Olsem Wanem blong Stadi long Buk blong Momon
Twantefaef yia i pas, Presiden Esra Taf Benson (1899–1994) i bin givim ditel blong “ol trifala bigfala tingting long from wanem ol Lata-dei Sent oli mas mekem stadi blong Buk blong Momon i wan samting we oli mas mekem long laeftaem blong olgeta.”1 Ol risen ia oli go olsem:
-
Faswan, Buk blong Momon i ki ston blong relijin blong yumi—ki ston blong witnes blong yumi abaot Jisas Kraes, doktrin blong yumi, mo testemoni blong yumi.
-
Nambatu, Buk blong Momon, oli bin raetem blong yusum long dei blong yumi.
-
Nambatri, Buk blong Momon i helpem yumi kam kolosap moa long God.
Ol trifala risen ia blong stap stadi long Buk blong Momon, i givim tingting tu long sam narafala wei we bae yumi save stadi long spesel skripja ia.
Ki Ston blong Relijin blong Yumi
From se Buk blong Momon i ki ston blong witnes blong yumi abaot Kraes mo ful gospel blong Hem, hem i impoten, long stadi blong yumi, blong lukukgud long ol fulap tijing mo testemoni blong Sevya we i stap insaed long hem. Sam, oli bin mekem hemia taem oli pem wan niu kopi blong Buk blong Momon, we i no sas, mo stap makem evri ves we i tokbaot o i stap tij abaot Sevya, ministri blong Hem, mo misin blong Hem. Hemia i mekem wan i kasem wan moa strong witnes abaot Jisas olsem Pikinini blong God mo wan niu glad from ol samting we Hem i bin mekem, mo ol samting we Hem i stap gohed blong mekem blong yumi.
Oli Bin Raetem blong Taem blong Yumi
Olgeta we oli bin raetem Buk blong Momon, oli bin raetem ol samting ia wetem long maen blong olgeta, ol fiuja jeneresen, speseli olgeta long lata dei (taem blong las dei). Taem hem i bin raetemsot ol histri blong ol man blong Nifae, Momon i bin talem se buk ia “i no save holem kasem wan handred pat” long wanem we i stap (luk long 3 Nifae 5:8; luk tu long Ol Toktok blong Momon 1:5). Moronae i bin talem, “Luk, mi toktok long yufala olsem se yufala i stap long ples ia, be yufala i no stap. Be luk, Jisas Kraes i bin soem yufala long mi, mo mi save ol wok blong yufala” (Momon 8:35). Tufala man ia we tufala i raet mo ol narawan, we oli mekem samting ia folem insperesen, oli bin raetem wanem we bae i gud moa blong gud blong yumi long ol lata-dei ia.
Nao, yumi mas stadi wetem ol kwestin ia long maen blong yumi. “From wanem hem i raetem pat ia? Olsem wanem nao hemia i blong mi yusum tedei, mo hem i blong mi?” Eksampol, Presiden Benson i bin talem se long Buk blong Momon, yumi faenem wan paten blong stap rere long Seken Kaming blong Sevya. Yumi lanem olsem wanem ol disaepol blong Kraes oli stap laef long ol taem blong wo, olsem wanem oli stap fesem ol samting we i kam agensem olgeta mo fasin blong apostasi, olsem wanem blong mekem misinari wok, mo i givim ansa long ol denja blong wantem ol samting blong wol ia nomo.2 Olsem we Nifae i bin mekem, taem yumi stadi, yumi mas “putum” ol skripja oli kambak long yumiwan—we hem i blong traem faenemaot olsem wanem blong yusum wanem we yumi faenem insaed long Buk blong Momon (luk long 1 Nifae 19:23).
Kam Kolosap Moa long God
Toktok blong Presiden Benson i talem bakegen: “I no nomo se Buk blong Momon i stap tijim yumi long trutok, nomata i tru se hem i stap mekem hemia. I no nomo se Buk blong Momon i stap talem testemoni abaot Kraes, nomata i tru se hem i stap mekem hemia. Be i gat wan samting moa. I gat wan paoa insaed long buk ia we bae i stat blong kam insaed long laef blong yu stat long taem we yu tinghevi blong stadi long buk ia.”3
I tru, taem yu stap stadi long Buk blong Momon, hem i invaetem Spirit, mo Spirit i tul blong revelesen. Hemia i talem se yumi mas stadi wetem wan fasin blong gat tingting, tingting kwaet—blong stap tingting hevi, stap prea, mo ating, blong tekem sam not taem yumi stap rid. Hemia i mekem se yumi stap long wan stret taem blong kasem moa laet mo save andastanem samting moa, tugeta abaot ol samting we yumi stap stadi long hem, mo tu, abaot ol narafala samting. Samtaem, hem i help blong ridim ful Buk blong Momon long wan sot taem blong kasem kwiktaem stori mo mesej we i stap insaed. Be plante taem, hem i gud moa blong lukluk blong putum wan gudfala taem i stap evri dei blong stadi long buk, be i no blong ridim wan namba blong ves o pej evri dei.
Ol Tul blong Help blong Stadi
Yumi glad tedei blong gat wan gudfala namba blong ol tul we i save helpem stadi blong yumi long Buk blong Momon. Sam oli joen i stap wetem ol skripja blong yumi— the Topical Guide (Topik Gaed), Bible Dictionary (Baebol Diksonari), mo Index (Indeks) long Inglis skripja mo Guide to the Scriptures (Gaed blong Ol Skripja) long ol nara lanwis. Mo yumi gat, insaed long ol Lata-dei Sent edisen blong ol skripja, plante futnot mo kros-refrens long evri pej.
Ol nara tul blong help blong stadi, oli printim olgeta olsem ol Sandei Skul Klas- Stadi Gaed blong Memba blong Klas, Seminari Studen Stadi Gaed, mo Institiut Studen Lesenbuk. Long taem blong yumi tedei, wanem i niu i bigfala namba blong ol lektronik tul, olsem we oli tokbaot long kolom long pej 31.
Tul blong Jenisim Laef blong Man
Buk blong Momon i wan bigfala rij samting mo i tul blong jenisim laef blong man, we Lod i bin putum mo givim long taem blong dispensesen blong yumi. Mi luksave buk ia olsem stamba blong testemoni blong mi abaot Jisas Kraes, stamba blong koling blong Josef Smit olsem profet, mo stamba blong Jos blong Jisas Kraes blong Ol Lata-dei Sent olsem “kingdom blong Lod we wan taem bakegen i stanap long wol.”4 Mi mi glad blong joenem testemoni blong mi wetem Jisas Kraes se olsem we Lod mo God blong yu i laef, buk ia hem i tru (luk long D&C 17:6). Bae stadi blong yu long Buk blong Momon long laeftaem blong yu bae i mekem yu jenisim moa laef blong yu mo i lidim yu long wan stret rod we i go kasem laef we i no save finis.
Foto pikja i kam long Kreg Daemon