2011
Ko e Taumuʻa ʻo e Fineʻofá
ʻEpeleli 2011

Pōpoaki ʻa e Faiako ʻAʻahí

Ko e Taumuʻa ʻo e Fineʻofá

Ako ʻi he faʻa lotu ʻa e fakamatala ko ʻení, pea aleaʻi ia mo e kau fafine ʻokú ke ʻaʻahi ki aí ʻo ka feʻunga ke fakahoko. Fakaʻaongaʻi e ngaahi fehuʻí ke tokoni atu ki hono fakamālohia e kau fafiné pea ʻai ke hoko ʻa e Fineʻofá ko ha konga longomoʻui ʻo hoʻo moʻuí.

Tuí • Fāmilí • Fakafiemālié

ʻI hono fuofua uiuiʻi ʻetau kau palesitenisií, ne ʻomai kiate kitautolu ha ngaahi maʻuʻanga tokoni fekauʻaki mo e hisitōlia ʻo e Fineʻofá. Naʻa tau ako ia ʻi he faʻa lotu, he naʻa tau fie ʻilo ki he taumuʻa ʻo e Fineʻofá mo e meʻa ʻoku finangalo e ʻEikí ke tau fakahokó. Ne tau ʻilo ai ko e taumuʻa ʻo e Fineʻofá ʻo hangē ko hono fokotuʻu ʻe he Eikí, ke fokotuʻutuʻu, akoʻi, pea ueʻi fakalaumālie e loto ʻo Hono ngaahi ʻofefiné ke teuteuʻi kinautolu ki he ngaahi tāpuaki ʻo e moʻui taʻengatá.

Ke fakahoko e taumuʻa ko ʻeni ʻo e Fineʻofá, kuo tuʻutuʻuni ʻe he ʻEikí ʻa e fefine takitaha mo e houalotú fakalūkufua ke:

  1. Fakatupulaki ʻenau tuí mo e anga-māʻoniʻoni fakatāutahá.

  2. Fakamālohia ʻa e fāmilí mo e ʻapí.

  3. Fai ha tokoni ʻaki e tauhi ki he ʻEiki mo ʻEne fānaú.

ʻE toki lava pē ke tau fakahoko e ngāué ni ʻi he founga ʻa e ʻEikí ʻi he taimi ʻoku tau fekumi ai ʻo maʻu, pea ngāue ʻo fakatatau mo e fakahā fakatāutahá. He ʻikai ke tau lavaʻi ʻeni taʻekau ai ʻa e fakahā fakatāutahá. He ʻikai ke tau taʻelavaʻi ʻeni kapau te tau tokanga ki he fakahā fakatāutahá. ʻOku fakahinohino kitautolu ʻe he palōfita ko Nīfaí ʻe fakahā mai ʻe he Laumālie Māʻoniʻoní “ ʻa e meʻa kotoa pē ʻoku totonu ke [tau] faí” (2 Nīfai 32:5). Kuo pau ke tau nonga feʻunga mo fakalongolongo feʻunga ka tau malava ke fanongo ki he leʻo ʻo e Laumālié

ʻE ngaahi tokoua, ʻoku ʻi ai hotau fatongia mahuʻinga ʻi he tokoni ke langa hake ʻa e puleʻanga ʻo e ʻOtuá mo teuteu ki he hāʻele mai ʻa e ʻEikí. Ko hono moʻoní, he ʻikai lava ke fakahoko e ngāue ʻa e ʻEikí taʻekau ai e tokoni ʻa Hono ngaahi ʻofefiné. Ko ia ai, ʻoku ʻamanaki mai ʻa e ʻEikí ke toe fakalahi ange ʻetau foakí. ʻOkú Ne ʻamanaki mai ke tau fakahoko e taumuʻa ʻo e Fineʻofa ʻo hangē ko ia ne teʻeki fai ki muʻá.

Julie B. Beck, palesiteni lahi ʻo e Fineʻofá.

Mei he Ngaahi Folofolá

Teutalōnome 6:5–7; Luke 10:30–37; Sēmisi 1:27; 2 Nīfai 25:26; Mōsaia 3:12–13

Mei Hotau Hisitōliá

ʻI ha fakataha ʻa e Fineʻofá ʻi he 9 ʻo Sune 1842, ne akoʻi ai ʻe he Palōfita ko Siosefa Sāmitá ki he kau fafiné ko ʻenau kautahá naʻe ʻikai “ki hono tokoniʻi pē ʻo e masivá, ka ke fakahaofi ʻa e ngaahi laumālié.”1 Naʻe hoko e leá ni ko ha taumuʻa fakalaumālie mo fakatuʻasino kuó ne fakafōtunga e Fineʻofá ʻi he kotoa ʻo hono hisitōliá. Ne akonaki ʻa Palesiteni Siosefa F. Sāmita (1838–1918) ʻi he 1906 ʻo pehē: “ ʻOku ʻikai ngata pē ʻene fekauʻaki [ʻa e Fineʻofá] mo e ngaahi fie maʻu ʻa e masivá, kau mahakí mo e paeá, ka ko ha konga ʻo hono fatongiá—pea ko e konga lahi tahá ia—ke tokangaʻi ʻa e tuʻunga fakalaumālie mo e fakamoʻui ʻo e ngaahi faʻē mo e ngaahi ʻofefine ʻo Saioné; ke fakapapauʻi ʻoku ʻikai liʻekina ha taha, ka ʻoku maluʻi kotoa mei he faingataʻaʻiá, ngaahi mamahí, mālohi ʻo e fakapoʻulí, pea mo e kovi ʻoku tuʻu fakatuʻutāmaki kia kinautolu ʻi māmaní.”2 ʻI he 2001, ne toe lea ai ʻa ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē, “Ko e fefine kotoa pē ʻi he Siasí ni kuó ne fai ha fuakava mo e ʻEikí, ʻoku ʻi ai haʻane ngāue fakalangi ke tokoni ʻi hono fakahaofi ʻo e ngaahi laumālié, ke taki ʻa e houʻeiki fafine ʻo e māmaní, ke fakamālohia ʻa e ngaahi ʻapi ʻo Saioné, pea mo langa ʻa e puleʻanga ʻo e ʻOtuá.”3

Maʻuʻanga Fakamatalá

  1. Joseph Smith, History of the Church, 5:25.

  2. Ngaahi Akonaki ʻa e Kau Palesiteni ʻo e Siasí: Siosefa F. Sāmita (1998), 216.

  3. M. Russell Ballard, “Kau Fefine ʻo e Angatonú,” Liahona, Tīsema 2002, 39.

Tā fakatātaaʻi ʻo e ʻatá ʻe Christina Smith