Ol Tijing blong Taem blong Yumi
Yumi lanem long ol profet blong bifo se insaed long Buk blong Momon i gat “ol samting we i klia mo gudgudfala” we oli bin holemtaet i stap blong tijim yumi long taem blong yumi (luk long 1 Nifae 13:40; 19:3). Ol trutok ia oli mekem samting i klia mo mekem yumi andastanem ful gospel blong Jisas Kraes mo i helpem ol studen blong Buk blong Momon blong oli gotru long ol jalenj blong laef wetem hop mo paoa. Ol toktok we oli stap andanit ia, we oli kam long ol profet mo aposol blong tedei, oli testifae long ol impoten tijing ia.
Lod I Gat Tingting long Yumi
“Mi stap tingbaot ol toktok blong Lod we i stap long buk blong Ita insaed long Buk blong Momon. Hem i talem se ‘yu no save krosem bigfala dip solwota ia sapos mi no mekem rere yufala agensem ol wef blong solwota, mo ol win we i bin go aot, mo ol wota we i bin kam antap bigwan’ [Ita 2:25]. Ol brata mo sista blong mi. Hem i bin mekem yumi rere. Sapos yumi mekem folem ol toktok blong Hem mo laef folem ol komanmen, bae yumi save laef mo gotru long taem ia we man i tingting nating long samting mo taem ia we i nogud—wan taem we yumi save komperem long ol wef, mo ol win, mo ol bigfala wota we i save prapa spolem ol samting. Hem i gat tingting long yumi oltaem. Hem i lavem yumi mo bae i blesem yumi taem yumi mekem wanem we i raet.”
President Thomas S. Monson, “Closing Remarks,” Liahona, Nov. 2009, 109.
Jisas Hem I Kraes
“Buk blong Momon i testemoni we i gat moa paoa, we oli raetem mo yumi gat we i talem se Jisas, Hem i Kraes. Wanem nao Nifae i talem se hem i stamba blong kasem Tabu Spirit? Fet long Lod Jisas Kraes. Yu ting se sapos yu ridim Buk blong Momon wanwan taem bae i mekem se yu gat fet long Lod Jisas Kraes? Mi no ting se bae yu tingting olsem sapos yu ridim gud Nifae. Hem i talem se buk ia i ‘presen blong God long olgeta we i wok strong oltaem blong lukaotem hem.’ Wok strong oltaem, i minim blong stap mekem oltaem. Mo i minim tu blong stap tingting hevi mo stap prea. Mo blong stap prea bae i minim tu blong askem strong blong save trutok. Sapos yumi no mekem kasem mak ia, bae i olsem se yumi no wok strong oltaem. Sapos yumi no mekem kasem mak ia, i olsem se yu mo mi i no mekem inaf.”
President Henry B. Eyring, Fas Kaonsela long Fas Presidensi, “Going Home,” long Brigham Young University 1986–87 Devotional and Fireside Speeches (1987), 77–78.
Wan Ofisol Toktok we I Talemaot Gospel
“Ol rus pat blong mesej blong gospel oli stap insaed long evriwan long ol tabu skripja, be plante i klia gud long yumi insaed long Buk blong Momon, mo insaed long ol revelesen we i go long Profet Josef Smit. Long ples ia, Jisas Hemwan i talemaot klia doktrin blong Hem mo gospel blong Hem, we ol pikinini blong God oli mas folem blong gat laef we i no save finis’ (D&C 14:7).”
President Dieter F. Uchtdorf, Seken Kaonsela long Fas Presidensi, “Have We Not Reason to Rejoice?” Liahona, Nov. 2007, 19.
Baptaes blong Ol Smol Pikinini
“[Sam oli biliv] se ol smol pikinini, oli bon long sin mo oli kam long wol ia wetem sin. Doktrin ia i no tru!
