E Dua Na Cakacaka Vakalou
A vakarogoca vagumatua sara o koya na veika keirau a vakavulica tiko. Ia na cava a sega kina ni taura na iVola i Momani niu sa solia vua?
E dua na yakavi keirau a gole yani kei noqu itokani daukaulotu ka laki tukituki sara ena katuba ni dua na cauravou e gole mai vakavuli ki Igiladi ena dua na vei ira na univesiti e Lodoni. A sureti keirau sara i loma, ka keirau vakamacalataka ni keirau daukaulotu ni Lotu i Jisu Karisito ni Yalododonu Edaidai. Ka vaka me maqusa sara o koya me vulica na veika ni kosipeli Vakalesuimai, ka keirau vakadinadinataki Parofita Josefa Simici ka tukuna vua na ivola vakalou e solia mai na Tamada Vakalomalagi e vakatokai na iVola i Momani. Keirau a qai vakamatatataka ni sa vakalou baleta ni vakadinadinataki Jisu Karisito.
Keirau a vakamacalataka ni sa rawa me kila vakai koya na kena sa dina ka solia vua e dua na kena ilavelave. Niu sa solia vua na iVola i Momani, a tucake ka gole tani mai na rumu ka sega ni tukuna e dua na ka. Au sa qai taura tu ga na iVola i Momani, ka keirau sega ni vosa ka veiraici ena kidrowa, ka vakasamataka na cava me keirau cakava. Au sa qai biuta tu na ivola ena teveli.
Keirau raici koya sara yani e valenikuro ni sa vuluvulu tiko ka tauwelutaka sara na ligana. A lesu mai ki na rumu ka tomika cake na iVola Momani ka kaya, “O ira na wekaqu era dau vuluvulu ni bera ni ra tara e dua na ka vakalou.” E turu na wainimataqu niu sa raici koya na cauravou oqo ni sa dolava ena imatai ni gauna na iVola i Momani ka cega na kena draunipepa ena ligana savasava.
E vakavulica o Alama ni ra sa ka vakalou na ivolanikalou ka sa ra maroroi tu mera vakabulai kina na tamata. A kaya kina vei luvena o Ilamani, “Sa lesi iko na Kalou mo maroroya vinaka na ivola tukutuku oqo, ni sa ka tabu, ia ena taqomaka ko Koya, me vakayacori kina na nona inaki, mera kila na nona ivakavuvuli ko ira na itabatamata mai muri” (Alama 37:14).
Au a laki kaulotu meu laki vakavulica na kosipeli vakalesuimai i Jisu Karisito, ia au sa laki vakavulici mai vei koya na cauravou oqo ena vuku ni ligana savasava. E vuqa na itovo vakavanua—oka kina oi au—e sega sara ni gadrevi me da vuluvulu meda qai wilika na ivolanikalou, ia na ivakaraitaki rawarawa oqo ni veidokai sa dua dina na veivakadeitaki kaukauwa ka rokovi baleta ni sa vakalou na iVola i Momani.
Vakaraitaki ni itaba mai vei Simon Jones