Wanem Nao Buk blong Momon I Stap Tijim Yumi Abaot Lav blong God
Sam long ol gudgudfala eksampol blong lav blong Lod, oli raetemdaon i stap long Buk blong Momon.
Plante Kristin man oli save gud ol fasin blong Jisas Kraes olsem we Baebol i stap tokbaot. Oli stap sapraes long lav we Hem i bin soem long olgeta we oli pua, olgeta we oli sik, olgeta we oli daonem olgeta. Olgeta we oli stap talem se oli ol disaepol blong Hem, oli traem tu blong mekem semmak folem eksampol blong Hem mo blong stap folem strong toktok blong Aposol we Hem i lavem tumas we i talem se: “Ol fren. Yumi mas lavlavem yumi, from we fasin ya blong lavem man, hem i kamaot long God. Olgeta we oli stap lavem narafala man, oli pikinini blong God, mo oli save God … from we God i stamba blong fasin ya blong lavem man” (Fas Jon 4:7–8).
Tingting ia, i kam klia insaed long Buk blong Momon. Hem i tokbaot olsem wanem wan i bon long God mo olsem wanem wan i kasem paoa blong lavem man olsem we God i lavem man. Hem i soem trifala stamba prinsipol we i tekem paoa blong lav blong God insaed long laef blong yumi.
Faswan, Buk blong Momon i tijim se blong stap yusum fet long Kraes mo blong stap mekem wan kavenan wetem Hem blong stap kipim ol komanmen blong Hem i wan ki blong bon bakegen long saed blong spirit. Long ol pipol blong taem blong Buk blong Momon we oli bin mekem wan kavenan olsem, King Benjamin i talem long olgeta: “Mo nao, from kavenan ia we yufala i bin mekem, bae oli singaotem yufala ol pikinini blong Kraes, ol boe blong hem, mo ol gel blong hem; from luk, long dei ia, hem i bin bonem yufala long saed blong spirit; from yufala i talem se ol hat blong yufala i bin jenis tru long fet long nem blong hem; taswe, yufala i bon long hem mo bin kam ol boe blong hem mo ol gel blong hem” (Mosaea 5:7).
Nambatu, Sevya Hemwan i tijim se paoa blong kam moa olsem Hem i kam tru long fasin blong kasem ol odinens blong gospel: “Nao hemia i komanmen: Sakem sin, yufala evriwan long evri en blong wol, mo kam long mi mo kasem baptaes long nem blong mi, blong yufala i save kam klin taem we yufala i kasem Tabu Spirit, blong yufala i save stanap mo no gat mak long fored blong mi long las dei” (3 Nifae 27:20).
Nambatri, Hem i askem strong long yumi blong folem eksampol blong Hem: “Taswe, yufala i mas kam ol wanem kaen man?” Hem i askem wetem strong tingting. Ansa blong Hem i: “I tru mi talem long yufala, i olsem mi stap” (3 Nifae 27:27). I tru. Hem i wantem yumi blong kam moa olsem Hem.
Sam long ol gudgudfala eksampol blong lav blong Hem, oli raetemdaon insaed long Buk blong Momon. Ol eksampol ia, yumi save yusum long laef blong yumi taem yumi traehad blong kam moa olsem Lod.
Hem i bin lav we Hem i bin gat long Lihae mo famle blong Lihae—mo lav we olgeta oli bin gat long Hem—we i mekem se Lihae mo famle blong Hem i kasem Ol Amerika, graon blong promes blong olgeta, ples ia we oli bin kam antap.1
Hem i bin lav we God i gat long yumi we i bin mekem se Hem, plante handred yia i pas finis, i bin givim oda long ol profet blong ol man blong Nifae blong raetemdaon wan tabu histri blong ol pipol blong olgeta. Ol lesen we oli kamaot long histri ia oli tokbaot fasin we Jisas i sevem yumi mo fasin blong yumi kam olsem god. Ol tijing ia oli stap naoia insaed long Buk blong Momon. Tabu buk ia i stap blong yu save holem, i olsem wan pruf blong lav blong God long evri pikinini blong Hem raon long wol.2
Hem i lav we Kraes i gat long ol “narafala sipsip” we i mekem Hem i kam long Niufala Wol.3 Insaed long Buk blong Momon, yumi lanem se ol bigfala disasta mo tri dei blong tudak i bin hapen long Niufala Wol afta long ded blong Lod long Olfala Wol. Afta, Lod we i gat glori mo i laef bakegen long ded, i bin stap long heven mo i kamdaon mo i bin tij long medel blong ol pipol blong Niufala Wol.
