Wan Testemoni, Wan Kavenan, mo Wan Witnes
Mi talemaot witnes blong mi se Buk blong Momon i wan niu kavenan, wan niu testeman we i kamaot long Niu Wol i go long ful wol.
Ol tabu konfemesen we mi bin gat long saed blong Sevya mo jos blong Hem we i kambak, i kam fas taem long mi taem mi bin wan yang man, taem mi bin ridim Buk blong Momon. Taem mi bin stap ridim tabu rekod ia nao we mi bin filim—bakegen mo bakegen—smol voes long Tabu Spirit we mi no save tanem baksaed blong mi long hem, we i stap talem long sol blong mi se buk ia i tru.
Blong ridim buk ia i stat blong laet blong mi. Hem i stamba blong stret save blong mi long saed blong spirit se God i stap laef, se Hem i Papa long Heven, mo i gat wan plan blong stap glad we i stap blong mi long taem we i no save finis. Hem i bin lidim mi blong lavem Tabu Baebol mo ol narafala tabu standet buk blong Jos. Hem i bin tijim mi blong lavem Lod Jisas Kraes, blong save smol long bigfala lav mo sore blong Hem, mo blong lukluk long gladhat mo bigfala paoa blong sakrifaes we i pemaot man.
From se mi bin lanem miwan se Buk blong Momon i wan tru witnes—wan nara testeman mo wan niu kavenan—se Jisas, Hem i Kraes, mi bin lanem tu se Josef Smit i bin mo hem i wan profet blong God. Olsem we bigfala bubuman blong mi i bin talem long taem blong Restoresen, “I no gat wan nogud man we i save raetem wan kaen buk ia; mo i no gat wan gudfala man i save raetem tu, be nomo sapos buk ia i tru, mo hem i kasem komanmen we i kam long God blong mekem olsem.”1
Antap long ol fas konfemesen blong mi, i kam ol nara taem wetem plante infomesen mo ol tabu taem we i kamaot long mi we tedei, i givim bigfala mining long taem blong mi, long stamba tingting blong laef blong mi, mo wan strong fandesen long testemoni blong mi.
Nao. Mi no bin go long sip wetem brata blong Jared. Mi no bin harem King Benjamin i talem toktok blong hem olsem wan enjel. Mi no bin stap long medel blong grup blong ol Man blong Nifae we oli bin tajem ol mak blong Lod we i laef bakegen long ded, mo mi no bin krae wetem Momon mo Moronae from pipol blong tufala i bin lus evriwan. Be testemoni blong mi abaot rekod ia mo pis we hem i tekem i kam long hat blong man—we i kam long mi tru long kwaet voes blong Tabu Spirit, semmak olsem we oli bin givim long yufala—i wan testemoni we i stap mo i no gat kwestin long hem, semmak olsem testemoni blong olgeta. Mi testifae abaot buk ia, semmak olsem sapos we mi bin stap wetem Ol Tri Witnes mo Ol Eit Witnes, se mi bin holem olgeta buk ia we oli wokem long gol.
Mi testifae bakegen se i no gat wan long yumi i save kam blong biliv fulwan long wok blong lata-dei ia mo i faenem wan ful man blong pis mo kamfot long taem tedei, be kasem taem nomo hem i akseptem se Buk blong Momon mo Lod Jisas Kraes oli kam long heven, mo mi testifae long hemia. Olsem we Momon i bin talem long Moronae long wan long ol bigfala taem blong olgeta, nao mi askem long yufala long bigfala taem blong yumi tedei: “Holem taet fet long Kraes … Mo bae gladhat blong God Papa, we jea blong hem i stap hae long ol heven, mo Lod blong yumi Jisas Kraes, we i stap sidaon long raet han blong paoa blong hem, … i hapen, mo stap wetem yu blong oltaem” (Moronae 9:25–26).
Buk blong Momon i tabu wok blong bigfala las kavenan blong Kraes wetem ol man. Hem i wan niu kavenan, wan niu testeman we i kamaot long Niu Wol i go long ful wol. Laet we mi stap wokbaot folem i laet blong Hem. Sore blong hem mo bigfala paoa blong Hem i lidim mi—mo yu—blong stap olsem ol witnes blong hem long wol.
Baebol mo Buk blong Momon Oli Testifae Abaot Kraes, i kam long Greg K. Olsen