2011
Stori blong Buk blong Momon
Oktoba 2011

Stori blong Buk blong Momon

Wanem i hapen insaed long Buk blong Momon? Yusum ol pikja ia blong lanem abaot ol profet mo ol stori blong gudfala buk blong ol skripja ia.

  1. Buk blong Momon i stat wetem wan profet we nem blong hem i Lihae. Hem i bin givim woning long ol nogud pipol long Jerusalem blong oli sakem sin be ol pipol oli no bin lisin long hem. Lod i bin talem long Lihae blong hem i tekem famle blong hem, hemia waef blong hem Saraea, mo ol boe blong tufala—Leman mo Lemyul, Sam mo Nifae—oli go long ples we i no gat man long hem. (Luk long 1 Nifae 1–2.)

  2. Lihae i bin sendembak ol boe blong hem oli gobak tekem ol skripja we oli bin raetem long ol buk we oli wokem long bras. Olgeta buk ia, oli bin gat histri blong ol bubu blong hem mo ol nara samting we Lod i bin talem long olgeta blong oli raetem. Lihae mo Nifae oli bin lukaot gud long ol buk ia. Mo tu, oli bin raetem, long ol buk we oli wokem long aean, wanem i bin hapen long famle blong olgeta. (Luk long 1 Nifae 3–5.)

  3. Lod i bin givim wan kampas long Lihae, we oli singaotem Liahona, blong lidim famle blong hem i go tru long ples we i no gat man long hem i go kasem graon blong promes. (Luk long 1 Nifae 16.)

  4. Lod i bin talem long Nifae blong bildim wan bot blong tekem famle blong Lihae i go kasem graon blong promes. Nifae i bin obei long papa blong hem mo long Lod, be Leman mo Lemyul, tufala i no bin lisin. (Luk long 1 Nifae 17.)

  5. Lihae mo famle blong hem i bin sel i go long graon blong promes long bot we oli bin bildim. (Luk long 1 Nifae 18.)

  6. Leman mo Lemyul, tufala i bin gohed blong no stap obei long papa blong tufala mo long Lod. Laen blong tufala, oli save olgeta olsem ol man blong Leman. Nifae i bin gohed blong obei long papa blong hem mo long Lod. Laen blong hem, oli singaotem ol man blong Nifae. (Luk long 2 Nifae 4–5.)

  7. Afta we Lihae mo Nifae i bin ded, ol nara pipol, olsem brata blong Nifae, Jekob, i bin gat wok blong raetem ol impoten tijing mo samting we i stap hapen i go long ol buk ia. (Luk long Jekob 1.)

  8. Inos i bin prea blong kasem fogivnes from ol sin blong hem, mo Lod i bin fogivim hem. (Luk long Inos 1.)

  9. King Benjamin i bin bildim wan taoa blong tijim gospel long ol pipol blong hem. (Luk long Mosaea 2–6.)

  10. Wan nogud king, we nem blong hem Noa, i bin mekem se bae oli kilim ded Abinadae. Be ol tijing blong Abinadae i bin jenisim laef blong wan pris blong Noa; nem blong hem Alma. (Luk long Mosaea 11–17.)

  11. Alma i bin ronwe long haos blong King Noa, i bin tijim gospel long ol narafala pipol, mo i bin baptaesem olgeta. (Luk long Mosaea 18.)

  12. Boe blong Alma, Yangfala Alma i no bin stap obei. Hem mo ol fren blong hem, ol boe blong Mosaea, oli bin nogud. Afta, wan enjel i bin talem long olgeta blong oli sakem sin. Alma mo ol boe blong Mosaea oli bin sakem sin mo oli bin spendem ful laef blong olgeta blong stap prijim gospel. (Luk long Mosaea 27–28.)

  13. Boe blong Mosaea, Amon, i bin jenisim laef blong plante man blong Leman afta we Amon i bin difendem ol grup blong animol blong King Lamonae, mo i bin winim tras blong hem. Luk long Alma 17–19.

  14. Kapten Moronae i bin raetem taetol blong fridom mo i bin faet blong difendem fridom blong ol pipol blong hem. (Luk long Alma 46, 48.

  15. Hileman i bin lidim wan ami blong 2000 stret mo gud yang man. (Luk long Alma 53, 56–58.)

  16. Wan profet blong ol man blong Leman, we nem blong hem i Samuel, i bin profesae se Jisas Kraes bae i bon i no longtaem. (Luk long Hileman 13–16.)

  17. Longwe long Betlehem, Jisas Kraes i bin bon. Hem i bin tijim gospel blong Hem, i bin mekem ol pipol oli kam gud bakegen mo i bin blesem olgeta, mo i bin stanemap Jos blong Hem. Afta, Hem i bin ded long kros mo i bin laef bakegen long ded. (Luk long 3 Nifae 1, 8–10.)

