O Le Agaga o Faaaliga
E moni le agaga o faaaliga—ma e mafai ma e galue i o tatou ola taitoatasi faapea foi i Le Ekalesia.
E momoli atu le agaga faafetai mo le musumusuga na i ai i le filifiliga o le viiga o le a sosoo ai ma la’u tautalaga, “Ua Ou Faia Ea Se Lelei i le Aso?” (Viiga, nu. 136). Ua ou maua le faaataataga.
Ou te valaaulia outou e mafaufau i ni aafiaga se lua na tatou oo uma i ai pe na oo foi i ai le toatele o i tatou i le malamalama.
O le aafiaga muamua lava pe a tatou ulu atu i se potu pogisa ma ki le moli. Manatua le faatumuina o le potu i se malamalama i le taimi lava lea ma mou atu ai le pogisa. O mea sa le’i vaaia muamua a ua manino ma iloa atu. O lea aafiaga na iloga mai e ala i le vaaia vave o le malamalama ma lona malosi.
O le aafiaga lona lua e tupu pe a tatou matauina le po a o liua e avea ma taeao. Pe tou te manatua le faifai malie ma toetoe ina a leiloa atu le faateleina o le malamalama i le tafailagi? Pe a faatusatusa i le kiina o se moli i totonu o se potu pogisa, o le malamalama mai le oso a’e o le la sa le’i oso faafuasei mai. Ae na faasolosolo malie lava ma le mautinoa le malosi ma le faateleina o le malamalama, ma suia ai le pogisa o le po i le matagofie o le taeao. Mulimuli ane, ona amata oso mai ai lea o le la i le tafailagi. Peitai o le molimau vaaia o le faaolioli taunuu mai o le la, e tele itula sa iloa lelei ai a o le’i alia’e tonu mai le la i le tafailagi. O lenei aafiaga na iloga mai e ala i le iloatino faifai malie ma le tau lē iloa o le malamalama.
Mai nei aafiaga masani e lua i le malamalama, e mafai ai ona tatou aoaoina ni mea se tele e uiga i le agaga o faaaliga. Ou te tatalo o le a musuia ma aoaoina i tatou e le Agaga Paia a o tatou taulai atu nei i le agaga o faaaliga ma mamanu faavae e maua ai faaaliga.
O Le Agaga o Faaaliga
O faaaliga o se fesootaiga mai le Atua i Ana fanau i le lalolagi, ma o se tasi o faamanuiaga sili e vaavaalua ma le meaalofa ma le mafutaga faifai pea ma le Agaga Paia. Sa aoao mai e le Perofeta o Iosefa Samita, “O le Agaga Paia o se fai faaaliga,” ma “e leai se tagata e mafai ona maua le Agaga Paia e aunoa ma le maua o faaaliga” (Aoaoga a Peresitene o le Ekalesia: Iosefa Samita [2007], 140).
E avanoa le agaga o faaaliga mo tagata uma o ē mauaina e ala i le pule e tatau ai o le perisitua ia sauniga faaola o le papatisoga, i le faatofuina mo le faamagaloina o agasala ma le faaee atu o lima mo le meaalofa o le Agaga Paia—ma o lē foi o loo galue i le faatuatua e faataunuu le poloaiga faaleperisitua ia “talia le Agaga Paia.” O lenei faamanuiaga e le o faatapulaaina i taitai pulefaamalumalu o le Ekalesia; ae, e tatau ona i ai i olaga o alii, tamaitai, ma tamaiti uma o ē ausia le tausaga e tatau ai ma ulu atu ai i feagaiga paia. O le naunautai faamaoni ma le agavaa e valaaulia ai le agaga o faaaliga i o tatou olaga.
Na maua e Iosefa Samita ma Oliva Kaotui se aafiaga aoga tele i le agaga o faaaliga a o la faaliliuina le Tusi a Mamona. Sa aoaoina e nei uso e mafai ona la maua soo se malamalama e tatau ai e faamae’a ai la la’ua galuega, pe afai la te ole atu i le faatuatua, ma se loto faamaoni, ma le talitonu o le a la mauaina. Mulimuli ane, sa faateleina lo la’ua malamalama e masani ona galue le agaga o faaaliga pe a oo mai mafaufauga ma lagona i o tatou mafaufau ma loto e ala i le mana o le Agaga Paia. (Tagai MFF 8:1–2; 100:5–8.) Na faatonuina i la’ua e le Alii, “O lenei, faauta, o le agaga lenei o faaaliga; faauta o le agaga lenei na aumaia ai e Mose le fanauga a Isaraelu mai totonu o le Sami Ulaula i le laueleele matutu. O lea, a lau mea foai fua lenei: faalagolago i ai” (MFF 8:3–4).
