ʻOtu Lea ki he ʻOtu Lea
Tokāteline mo e Ngaahi Fuakava 76:22–24
ʻOku fakahā ʻe he ngaahi vēsí ni ha fakamoʻoni fakaeonopooni kia Sīsū Kalaisi: ʻOkú Ne moʻui!
22 Pea ko ʻeni, hili ʻa e ngaahi fakamoʻoni lahi kuo fai ʻo kau kiate iá, ko e fakamoʻoni fakamuimui tahá ʻeni, ʻa ia ʻokú ma fai ʻo kau kiate iá; ʻOkú ne moʻui!
23 He naʻá ma mamata kiate ia, ʻio ʻi he toʻukupu toʻomataʻu ʻo e ʻOtuá; peá ma fanongo ki he leʻo ʻoku fakamoʻoniʻi ko ia ʻa e ʻAlo pē Taha naʻe Fakatupu ʻo e Tamaí—
24 Pea ʻoku fakatupu pea naʻe fakatupu ʻe ia, pea ʻiate ia, pea meiate ia, ʻa e ngaahi māmá, pea ko hono kakai ʻo iá ko e ngaahi foha mo e ngaahi ʻofefine kuo fakatupu ki he ʻOtuá” (T&F 76:22–24).
Ngaahi Fakamoʻoni Lahi
Kuo fai ha ngaahi fakamoʻoni lahi ʻo kau ki he Kalaisi toetuʻú kimuʻa ʻi he fakahā ko ʻení. Ko ha ngaahi sīpinga ʻeni:
-
Mele Makitaline (vakai, Sione 20:11–18)
-
Ko e Kau ʻAposetolo ʻi he kuonga ʻo Sīsuú (vakai, Mātiu 28:9–20; Maʻake 16:14–20; Luke 24:36–53; Sione 20:19–29; 21)
-
Ko e ongo ākonga ʻi he hala ki ʻEmeasí (vakai, Luke 24:13–35)
-
Sitīveni (vakai, Ngāue 7:55–56)
-
Paula (vakai, Ngāue 9:1–6)
-
Ko e kau Nīfaí (vakai, 3 Nīfai 11–28)
-
Molonai (vakai, ʻEta 12:39)
-
Siosefa Sāmita (vakai, Siosefa Sāmita—Hisitōlia 1:16–20)
ʻOkú Ne Moʻui!
“Kuó u lau—pea ʻoku ou tui—ki he ngaahi fakamoʻoni ʻa kinautolu kuo nau aʻusia e mamahi ʻo hono Tutuki ʻo Kalaisí pea mo e fiefia ʻo ʻEne Toetuʻú. Kuó u lau—pea ʻoku ou tui—ki he ngaahi fakamoʻoni ʻa kinautolu ʻi he Maama Foʻoú, ne ʻaʻahi ki ai e ʻEiki toetuʻu tatau pē.
“ ʻOku ou tui ki he fakamoʻoni ʻa e tokotaha ʻi he kuonga fakakosipeli ko ʻení, naʻe fefolofolai mo e Tamaí mo e ʻAló ʻi he vaoʻakau toputapú, ʻa ia naʻe foaki ʻEne moʻuí ke silaʻi ʻa e fakamoʻoni ko ia ʻaki hono totó.”
Palesiteni Thomas S. Monson, “Kuó Ne Toe Tuʻu!” Liahona, Mē 2010, 89.
ʻOku Fakatupu pea Naʻe Fakatupu ha Ngaahi Maama
“Naʻe ngaohi ʻe Kalaisi ko e ʻEiki ʻo e ʻunivēsí ha ngaahi māmani taʻefaʻalaua, ʻo fakatatau mo e fakahinohino ʻa e Tamaí—ʻa ia ko hotau māmaní ko e taha ia ʻo kinautolu (vakai, ʻEfesō 3:9; Hepelū 1:2).
“Ko e foʻi māmani ʻe fiha he ʻunivēsí ʻoku ʻi ai ha kakai? ʻOku ʻikai ke tau ʻilo, ka ʻoku ʻikai foki ko kitautolu pē ʻoku ʻi he ʻunivēsí! Ko e ʻOtuá ʻoku ʻikai ko ha ʻOtua pē ia ʻo ha palanite pē ʻe taha!”
ʻEletā Neal A. Maxwell (1926–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻi he “Kau Fakamoʻoni Makehe ʻo Kalaisí,” Liahona, ʻEpeleli 2001, 5.
Ngaahi Foha mo e Ngaahi ʻOfefine Kuo Fakatupu ʻo e ʻOtuá
“ ʻOku ʻikai ko ha taha noa pē koe, siʻoku ngaahi kaumeʻa ʻofeina ʻi māmani kotoa. ʻOku mou nāunauʻia mo taʻengata. …
Ko ʻeku fakaʻānauá mo e tāpuaki ko e taimi te ke vakai ai ki ho ʻatá, te ke lava ʻo sio ʻo mavahe atu mei he ngaahi tōnounoú mo e veiveiuá ka ke fakatokangaʻi pe ko hai moʻoni koe: ko ha foha mo ha ʻofefine nāunauʻia ʻo e ʻOtua Māfimafí.”
Palesiteni Dieter F. Uchtdorf, Tokoni Ua ʻi he Kau Palesitenisī ʻUluakí, “Ko e ʻAta ʻi he Vaí” (faeasaiti ʻa e Potungāue Ako ʻa e Siasí maʻá e kakai lalahi kei talavoú, 1 ʻo Nōvema 2009); ʻe ala maʻu ʻi he CESfiresides.lds.org.
Konga naʻe toʻo mei he Kuó Ne Toe Tuʻu, tā ʻe Del Parson