Mi Putum Promes blong Moronae long Tes

Fransesko Feraresi, Lombardi, Itali

Sam yia i pas, mi bin stap long haos blong wan fren taem mi bin mitim tu yang man we tufala i dresap gud we tufala i talem se oli ol Lata-dei Sent misinari. Mi ting se hem i defren smol we oli aot long Itali i kam blong jenisim laef blong ol pipol we oli biliv finis long Sevya.

Afta, mi bin askem olgeta blong kam long haos blong mi. “Sapos yutufala i wantem, yutufala i save kam blong yumi serem kalja blong yumi,” mi talem. “Be yutufala i no mas ting se bae mi jenisim relijin blong mi.”

Long nekis naet, ol misinari oli bin tokbaot Buk blong Momon. Mi tingting se hemia i defren from se mi neva harem abaot hemia bifo. Mi invaetem tufala i kambak, be afta long nambatu visit, waef blong mi, Ana Maria, i talem se tufala i krangke mo bae hem i aot long haos long taem we mifala i stap storian. Mi tu, mi luk se ol misinari ia oli defren smol, be mi wantem save nomo wanem nao tufala i gat blong talem mo gohed blong stap mit wetem tufala.

Wan naet, taem Ana Maria i kambak hom, hem i bin harem mifala i stap tokbaot mared we i no save finis. Hemia i mekem hem i gat intres, mo mitufala i disaed se bae mifala i statem ol lesen ia tugeta bakegen. Hem i bin save gud long ol skripja mo oltaem, hem i bin gat wan longfala lis blong ol kwestin. Ol elda oli bin ansa sam long ol kwestin ia kwiktaem, be sam kwestin, tufala i mas gobak hom blong lukaotem ol ansa. Evri wik, tufala i no mestem blong kambak wetem ol ansa, mo evri wik, Ana Maria i gat wan nara lis blong ol kwestin.

I no longtaem afta we mifala i bin finisim ol lesen, Ana Maria i bin mekem mi mi sapraes taem hem i bin askem raet long mi, blong hem i kasem baptaes. Mi bin talem long hem se mi no gat eni samting agensem sapos hem i tru blong jenisim laef blong hem. Mi bin go long baptaes blong hem long 5 Maj 1995, mo mi bin harem gud long gudfala filing we i stap long taem blong seves.

Mi bin gohed blong rid plante abaot Jos, mo ol misinari oli bin gohed blong leftemap tingting blong mi. Nao, mi bin disaed blong putum promes blong Moronae long tes (luk long Moronae 10:4–5). Mi bin wantem blong save sapos Buk blong Momon i kam long God o sapos hem i jes wan stori buk nomo.

Wan dei long Jun 1995, mi bin stap miwan long haos; mi nildaon kolosap long bed blong mi mo mi bin askem Papa long Heven, “Buk blong Momon i tru o no, mo sapos i tru, wanem taem nao bae mi mas baptaes?” Wantaem nomo mi bin filim long hat mo maen blong mi wan klia voes we i talem long mi: “Buk blong Momon i tru.” Afta mi bin gat wan klia tingting long wanem taem nao mi mas baptaes. Wan wik afta, mi bin prea bakegen mo mi bin kasem sem ansa. Hat blong mi i fulap wetem glad. Naoia, mi save se God i bin toktok long mi: Buk blong Momon i kam long God mo Josef Smit i wan tru profet.

Nao, long 17 Septemba 1995, mi bin go insaed long wota blong baptaes, wan yia mo haf afta we mi bin stat blong mitim ol misinari. I no longtaem afta, gel blong mitufala, Aba Jiara, i gat intres long Jos mo hem tu, i bin kasem baptaes. Long Jenuware 1997, famle blong mifala i bin sil long Bern Switselan Tempol.

Mifala i save se hemia i tru Jos, we Jisas Kraes i lidim tru long wan profet mo prishud. Mifala i talem tangkyu long Lod from lav blong Hem, blong Hem i lidim mifala long ol misinari, mo from save blong mifala long gospel.