Ou te faamamafa atu le fuaitau “faalagolago i ai” e tusa ai ma le agaga o faaaliga. I tusitusiga paia, o loo tele ina faamatala mai le uunaiga a le Agaga Paia o se “leo itiiti ma le filemu” (1 Tupu 19:12; 1 Nifae 17:45; tagai foi 3 Nifae 11:3) ma se “leo itiiti ma le malie lava” (Helamana 5:30). Talu ai e musumusu lemu mai lava ma le lē gaoiā le Agaga, e faigofie ona malamalama i le mafuaaga e tatau ai ona tatou faatafaese mai faasalalauga e le talafeagai, ponokalafi, ma amioga ma mea faataumaoi ua fai ma vaisu. O nei meafaigaluega a le Tiapolo e mafai ona faaitiitia ai ma iu ai lava ina faataumaoia lo tatou mana e iloa ai ma tali atu i feau maaleale mai le Atua, ia e auina mai e ala i le mana o le Agaga Paia. E tatau ia i tatou ona mafaufau toto’a ma manatunatu loloto ma le agaga tatalo pe mafai faapefea ona tatou teena faatosinaga a le tiapolo ma “faalagolago i ai” ma le amiotonu, le agaga o faaaliga i o tatou olaga patino ma aiga.
Mamanu o Faaaliga
E tauave mai faaaliga i ni auala eseese, e aofia ai mo se faataitaiga, miti, vaaiga, talanoaga ma avefeau faalelagi, ma musumusuga. O nisi faaaliga e maua vave ma e malolosi; o nisi e faifai malie mai ma e tau le iloa. O aafiaga e lua i le malamalama lea sa ou faamatalaina, e fesoasoani tatou te malamalama atili ai i mamanu faavae e lua o faaaliga.
O se malamalama e ki i se potu pogisa, e faapei o le mauaina vave, i le taimi e tasi o se feau atoa mai le Atua. E toatele i tatou ua silafia lenei mamanu o faaaliga a o tuuina mai ia i tatou ia tali i tatalo ma le loto faamaoni, po o le tuuina mai foi o faatonuga ma le puipuiga tatou te manaomia, e tusa ai ma le finagalo ma le taimi a le Atua. O faamatalaga o faaaliga e vave ona maua ma malolosi o loo maua i tusitusiga paia, o loo toe faamatalaina i le talafaasolopito o le Ekalesia, ma molimauina i o tatou lava olaga. E moni, e tutupu nei vavega ofoofogia. Peitai, o lenei mamanu o faaaliga e foliga mai e tau le maua ma e le taatele.
O le faateleina faifai malie o le susulu o le malamalama mai le oso a’e o le la, e pei lava o le mauaina o se feau mai le Atua i lea “upu ma le upu, o le fuaiupu ma le fuaiupu” (2 Nifae 28:30). O le tele lava o taimi, e oo mai faaaliga i nai faaopoopoga laiti mo sina taimi, ma e tuuina mai e tusa ai ma o tatou manaoga, agavaa, ma tapenapenaga. O na fesootaiga mai le Tama Faalelagi e faasolosolo malie mai ma le le gaoiā ma “toto ifo [i o tatou agaga] e pei o le sau mai le lagi” (MFF 121:45). O lenei mamanu o faaaliga e foliga mai e taatele nai lo le seāseā tupu, ma o loo molimauina i aafiaga o Nifae a o ia taumafaia ni faiga eseese a o lei faamanuiaina o ia i le aumaia o papatusi apamemea mai ia Lapana (tagai 1 Nifae 3–4). O le iuga lava, na taitaia o ia e le Agaga i Ierusalema “[na] te lei muai iloa mea [na] te faia” (1 Nifae 4:6). Na te lei aoaoina foi pe faapefea ona fau se vaa mata’ina i le taimi e tasi; ae na faaalia ia te ia e le Atua “i lea aso ma lea aso le ala [na] te fai ai laau o le vaa” (1 Nifae 18:1).
Ua faatumulia le talafaasolopito o le Ekalesia ma o tatou olaga patino i faataitaiga o mamanu a le Alii mo le mauaina o faaaliga “o lea upu ma lea upu, o lea fuaiupu ma lea fuaiupu.” Mo se faataitaiga, o upumoni faavae o le talalelei toefuataiina e lei auina atu uma i le Perofeta o Iosefa Samita i le taimi e tasi i le Vao Paia. Na faaalia nei ‘oa anagata ina ua talafeagai ma tulaga ma ua sa’o foi le taimi.
