu e fie tauʻatāina ʻa e taʻu 17 ko ʻení. “Hili hono papitaiso aú, naʻe talamai ʻe he tokotaha kotoa pē ʻoku totonu ke u ʻalu ki he seminelí. ʻOku ʻikai ke u saiʻia ke talamai ʻe ha taha e meʻa ke u faí, ko ia naʻe fuoloa peá u toki ʻalu.”
Naʻe faifai peá ne toki fakakaukau ʻiate ia pē ke ʻalu pea naʻá ne fiefia ai. Naʻe vahe ia ke kau ki he timi kumi folofola tatau pē mo Luma.
ʻI he kamataʻangá naʻe ʻikai feinga ia ke lau e ngaahi potufolofola ne vahe ange ke laú. Ka ʻi heʻene fakakaukau pē ke ne laú, naʻe vave ʻene fakatokangaʻi e ngaahi tāpuakí.
ʻOkú ne pehē, “Naʻe hoko e folofolá ko ha tokoni lahi. Kuó u ako ha ngaahi meʻa lahi mei he folofolá,” kau ai ʻa e mahuʻinga ʻo e lotú pea ʻe tali ʻe he Tamai Hēvaní e ngaahi lotu ko iá.
Naʻá ne ʻiloʻi foki ko e taimi ʻokú ne tukupā ai ke fai ha faʻahinga meʻa, hangē ko e ʻalu ki he seminelí pe lau e folofolá, ʻoku faingofua ange ʻene tauhi ki heʻene tukupaá ʻi haʻane fai pē koeʻuhí ʻoku totonu ke fai pe ʻoku “fie maʻu” ke ne fai ia.
Kuo ʻosi e taʻu fakaakó, pea ʻoku fakamālō ʻa Vaisiale heʻene fili ke ʻalu ki he seminelí ʻo ako e folofolá: “ ʻOku ou ʻilo ʻoku faitāpuekina kitautolu ʻi he taimi ʻoku tau lau ai e folofolá.”
ʻI he taimi naʻe ʻalu ai ʻa Luma Teluatea (ʻi laló) mo hono kaungā-kalasi seminelí ki Mōlea (toʻohemá) ke siviʻi ʻenau ʻilo folofolá, naʻe ʻikai mahuʻinga e olá ia—kuo ʻosi ikuna pē ʻa Luma ia.
ʻI he fakapapauʻi pē ʻe Vaisiale Pito ʻo Tahití ke ne ako e folofolá, naʻe kamata leva ke ne sio ki he ngaahi tāpuakí.
Ngaahi taá naʻe fai ʻe Adam C. Olson, tuku kehe ʻo ka toki fakahā atu; ʻi ʻolungá: faitā ʻa e © iStock; laʻitā ʻo e matalaʻi ʻakaú naʻe fai ʻe he © iStock