Buk blong Momon:
Wan Witnes long saed wetem Baebol
Blong i go stret wetem loa blong Baebol se “i mas gat tu witnes no tri witnes blong mekem tok ya i stanap” (Seken Korin 13:1), tugeta buk ia, Buk blong Momon mo Baebol, tufala i testifae abaot Jisas Kraes mo tufala i stap tijim ol prinsipol blong gospel blong Hem. Elda Rasel M. Nelson blong Kworom blong Olgeta Twelef Aposol i bin tijim se “ol witnes we oli stap long skripja oli pruvum se tufala buk ia oli tru. Aedia ia, oli eksplenem longtaem finis taem wan profet i bin raetem se Buk blong Momon oli bin ‘raetem samting ia from plan se [oli] save bilivim ol [Baebol]; mo sapos yufala i bilivim [Baebol] ia, bae yufala i bilivim [Buk blong Momon] tu’ [Momon 7:9]. Wanwan buk i tokbaot narawan. Wanwan buk i stap olsem wan pruf se God i stap laef mo i stap toktok long ol pikinini blong Hem tru long revelesen we i go long ol profet blong Hem.”1
Andanit ia, i gat wan lis blong ol stamba doktrin we oli tijim long Baebol we Buk blong Momon i stap olsem wan moa witnes blong hem.
Misin blong Jisas Kraes
Baebol mo Buk blong Momon, tufala i testifae abaot Jisas Kraes, Pikinini blong God, mo abaot Atonmen blong Hem. Tufala i tijim se Sevya i bin tekem long Hem ol sin blong yumi mo i bin winim ded.
Wan Stret Pikinini Ia Nomo blong God
“God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis” (Jon 3:16; luk tu long Matiu 16:16; Jon 6:69).
Buk blong Momon: “Mi save se Jisas Kraes bae i kam, yes, Pikinini, Wan Pikinini Nomo blong Papa, we i gat fulap gladhat, mo sore, mo trutok.” (Alma 5:48; luk tu long 1 Nifae 11:16–21; Mosaea 3:5–8).
I Bin Pemaot Ol Sin blong Yumi
Baebol: “From we hemia blad blong mi, we i blong mekem promes blong God i stanap. Blad blong mi bambae i ron blong tekemaot ol sin blong plante man” (Matiu 26:28; luk tu long Hibrus 9:28; Fas Pita 3:18).
Buk blong Momon: “Luk, hem i givim hemwan bakegen wan sakrifaes blong sin, blong mekem wanem we loa i askem long olgeta we i gat wan hat we i fulap wetem sore mo wan spirit we i wantem blong sakem sin” (2 Nifae 2:7; luk tu long 1 Nifae 11:33; Alma 34:8–10; 3 Nifae 11:14).
I Tekem Ol Samting we Yumi Harem Nogud long Hem
Baebol: “Olgeta samting we i stap mekem yumi harem nogud, hem i karem olgeta evriwan” (Aesea 53:4; luk tu long Hibrus 2:18).
Buk blong Momon: “Mo bae hem i go aot, i harem nogud long ol soa blong bodi mo fulap hadtaem mo temtesen blong evri kaen; … mekem se hem i save, long saed blong bodi blong mit mo bun, olsem wanem blong helpem ol man blong hem long saed blong ol samting blong olgeta we oli no strong long hem” (Alma 7:11–12; luk tu long Mosaea 14:3–5).
I Bin Winim Ded
Baebol: “Kraes ya, God i mekem hem i laef bakegen finis. Long olgeta we oli ded finis, hem i faswan we i laef bakegen. Hem i olsem fas kakae ya we i rere long garen” (Fas Korin 15:20; luk tu long Jon 14:19; Ol Wok 26:23).
Buk blong Momon: “Biliv long Jisas Kraes, se hem i Pikinini blong God, mo we ol Jiu i bin kilim hem i ded, mo tru long paoa blong Papa, hem i bin girap bakegen, tru long samting ia hem i bin kasem win ova long gref” (Momon 7:5; luk tu long Mosaea 16:7–8; Hileman 14:17).
Plan we God I Gat long Yumi
Baebol mo Buk blong Momon, tufala i tijim se God i Papa blong yumi long Heven. From hemia, Hem i bin mekem rere wan “plan blong fasin blong sevem man” (Alma 24:14) we tru long plan ia, bae Atonmen blong Jisas Kraes i sevem yumi.
Wan Papa we I Stap long Heven we I Gat Lav
Baebol: “From we yumi joen long God nomo, yumi gat laef, yumi stap wokbaot, mo yumi stap mekem evri samting. Mo i olsem we wan man blong yufala we i stap raetem singsing i talem finis se, ‘Yumi tu i pikinini blong hem’” (Ol Wok 17:28; luk tu long Ol Sam 82:6; Hibrus 12:9).
Buk blong Momon: “Mi save se [God] i lavem ol pikinini blong hem” (1 Nifae 11:17; luk tu long 1 Nifae 17:36).
Ded mo Spirit Wol
Baebol: “Bodi blong yumi bambae i gobak long graon, mo laef ya we God i givim long yumi, bambae i gobak long hem bakegen” (Prija 12:7; luk tu long Fas Pita 3:19–20; 4:6).
Buk blong Momon: “Ol spirit blong evri man, sapos oli gud o nogud, bae oli gobak long God we i bin givim laef long olgeta” (Alma 40:11; luk tu long ol ves 12–14).
Laef Bakegen long Ded
Baebol: “Nating we sik i spolem skin blong mi finis, be long bodi ya blong mi, bambae mi mi luk hem” (Job 19:26; luk tu long Esekiel 37:12; Fas Korin 6:14; 15:54).