“‘Sapos mi bin lanem trutok,’ Momon i raetem, ‘i bin gat ol rao long medel blong yufala long saed blong baptaes blong ol smol pikinini blong yufala’ (Moronae 8:5).
“Hem i talem se rao blong olgeta i ‘wan bigfala rong’ mo i bin raetem: …
“‘Lisin long ol toktok blong Kraes, Ridima blong yu, Lod blong yu mo God blong yu. Luk, mi bin kam long wol i no blong singaotem olgeta we i stret be olgeta we i sin blong sakem sin; olgeta we i no sik i no nidim dokta, be olgeta we i sik; from samting ia, ol smol pikinini i klin, from oli no save mekem sin; from samting ia, panis blong Adam i kamaot long olgeta tru long mi, mekem se i no gat eni paoa ova long olgeta; …
“‘Mo long fasin ia Tabu Spirit i bin soemaot toktok blong God long mi; from samting ia, boe blong mi we mi lavem tumas, mi save se i wan tru fasin blong jik long fored blong God, blong yufala i mas baptaesem ol smol pikinini’ (Moronae 8:7–9). …
“Ridim ful toktok blong hem. Hem i tru doktrin.”
President Boyd K. Packer, Presiden blong Kworom blong Olgeta Twelef Aposol, “Little Children,” Ensign, Nov. 1986, 17.
Ol Woning we I Kam long Buk blong Momon
“Sam long ol lesen we yumi lanem long Buk blong Momon, hem i risen mo wanem i kamaot afta long wo mo i kamaot folem wan situesen. Hem i tokbaot ol nogud samting we i stap mo ol denja blong ol sikret plan, we oli stap mekemap blong kasem paoa mo gat kontrol ova long ol pipol. Hem i tokbaot se i tru we Setan i stap mo i talemaot sam long ol fasin we hem i stap yusum. Buk i givim advaes long yumi long stret fasin blong yusum ol rij samting blong yumi. Hem i tokbaot long yumi abaot ol klia mo gud trutok blong gospel mo we Jisas Kraes i tru mo i kam long heven, mo abaot sakrifaes blong Hem we i pemaot evri man kaen. Hem i talemaot long yumi abaot kam tugeta long haos blong Isrel long ol las dei. Hem i talem long yumi abaot stamba tingting mo ol prinsipol blong misinari wok. Hem i givim woning long yumi agensem hae tingting, fasin blong no wantem save samting, fasin blong pusumbak, mo ol denja blong ol giaman kastom, fasin blong gat tufes, mo fasin blong no folem jastiti.
“Naoia, i stap long yumi blong stadi long Buk blong Momon mo lanem ol prinsipol we oli stap insaed, mo yusum olgeta long laef blong yumi.”
Elda L. Tom Perry blong Kworom blong Olgeta Twelef Aposol, “Blessings Resulting from Reading the Book of Momon,” Liahona, Nov. 2005, 8.
Evri Samting Bae I Kambak
“Wanem stret hem i laef bakegen long ded, oli tokbaot gud long Buk blong Momon. Profet Amulek i bin tijim:
“‘Ded blong Kraes bae i tekemaot ol rop blong ded ia blong bodi, blong mekem se evriwan bae i girap long ded ia blong bodi.
“‘Spirit mo bodi bae oli kam tugeta bakegen long stret fom blong hem, ol han, ol leg mo ol joen bae oli kam tugeta bakegen long ol stret ples blong olgeta, olsem we yumi stap naoia long taem ia; …
“‘Nao, kambak ia bae i hapen long evriwan, ol olfala tugeta wetem ol yangfala, ol slef tugeta wetem olgeta we oli fri, ol man tugeta wetem ol woman, ol nogud man tugeta wetem olgeta we i stret; mo tu bae i no save gat wan pis hea blong wan wan hed blong olgeta we i lus; be evri samting bae i kambak long ol stret ples blong olgeta’ (Alma 11:42–44).
