WanFaea we IStap Bon Insaed long Mi
Dei we hem i lanem blong rid, hem i dei tu we Eduardo i kasem wan testemoni abaot Buk blong Momon mo paoa blong hem.
“Bubuman blong mi i stap talem oltaem: ‘Sapos yumi wantem kam wan man, yumi mas lanem blong rid,’ Eduardo Kontreras i talem. “Bubuman blong mi i stap talem stret.”
Be long Eduardo, rod blong folem blong hem i save rid, hem i wan longwan. Olsem wan long ol faef pikinini we wido mama blong hem long siti blong Kodoba, Ajentina, hem i bin livim skul taem hem i gat eit yia mo i bin go wok blong help blong sapotem famle blong hem.
Hem i tingbaot: “mifala i bin pua tumas.” Blong help blong gat mane kasem en blong manis, Eduardo i stap saenem sus, i mekem ol brikis, i stap pikimap ol poteto, i salem ol niuspepa, mo i tekem ol nara smosmol wok kasem taem we, olsem wan yang man, hem i bin faenem wan fultaem wok wetem munisipol gavman.
Taem ol yia oli stap pas, Eduardo i bin mared mo i bin statem wan famle blong hemwan. Taem kolosap ol faef pikinini blong hem oli stat blong aot long hom, hem i no save rid yet mo hem i no gat tumas hop se bae hem i lan blong rid. Hemia i bin jenis wan dei taem hem i bin ronem sam lokol boe we oli bin stap jikim tu Lata-dei Sent misinari long fored blong hom blong hem. Hem i bin invaetem ol misinari blong kam long haos blong hem, mo i no longtaem afta, hem mo waef blong hem, Maria, tufala i bin stap tekem ol lesen.
Eduardo i tingbaot: “mi bin gat hadtaem blong andastanem eni samting we tufala i bin stap talem from se tufala i no toktok gud Spanis. Be tufala i bin soem wan smol buk we i gat ol pikja blong Sevya mo Profet Josef Smit long Tabu Bus. Mi ting se ol pikja ia we tufala i bin stap soem, mo ol samting we tufala i bin tijim mifala, i bin naes tumas.”
I no longtaem afta, tufala nara misinari i kam tekem ples blong tufala faswan, mo i gat wan i toktok Spanis. Eduardo mo Maria, we tufala i bin lusum wan smol bebi gel sam yia bifo, i bin harem gud tumas afta we tufala i luk film ia, Families Are Forever (Ol Famle Oli Blong Oltaem). Tufala, wetem yangfala boe blong tufala, Osvaldo, i bin kasem baptaes.
Wetem baptaes blong Eduardo long yia 1987, hem i kasem wan filing blong wantem ridim Buk blong Momon blong mekem testemoni blong hem i kam strong moa. “Olsem wanem bae mi lan blong mi rid?” hem i askem waef blong hem. Maria i talem long hem blong lukluk long ol leta, putum olgeta tugeta long maen blong hem, traem blong saonem laod ol toktok ia, mo afta, traem blong ridim laod. Waef blong hem i talem gud long hem se wetem praktis, bae hem i save lan blong rid.
Eduardo, we long taem i gat 45 yia, i bin save saon blong plante leta, be hem i no bin traem blong rid stat long taem we hem i livim skul foti yia bifo.
Mi Bin Filim Wan Faea
Wetem wan prea long hat blong hem, Eduardo i bin sidaon long wan hot dei andanit long sed long yad blong hom blong hem. Hem i talem: “Long taem ia, mi mekem strong tingting blong mi mas traem.”
Maria i talem se hem i neva ting long wanem i bin hapen afta. Taem hem i stap wok long kijin, hem i stap lisin i go taem Eduardo i stap traem blong saonem ol leta mo ol toktok. “Wantaem nomo, mi bin harem hem i toktok hariap,” hem i talem. “Mi bin lisin mo mi luksave se hem i bin stap rid—i stap rid gud. I no wan aoa haf i pas, mo hem i bin stap rid!”