Buk blong Momon: “Mi save se yufala i save we bae bodi blong mit mo bun blong yumi i mas kam roten mo ded; be, long ol bodi blong yumi bae yumi luk God” (2 Nifae 9:4; luk tu long 2 Nifae 9:12; Alma 11:43–45; 40:23).
Ol Komanmen Oli Stap Olsem Wan Gaed
Baebol i stap tijim se God i bin givim ol komanmen mo bae i blesem yumi taem yumi obei. Ol profet blong Buk blong Momon oli bin raetemdaon mo bin stap folem tu olgeta komamnen.
Ol Blesing blong Fasin blong Stap Obei
Baebol: “Nao hem i talem strong long mifala se yumi mas obei long olgeta loa ya blong hem, mo yumi mas tinghevi long hem, yumi mas onagud long hem. Mo sipos yumi stap mekem olsem, hem bambae i lukaot gud long … yumi … Mo sipos yumi mekem tingting blong yumi i strong blong obei long olgeta samting ya we hem i talem, hemia i min se yumi stap mekem i stret long fes blong hem” (Dutronome 6:24–25; luk tu long Ol Proveb 4:4; Jon 14:21).
Buk blong Momon: “Hem i bin promes long yufala se sapos yufala i holem ol komanmen blong hem, bae yufala i kam antap gud long graon; mo hem i neva jenisim wanem we hem i bin talem; taswe, sapos yufala i holem ol komanmen blong hem, hem i stap blesem yufala mo mekem yufala i kam antap gud” (Mosaea 2:22; luk tu long 2 Nifae 1:20).
Ol Ten Komanmen
Baebol: Lod i bin talemaot Ol Ten Komanmen long Moses (luk long Eksodas 20:1–17).
Buk blong Momon: Abinadae i bin tijim Ol Ten Komanmen long ol pris blong King Noa (luk long Mosaea 12:33–36; 13:12–24).
Taeting
Baebol: “Yufala i mas tekem olgeta taet blong yufala i kam long haos blong mi, blong bambae i save gat plante kakae long hem” (Malakae 3:10; luk tu long Levitikas 27:30).
Buk blong Momon: “Mo hem i semfala Melkisedek ia we long hem Ebraham i bin pem taeting; yes, we hem i papa blong yumi Ebraham, hem i bin pem wan ten long evri samting we hem i bin gat olsem taeting blong hem” (Alma 13:15; luk tu long 3 Nifae 24:8–10).
Baptaes mo Tabu Spirit
Baebol: “Tru mi talem long yu, sipos man i no bon long wota mo long Tabu Spirit, bambae hem i no save kam we God i King blong hem” (Jon 3:5; luk tu long Mak 16:16; Ol Wok 2:36–38).
Buk blong Momon: “Sakem sin, yufala evriwan long evri en blong wol, mo kam long mi mo kasem baptaes long nem blong mi, blong yufala i save kam klin taem we yufala i kasem Tabu Spirit, blong yufala i save stanap mo no gat mak long fored blong mi long las dei” (3 Nifae 27:20; luk tu long 2 Nifae 9:23; 31:5–9).
Jos blong Jisas Kraes long Taem blong Bifo
Lod i bin stanemap Jos blong Hem long Jerusalem mo long ol Amerika. Baebol mo Buk blong Momon oli ol witnes se Hem i bin oganaesem mo i bin lidim ol pipol blong Hem tru long ol profet mo ol aposol.
Ol Profet
Baebol: “Hae God i Masta blong yumi, mo ol profet oli man blong wok blong hem, mo oltaem, sipos hem i wantem mekem wan samting, hem i stap soemaot ol plan blong hem fastaem long olgeta” (Amos 3:7; luk tu long Jeremaea 1:7; 7:25).
Buk blong Momon: “Tru long Spirit evri samting i kam long save blong ol profet,” (1 Nifae 22:2; luk tu long Jekob 4:4–6).
Olgeta Twelef
Baebol: “Hem i singaot ol man blong hem oli kam long hem. Nao hem i jusumaot twelef man long olgeta, mo i givim nem long ol twelef man ya, se aposol” (Luk 6:13; luk tu long Efesas 2:19–20; 4:11–14).
Buk blong Momon: “Bae yufala i kasem blesing sapos yufala i biliv long mi mo kasem baptaes, afta we yufala i bin lukim mi mo save se mi stap” (3 Nifae 12:1; luk tu long 1 Nifae 11:29).
Prishud Atoriti
Baebol: “Yufala i no jusumaot mi. Mi mi jusumaot yufala, mo mi putumap yufala blong yufala i go mekem wok, mo blong wok blong yufala i save karem frut, we frut ya i blong stap longtaem” (Jon 15:16; luk tu long Matiu 16:19; Luk 9:1–2; Hibrus 5:4).
Buk blong Momon: “[Alma] i bin putum han blong hem long hed blong olgeta folem oda blong God, blong lidim mo lukaotem jos” (Alma 6:1; luk tu long 2 Nifae 6:2; Moronae 3).
Sam Moa Stadi
Jat ia i no wan ful lis. Olsem pat blong skripja stadi blong yuwan o blong famle, yu save ademap ol nara skripja long jat ia mo stap lukaotem moa topik blong prinsipol we oli tijim, tugeta, long Buk blong Momon mo long Baebol. Yu save mekem hemia taem yu yusum Topical Guide (Topik Gaed) o Guide to the Scriptures (Wan Gaed blong luk Ol Skripja), mo tu, ol stadi tul we yu save faenem long intanet long scriptures.lds.org.
Pikja blong fes blong Harol B. Li we i kam long Doel So, Jos Histri Miusium i glad blong serem