Sa faamatala e Peresitene Iosefa F. Samita le auala na tulai mai ai lenei mamanu o faaaliga i lona soifuaga: “A o ou tamaitiiti … sa faalausosoo ona ou … fesili i le Alii e faasino mai ia te au ni mea ofoofogia, ina ia ou maua ai se molimau. Peitai, sa taofia e le Alii ia mea ofoofogia mai ia te au, ma sa faaalia mai ia te au le upumoni, o lea fuaiupu ma lea fuaiupu … seia oo ina ou iloa le upumoni mai lo’u tumuai e oo ifo i o’u alofivae, ma seia oo ina tafiesea uma mai ia te au le masalosalo ma le atuatuvale. Na te lei tau auina mai ia te au se agelu mai le lagi e faia lena mea, na te lei fetalai mai foi i se leo o se pu a se agelu. O musumusuga a le leo itiiti ma le filemu o le Agaga o le Atua soifua, na ia tuuina mai ai le molimau lea ua ou maua. O le mataupu faavae foi lenei ma le mana, o le a ia tuu atu ai i fanau uma a tagata se iloa o le upumoni o le a tumau ia i latou, ma o le a latou iloa ai le upumoni, e pei ona silafia ai e le Atua, ma faia le finagalo o le Tama e faapei ona faia ai e Keriso. Ma e leai lava ni faaaliga ofoofogia e tele o le a faataunuuina ai lenei mea” (i le Conference Report, Apr. 1900, 40–41).
O i tatou o tagata o le Ekalesia e foliga e faamamafaina tele faaaliga faaleagaga ofoofogia ma le matautia, tatou te ono le patipatia ai ma oo ai lava ina le amanaiaina le mamanu masani e faataunuuina ai e le Agaga Paia Lana galuega. O le “faatauvaa o le ala” (1 Nifae 17:41) o le mauaina o uunaiga laiti auauai, lea a mavae se taimi ma i lona aotelega e maua ai se tali sa mananao ai po o le taitaiga tatou te manaomia, e ono afua ai ona tatou “vaavaai i ona tala atu o le faailoga” (Iakopo 4:14).
Ua ou talanoa i le toatele o tagata o ē o loo fesiligia le malosi o a latou molimau patino, ma ua vaai maualalo i lo latou mana faaleagaga aua latou te le o mauaina faalausosoo ni uunaiga malolosi, faavavega. Atonu a tatou mafaufau i aafiaga o Iosefa i le Vao Paia, Paulo i le ala i Tamaseko, ma Alema le Itiiti, ona tatou talitonu lea e i ai se mea o sese pe o faaletonu i o tatou olaga tatou te le o maua ai nei faataitaiga lauiloa faaleagaga ma le ofoofogia. Afai na faapena ni ou mafaufauga po o ni masalosaloga, faamolemole ia e silafia o lena e te lelei. Tau lava ina e fetaomi atu i luma ma le usiusitai ma le faatuatua i le Faaola. A e faia, “e le mafai ona e fesēa’i” (MFF 80:3).
Na apoapoai mai Peresitene Iosefa F. Samita: “Faaali mai ia te au le Au Paia o Aso e Gata Ai o ē tatau ona fafagaina i vavega, faailoga ma faaaliga ina ia tumau mausali ai i le Ekalesia, ona ou faailoa atu lea o tagata o le au paia … o ē lē o tulaga lelei i luma o le Atua, o ē foi o loo savavali i ala mase’ese’e. E le o faaaliga ofoofogia e tuuina mai ia i tatou, e faavaeina ai le upumoni, ae o le lotomaulalo ma le usiusitai faamaoni i poloaiga ma tulafono a le Atua” (Conference Report, April 1900, 40).
O se isi aafiaga masani i le malamalama e fesoasoani tatou te aoaoina ai se isi upumoni faaopoopo e uiga i le mamanu o faaaliga i le “upu ma lea upu, o lea fuaiupu ma lea fuaiupu”. O nisi taimi e oso a’e le la i se taeao e puaoa ma pe ufitia i le ao. Ona o tulaga faamalumalu mai, o le a faigata ai ona iloa le malamalama, ma o le a le mafai ona faailoa le taimi tonu e oso a’e ai le la i le tafailagi. Peitai, i se taeao faapena, o le a lava lava le malamalama e iloa ai se aso fou e faatino ai a tatou mea e fai.