  18. Afta we Hem i laef bakegen long ded, Hem i bin visitim ol stret mo gud man blong Nifae mo Leman. Hem i bin tijim gospel blong Hem long olgeta, mo i bin blesem olgeta, semmak olsem we Hem i bin mekem long graon raon long Jerusalem. (Luk long 3 Nifae 11–28.)

  19. Wan boe blong 10 yia, we nem blong hem i Momon, i bin jusum blong raet long ol buk ia taem hem i bin kam bigwan. Taem hem i gat 24 yia, hem i stat blong putum tugeta ol stori we oli moa impoten aot long evri rekod, i go long wan buk we oli wokem long aean. (Luk long Momon 1.)

  20. Bifo Momon i bin ded, hem i bin givim ol buk ia long boe blong hem, Moronae. Moronae i bin wan jeneral long ami. Hem i las man blong Nifae we i bin laef long wan bigfala faet bitwin ol man blong Leman mo ol man blong Nifae. (Luk long Momon 6, 8.)

  21. Bifo Moronae i bin ded, hem i bin berem ol buk ia long wan ples we oli singaotem Kumora. Samples 1400 yia afta we Moronae i bin berem ol buk ia, wan boe we i gat 14 yia, we nem blong hem i Josef Smit, i bin prea blong save wijwan jos i bin stretwan. (Luk long Joseph Smith—History 1:5–16.)

  22. Papa long Heven mo Jisas Kraes i bin visitim Josef Smit mo Tufala i bin talem long hem se i no gat wan jos i bin tru mo i bin fulwan. Josef bae i help blong putumbak tru Jos blong Jisas Kraes. (Luk long Joseph Smith—History 1:17–20.

  23. Moronae i bin vitim Josef Smit mo i bin talem long hem abaot ol buk ia we hem i bin berem. Taem Josef Smit bae i kam bigwan, bae hem i go tekem ol buk ia, mo bae i transletem olgeta. (Luk long Joseph Smith—History 1:27–54.

  24. Taem Josef Smit i bin gat 21 yia, hem i bin go long Hil blong Kumora, mo i kasem ol buk ia long ples we Moronae i bin berem olgeta. (Luk long Joseph Smith—History 1:59.

  25. Tru long paoa blong God, Josef Smit i bin transletem ol toktok we oli bin raetem insaed long ol buk ia. Hem i bin pablisim translesen blong hem. Oli singaotem Buk blong Momon. (Luk long taetol pej mo fas toktok blong Buk blong Momon.)

Lef: foto pikja i kam long Robet Kasi; smol pat blong pikja ia Lihae I Stap Travel I Go Kolosap long Red Si, i kam long Gari Smit; Mi Bin Obei long Voes blong Spirit, i kam long Wolta Ren: Lihae mo Liahona, i kam long Josef Briki; Nifae I Stap Tok Strong long Ol Stronghed Brata blong Hem, i kam long Anol Fribeg © 1951 IRI; raet: Lihae mo Pipol blong Hem I Kasem Graon blong Promes, i kam long Anol Fribeg © 1951 IRI; Oli Bin Mekem Nogud Tumas long Mi, i kam long Wolta Ren; Nifae I Stap Raet long Ol Buk we Oli Wokem long Gol, i kam long Pol Man © 1988; Mi Bin Resemap Voes blong Mi blong I Kasem Heven, i kam long Wolta Ren; Stap Mekem Seves blong God, i kam long Wolta Ren; smol pat blong pikja ia Abinadae I Kam long Fored blong King Noa, i kam long Anol Fribeg © 1951 IRI; Kam Joenem Pipol blong God, i kam long Wolta Ren; Alma I Girap, i kam long Wolta Ren; ol peinting we i kam long Wolta Ren oli kam tru long gladhat blong Jos Histri Miusium

Lef: Amon I Difendem Ol Animol blong King Lamonae, i kam long Anol Fribeg © 1951 IRI; Kam, i kam long Wolta Ren, Jos Histri Miusium i glad blong serem; Tu Taosen Yang Man Oli Go long Faet, i kam long Anol Fribeg, Jos Histri Miusium i glad blong serem; Samuel, Man blong Leman I Profesae, i kam long Anol Fribeg © 1951 IRI; Momon I Raetemsot Ol Buk blong Histri, i kam long Tom Lovel © IRI; Mi Nomo, Mi Stap Miwan i kam long Wolta Ren, Jos Histri Miusium i glad blong serem; Moronae I Stap Berem Ol Buk, i kam long Tom Lovel © IRI; Ol Samting we I Kam long Hat blong Mi II, i kam long Wolta Ren; raet: Hem I Girap, i kam long Del Parson; Kraes mo Ol Pikinini blong Buk blong Momon, i kam long Del Parson © 1995; Enjel Moronae I Kamaot long Josef Smit, i kam long Tom Lovel © 2003 IRI; Hil blong Kumora, i kam long Jon MaNoton; Josef Smit I Stap Transletem Buk blong Momon, i kam long Del Parson © 1996 IRI