Wan Tabu Wok
Hem i bin akseptem evri samting we mifala i bin tijim hem. So, from wanem nao bae hem i no tekem Buk blong Momon taem mi bin givim long hem?
Wan naet, misinari kompanion blong mi mo mi i bin noknok long doa blong wan yang man we i bin wan ovasi studen, we i stap stadi long wan long yunivesiti blong London. Hem i bin invaetem mitufala i go insaed long haos blong hem, mo mitufala i bin eksplenem se mitufala i ol misinari blong Jos blong Jisas Kraes blong Ol Lata-dei Sent. I luk olsem se hem i wantem tumas blong save moa abaot Restoresen blong gospel, mekem se mitufala i bin testifae abaot Profet Josef Smit mo talem long hem abaot wan tabu buk we i kam long Papa long Heven, we oli singaotem Buk blong Momon. Mitufala i bin talem gud se hem i tabu from se hem i testifae abaot Jisas Kraes.
Mitufala i bin eksplenem se bae hem i save faenemaot hemwan sapos buk i tru mo mitufala i bin givim wan kopi long hem. Taem mitufala i bin pusum han blong givim Buk blong Momon long hem, hem i stanap mo i aot long rum mo i no talem wan toktok. Mi holem Buk blong Momon long han blong mi smol taem, mo kompanion blong mi mo mi, mitufala i sek mo stap lukluk mitufala, mo traem tingting long wanem blong mekem. Mi putum buk antap long tebol.
Mitufala i save luk yang fren blong mitufala long kijin we i stap wasem han blong hem mo i stap wapem han long wan klin tawel. Hem i kambak long rum mo i pikimap Buk blong Momon long tebol mo talem nomo: “Ol pipol blong mi oli wasem han blong olgeta oltaem bifo oli tajem wan samting we i tabu.” Wota blong ae blong mi i ron taem mi luk yang man ia i openem Buk blong Momon long fas taem mo i tanem ol tabu pej blong hem wetem ol klin han.
Alma i bin tijim se ol skripja oli tabu mo oli bin holemtaet blong tekem fasin blong sevem man i kam long ol sol. Hem i talem long boe blong hem, Hileman: “God i bin trastem yu wetem ol samting ia, we oli tabu, we hem i bin kipim tabu, mo tu bae hem i kipim mo sevem olgeta blong wan waes stamba tingting blong hem, blong hem i save soemaot paoa blong hem long ol fiuja jeneresen” (Alma 37:14).
Oli bin sendem mi long wan misin blong tijim gospel blong Jisas Kraes we i kambak; be yet, mi nao, mi wan we i stap kasem tijing i kam long yang man ia wetem ol klin han. Long plante kalja—wetem kalja blong mi tu—hem i no nid blong wasem han bifo yu ridim ol skripja, be simpol aksen ia blong respek i wan samting we i mekem mi tingbaot strong se Buk blong Momon i tabu.
Foto pikja i kam long Saemon Jons