I se auala foi faapena, e tele taimi tatou te mauaina ai se faaaliga e aunoa ma le iloa tonu pe faapefea ae pe o afea foi tatou te maua ai le faaaliga. E i ai se tala mai le talafaasolopito o le Ekalesia e faapupula ai lenei mataupu faavae.
I le tautotogo o le 1829, o Oliva Kaotui o se faiaoga i Palamaira, Niu Ioka. Ina ua faalogo o ia e uiga ia Iosefa Samita ma le galuega o le faaliliuga o le Tusi a Mamona, sa uunaia Oliva e ofo atu lana fesoasoani i le perofeta talavou. O lea na malaga ai o ia i Haramoni, Penisilevania, ma avea ai ma failautusi ia Iosefa. O le taimi na ia taunuu atu ai ma le fesoasoani sa ia tuuina atu, na taua tele i le aumaia o le Tusi a Mamona.
Na mulimuli ane faaali e le Alii ia Oliva, o le tele o lona tatalo atu mo se taitaiga, ua maua ai foi faatonuga mai le Agaga o le Alii. “Ana le faapea,” na fetalai atu ai le Alii, “semanu e te le oo mai i lenei nuu ua e i ai i le aso. Faauta, ua e iloa na e ole mai ia te au ma na ou faapupulaina lou mafaufau; ma o lenei, ou te ta’u atu nei mea ia te oe ina ia e iloa ai na faapupulaina oe e le Agaga o le upumoni” (MFF 6:14–15).
O le mea lea, na maua e Oliva se faaaliga e ala mai i le Perofeta o Iosefa Samita lea na ta’uina atu ia te ia sa ia maua se faaaliga. E manino lava, e lei iloa e Oliva pe na faapefea ae pe o anafea foi na ia maua ai se faatonuga mai le Atua ma sa manaomia lenei faatonuga e faateleina ai lona malamalama e uiga i le agaga o faaaliga. O lona uiga, sa savali Oliva i le malamalama e faapei o le oso a’e o le la i se taeao puaoa.
I le tele o faaletonu ma luitau tatou te fetaiai i o tatou olaga, e manaomia e le Atua i tatou ina ia faia le mea sili tatou te mafaia, e filifili ai ae le o le tau faatonuina (tagai 2 Nifae 2:26), ma ia faalagolago atu ia te Ia. Atonu tatou te le vaai i ni agelu, faalogo i ni leo mai le lagi, pe mauaina foi ni uunaiga lofituina faaleagaga. Atonu tatou te fetuleni faalausosoo atu i luma ma le faamoemoe ma tatalo—ae e aunoa ma se mautinoa a’ia’i—o loo tatou faia e tusa ma le finagalo o le Atua. Ae a tatou faamamaluina a tatou feagaiga ma tausi i poloaiga, a o tatou taumafai atili e le aunoa e faia mea lelei ma atili ona lelei, e mafai ona tatou savavali ma le mautinoa o le a taialaina e le Atua a tatou la’a. E mafai foi ona tatou tautala ma le mautinoa o le a musuia e le Atua a tatou faamatalaga. O se vaega lea o le uiga o le mau lea o loo faapea mai: “Ona malosi lea o lou faatuatua fai ifo i luma o le Atua” (MFF 121:45).
A outou sailia i le tulaga talafeagai ma faalagolago atu i le agaga o faaaliga, ou te folafola atu o le a outou “savavali i le malamalama o le Alii” (Isaia 2:5; 2 Nifae 12:5). O nisi taimi o le a galue vave ai ma malosi le agaga o faaaliga, o isi taimi e faifai malie ma le le gaoia, ma e tele lava ona matua’i maaleale atonu o le a e le malamalama lelei i ai. Ae po o le a lava le mamanu e maua mai ai lenei faamanuiaga, o le malamalama na te aumaia o le a suluia ai ma faalauteleina ai lou agaga, ma faatupulaia lou malamalama (tagai Alema 5:7; 32:28), ma taitai ma puipuia oe ma lou aiga.
Ou te tuuina atu la’u molimau faaaposetolo o loo soifua le Tama ma Lona Alo. E moni le agaga o faaaliga—ma e mafai ma e galue i o tatou ola taitoatasi faapea foi i Le Ekalesia a Iesu Keriso o le Au Paia o Aso e Gata Ai. Ou te molimau atu i nei upumoni i le suafa paia o le Alii o Iesu Keriso, amene.