“Mi mi laet mo laef blong wol,” Hem i bin talem long olgeta, “mo mi bin dring aot long kap we i konkon we Papa i bin givim long mi, mo mi bin leftemap nem blong Papa taem we mi putum long mi ol sin blong wol” (3 Nifae 11:11).
Afta, Hem i bin givim bigfala eksperiens we eniwan i save gat wetem Hem. Hem i bin invaetem olgeta blong oli filim soa long saed blong bodi blong Hem, mo tajem ol mak blong nil long han mo leg blong Hem, blong oli save stret se Hem i “God blong Isrel, mo God blong ful wol, mo oli bin kilim ded [hem] from ol sin blong wol” (3 Nifae 11:14).
Afta, Jisas i bin givim ol disaepol blong Hem atoriti ia blong mekem baptaes, blong givim presen we i Tabu Spirit, mo blong blesem mo pasem sakramen. Hem i bin givim olgeta paoa blong stanemap Jos blong Hem long medel blong olgeta, mo twelef disaepol i lidim.
Hem i bin givim long olgeta sam long ol stamba tijing we Hem i bin givim long ol disaepol blong Hem long Olfala Wol. Hem i bin mekem ol sikman blong olgeta oli kam gud bakegen. Hem i bin nildaon mo i bin prea long Papa wetem ol toktok we oli gat paoa mo oli tabu tumas, we oli no bin save raetemdaon olgeta. Prea blong Hem i bin gat paoa tumas we olgeta we oli bin harem hem oli bin gat fulap glad. From Hem i bin glad tumas long lav blong Hem long olgeta mo from fet blong olgeta long Hem, nao Jisas i bin krae. Hem i bin talem profesi blong ol wok blong God we bae oli kam yet long plante handred ia we i stap kam i go kasem taem blong Seken Kaming blong Hem.4
Afta, Hem i bin askem blong oli tekem ol pikinini blong olgeta i go long Hem.
“Mo hem i bin tekem ol smol pikinini blong olgeta wan afta narawan, mo i bin blesem olgeta, mo i bin prea long Papa from olgeta.
“Mo taem we hem i bin mekem samting ia, hem i bin krae bakegen;
“Mo hem i bin toktok long grup blong pipol ia, mo i bin talem long olgeta: Luk ol smol wan blong yufala.
“Mo taem we oli stap lukluk blong lukim oli bin sakem ol ae blong olgeta i go long heven, mo oli bin lukim ol heven i open, mo oli bin luk ol enjel i stap kamdaon aot long heven olsem we i stap long medel blong faea; mo oli bin kam daon mo oli bin raonem ol smol wan ia, … mo ol enjel i bin givhan long olgeta” (3 Nifae 17:21–24).
Lav blong God i stret evriwan mo i gat paoa olsem nao, olsem we Buk blong Momon i talemaot.
Long ol lata-dei ia, yumi we yumi gat janis blong gat Buk blong Momon, blong stap olsem ol memba blong Jos blong Lod, blong gat gospel blong Hem, mo blong kipim ol komanmen blong Hem, yumi save gud abaot lav blong God we i no gat en. Yumi save olsem wanem blong mekem lav blong Hem i kam olsem lav we bae yumi gat long nara man. Taem yumi kam ol tru disaepol blong Hem, yumi kasem paoa blong lavem man olsem we Hem i stap lavem man. Taem yumi stap kipim ol komanmen blong Hem, yumi kam moa olsem Hem. Yumi mekem moa man i kam insaed long sekol blong lav blong yumi taem yumi go aot long ol pipol blong evri kantri, famle, mo lanwis.
Wetem bigbigfala tangkyu from gudfala eksampol blong laef blong Hem, yumi save mekem skripja ia i kam olsem standet o flag blong yumi: “From samting ia, ol brata blong mi we mi lavem tumas, prea long Papa wetem evri paoa blong hat, blong yufala i save fulap wetem lav ia, we hem i bin givim long olgeta we oli ol tru man blong folem Pikinini blong hem, Jisas Kraes; blong yufala i save kam ol boe blong God; blong taem we bae hem i kamaot bae yumi stap olsem hem, from bae yumi lukim hem olsem we hem i stap; blong yumi save gat hop ia; blong yumi save kam klin olsem we hem i klin” (Moronae 7:48).5
Kraes I Kamaot long Amerika,i kam long Anol Fribeg© 1995 IRI
Alma I Stap Mekem Baptaes long Ol Wota blong Momon, i kam long Anol Fribeg
Jisas Kraes I Visitim Amerika,i kam long Jon Skot