Eduardo i lus tumas long tingting blong hem blong traem rid, mekem se hem i no luksave se hem i bin stap rid. Be taem hem i bin stap rid, hem i tingbaot, “mi bin filim wan faea i stap bon insaed long mi.” Eduardo i bin fraet mo i bin sapraes nao hem i singaotem waef blong hem mo talem: “Mama, wanem nao i stap hapen long mi?”
Maria i ansa: “Hem i Spirit blong Lod. Yu save rid gud nao!”
Taem hem i stap tingtingbak long eksperiens ia Maria i talem: “Hem i wan samting we bae mitufala i neva save tanem baksaed blong mitufala long hem.”
Eduardo i ademap: “Dei we mi bin lanem blong rid, i dei ia tu we mi bin kasem testemoni blong mi long saed blong Buk blong Momon mo paoa blong hem.”
Stat long taem ia, Eduardo i stat blong girap long 4 klok long moning blong ridim Buk blong Momon bifo hem i go long wok. Afta, hem i ridim Doktrin mo Ol Kavenan, mo afta Baebol. Naoia i gat wan laebri we i flasem hom blong famle Kontreras, mo i gat sam buk i bin stap long hem bifo long yia 1987.
Taem Eduardo mo Maria i gro long save blong gospel, testemoni blong tufala tu i bin gro. Taem boe blong tufala, Osvaldo i bin ded long wan bigfala aksiden blong trak long yia 2001, testemoni blong tufala—we i strong wetem ol eksperiens long saed blong spirit long taem blong prea, mo insaed long Buenos Aeres Ajentina Tempol, we tufala i bin silim tufala wetem Osvaldo—i bin helpem tufala blong tekem ded blong boe blong tufala.
Eduardo i talem se: “Ating sam papa mo mama bae oli go krangke, be mitufala i filim wan pis we i stap talem: ‘boe blong yutufala i stap gud.’ Yes, mitufala i bin krae. Hem i bin wan gud boe, mo mitufala i misim hem. Be mifala i bin sil long tempol, mo mifala i save weaples nao hem i stap long hem.
Laet blong Save Rid
Tru long lesen blong wan memba blong wod blong hem, Eduardo i bin lanem tu blong raet. Hem i talem: “Bifo, mi no save saenem nem blong mi.”
Wetem laet blong save rid, Eduardo i kam blong andastanem se ol toktok blong bubuman blong hem i tru.
Hem i talem: “Yumi stap long wol ia blong yumi save progres smol moa evri dei.” Taem hem i lan blong rid mo blong raet, hem i stap soem long ol pikinini mo apupikinini blong hem se i neva let tumas blong lanem samting, blong kam antap, mo blong kam wanem we God i wantem yumi blong kam. Hem i talem: “From se mi save rid, mi lanem wan niu samting evri dei.”
Tedei, Brata Kontreras i save ridim eni samting we hem i wantem ridim, mo tu ol niuspepa ia we hem i bin stap salem taem hem i wan pikinini we i no save rid. Ol skripja oli stap olsem bes buk we hem i laekem, speseli Buk blong Momon. Hem i bin ridim stat kasem en ova long eit taem nao.
Hem i talem: “long mi, Buk blong Momon i doa,” mo hem i stap talem tangkyu yet long olsem wanem fasin blong rid mo gospel i bin jenisim laef blong hem. “Buk blong Momon i evri samting long mi. Hem i evri samting long mi. Mi filim Spirit evri taem we mi openem blong ridim.”
Long Eduardo Kontreras, we i stap long pikja antap wetem waef blong hem, Maria, Buk blong Momon i doa blong save rid. Hem i talem: “Mi filim Spirit evri taem mi openem blong ridim.”
Foto i kam long Maekel R. Moris