“Alma i bin tijim tu se long laef bakegen long ded ‘evri samting bae i kambak long ol stret ples blong olgeta’ (Alma 40:23). …
“Hem i gud blong gat pis long tingting blong save se evriwan we oli bin gat evri samting long laef ia … bae oli laef bakegen long ded mo evri samting bae i stap ‘long ol stret ples blong ogleta.’”
Elda Dallin H. Oaks blong Kworom blong Olgeta Twelef Aposol, “Resurrection,” Liahona, Julae 2000, 17.
Ol Denja blong Ol Sikret Plan
“Buk blong Momon i tijim se ol sikret plan blong kilimded man i stap olsem wan bigfala jalenj, i no long wanwan man mo woman nomo mo ol famle, be tu, long wan ful pipol. Tedei, wanem i stap insaed long ol sikret plan oli ol gang, ol grup blong drag, mo ol famle we oli stap oganaesem rod blong kilimded man. Ol sikret plan blong taem blong yumi oli wok long sem fasin olsem long taem blong ol stilman blong Gadianton. … Sam long ol stamba tingting blong olgeta i blong ‘kilim man i ded, mo stil long taem blong faet, mo stil, mo mekem ol fasin blong stap slip olbaot mo evri kaen nogud fasin, agensem ol loa blong kantri blong olgeta mo tu ol loa blong God blong olgeta’ [Hileman 6:23].
“Sapos yumi no lukaot gud, ol sikret plan blong tedei bae i save kam strong mo gat paoa kwiktaem mo fulwan olsem we i bin hapen long taem blong Buk blong Momon.”
Elda M. Russell Ballard blong Kworom blong Olgeta Twelef Aposol, “Standing for Truth and Right,” Ensign, Nov. 1997, 38.
Stretem Ol Jalenj blong Laef
“Buk blong Momon i tekem ol mesej we heven i putum i stap long ples blong soem olsem wanem blong stretem wok blong ol giaman kastom, mo blong soem olsem wanem blong kasem wan ful gud laef. Hem i tijim olsem wanem blong stretem ol problem mo ol jalenj we yumi stap fesem tedei. … [Lod] i bin givim wan rod blong stretem ol bigfala rong blong laef, be ol toktok ia blong lidim yumi bae oli nating nomo sapos oli lok i stap nomo insaed long wan buk we i no open.”
Elda Richard G. Scott blong Kworom blong Olgeta Twelef Aposol, “True Friends That Lift,” Ensign, Nov. 1988, 76.
I Mekem Yumi Tingbaot Ol Kavenan blong Yumi
“Buk blong Momon i mekem yumi tingbaot oltaem se baptaes blong yumi i wan kavenan blong ‘stanap olsem ol witnes blong God [mo kingdom blong Hem] evri taem mo long evri samting, mo long evri ples we yufala i save stap long hem, go kasem ded, mekem se God i save pemaot yufala, mo bae oli kaontem yufala wetem olgeta ia blong fasfala laef bakegen, mekem se yufala i save kasem laef we i no save finis’ (Mosaea 18:9; oli ademap italik).”
Elda Robert D. Hales blong Kworom blong Olgeta Twelef Aposol, “The Covenant of Baptism: To Be in the Kingdom and of the Kingdom,” Liahona, Jenuware 2001, 7.
Ol Blesing blong Fasin blong Obei
“Long plante ples insaed long Buk blong Momon, ol pipol oli bin kasem promes se bae oli kam antap long ples blong olgeta sapos oli kipim ol komanmen [luk long 1 Nifae 2:20; 2 Nifae 4:4]. Promes ia, plante taem i kam wetem woning ia se sapos oli no kipim ol komanmen blong God, bae oli katemaot olgeta long ples we Hem i stap long hem [luk long Alma 36:30].”
Elda Quentin L. Cook blong Kworom blong Olgeta Twelef Aposol, “Hope Ya Know, We Had a Hard Time,” Liahona, Nov. 2008, 104.