Weaples Nao Bae Mi Save Faenem Ol Ansa?

Olga Ovkarenko, Serdlok Oblast, Rasia

Taem mi gat 21 yia, ol misinari blong Jos blong Jisas Kraes blong Ol Lata-dei Sent oli bin stap tijim ol Inglis klas long eria blong mi long Rasia. Fastaem, mi bin stap go blong go long ol lanwis lesen, be i no longtaem afta, mi stat blong stap longtaem moa blong harem ol toktok long saed blong spirit we ol elda oli bin stap serem afta long klas, mo blong askem kwestin long olgeta.

Mi bin groap long mama relijin blong kantri blong mi, be mi bin gat fulap kwestin long saed blong relijin we mi no gat ansa long olgeta. Ol misinari mo ol memba blong Jos blong olgeta oli bin gat ol ansa long ol kwestin ia we i no gat wan long bifo i bin save givim we i stretem tingting blong mi.

Afta long wan Inglis klas, mi bin filim se mi gat inaf strong paoa long tingting blong mi, nao mi askem ol misinari blong kasem wan kopi blong buk blong olgeta, Buk blong Momon. Be taem mi kasem haos, mi putum i stap long sef mo no ridim.

I no stap long ples ia blong longtaem. Mi bin harem ol memba blong Jos we oli stap go long Inglis klas oli stap talem se ol skripja oli gat ansa long ol problem. Mekem se taem mi fesem wan jalenj o problem blong miwan, mi tekem Buk blong Momon we i stap long sef mo stat blong ridim. Oltaem, mi faenem ol ansa—kaen ansa we i stap talem stret long mi wanem mi nidim blong save.

Long taem ia mi stat blong filim se mi no save stap mo no gat Jos. Hem i ples we mi wantem stap long hem. Hem i ples ia nao we mi pat long hem.

Be yet, mi bin wantem mekemsua, mo askem God. Problem hem i we mi stap laef long wan smol rum we mi stap serem wetem ona blong haos, we i wan olfala woman, mo i no gat wan praevet ples blong mi blong mi go prea. Be long wan naet, mi go slo long kijin—we i seperet smol long hom—mo askem Papa long Heven sapos Jos i bin tru. Mi kasem wan strong filing olsem ansa, mekem se mi save wanem we mi nidim blong mekem.

I no longtaem afta mi bin baptaes, mo taem blong mi olsem wan memba blong Jos i bin taem we mi moa hapi long laef blong mi. Long taem we bifo mi gat kwestin, naoia mi gat ol ansa. Long ples we bifo mi filim se mi emti, naoia mi fulap.

Mi talem tangkyu se Papa long Heven i no livim yumi nating be i givim ansa. Mi save se bae Hem i toktok long yumi, tugeta tru long prea mo tru long ol skripja.