Na iVola i Momani
E rau iVakadinadina vata kei na iVolatabu
Me salavata ga kei na lawa vaka ivolatabu ni “na vakadinadinataki na vosa kecega ena gusu ni ivakadinadina e lewe rua se lewe tolu” (2 Korinica 13:1), o irau ruarua na iVola i Momani kei na iVola Tabu erau vakadinadinataki Jisu Karisito ka rau vakavulica na ivakavuvuli ni Nona kosipeli. O Elder Russell M. Nelson ena Kuoramu ni iApositolo Le Tinikarua e vakavulica ni “rau veivakadinadinataki ga na ivolanikalou. Na ivakavuvuli oqo e a sa vakamacalataki makawa sara ena nona a vola e dua na parofita ni iVola i Momani e a ‘volai me rawa ni ko na vakabauta na [iVola Tabu]; ia ni ko sa vakabauta na [iVola Tabu] ko na vakabauta talega’ [na iVola i Momani]’ [Momani 7:9]. Erau veitukutukuni tikoga na ivola e rua oqo. Erau tukuna tiko na ivola oqo ni bula dina tiko na Kalou ka vosa tiko vei ira na luvena ena ivakatakila vei ira na Nona parofita.”1
Sa koto oqo era e so na ivakavuvuli e vakavulica na iVola Tabu ka vakadinadinataka tiko na iVola i Momani.
Na Veisorovaki i Jisu Karisito
Na iVola Tabu kei na iVola i Momani erau vakadinadinataki Jisu Karisito ni Luve ni Kalou kei na Nona Veisorovaki. Erau vakavulica ni a colata na noda ivalavala ca ka vakamalumalumutaka na mate, na iVakabula.
Na Luve ni Kalou e Duabau
A iVolatabu: “Ni sa lomani ira na kai vuravura vakaoqo na Kalou, me solia kina na Luvena e duabauga sa vakatubura, me kakua ni rusa ko ira yadua era sa vakabauti koya me ra rawata ga na bula tawamudu” (Joni 3:16), raica talega Maciu 16:16; Joni 6:69).
iVola i Momani: “Au kila ni na lako vakaidina mai ko Jisu Karisito na Luvena e Duabauga na Tamada raica sa sinai ena loloma kei na dina.” (Alama 5:48; raica talega na 1 Nifai 11:16–21; Mosaia 3:5–8).
Bokoca na Noda iValavala Ca
Ai Vola Tabu: “Oqo na noqu dra ni veiyalayalati vou, sa liviraki e vukudra e lewe vuqa me bokoci na ivalavala ca” (Maciu 26:28; raica talega na Iperiu 9:28; 1 Pita 3:18).
iVola i Momani: “A sa vakacabori koya me isoro ni ivalavala ca, me vakayacori kina na ka sa tukuni ena vunau vei ira sa yaloraramasumasu ka bibivoro” (2 Nifai 2:7; raica talega na 1 Nifai 11:33; Alama 34:8–10; 3 Nifai 11:14).
Colata na Noda Rarawa
Ai Vola Tabu: “E dina sa colata ko koya na noda rarawa ka sa colata na rarawa ni lomada” (Aisea 53:4; raica talega na Iperiu 2:18).
iVola i Momani: “Ia, ena mai vunau voli ko Koya, mena vosota na ka rarawa, na veivakararawataki, kei na veivakatovolei kecega; … me kila kina na nodra malumalumu na nona tamata, ka vakabulai ira ena nona yalololoma” (Alama 7:11–12; raica talega na Mosaia 14:3–5).
Vakamalumalumutaki mate
Ai Vola Tabu: “Ia sa qai tucake tale mai na mate na Karisito, a sa yaco me kedra isevu era sa moce tu” (1 Korinica 15:20; raica talega na Joni 14:19; Cakacaka 26:23).
iVola i Momani: “Dou vakabauta ni sa iJisu Karisito na Luve ni Kalou, ka ra a vakamatei Koya na Jiu ka sa tucake tale ena kaukauwa i Tamada a sa vakamalumalumutaka na ibulubulu ka sa guce vua ko mate” (Momani 7:5; raica talega na Mosaia 16:7–8; Ilamani 14:17)
iTuvatuva ni Kalou Baleti Keda
E vakavulica na iVola Tabu kei na iVola i Momani ni Kalou e Tamada Vakalomalagi. Ni vaka o ya, Sa vakarautaka tu o Koya na “yavu ni veivakabulai” (Alama 24:14) e ke ya eda na vakabulai kina ena Veisorovaki i Jisu Karisito.
Tamada Vakalomalagi Dauloloma
Ai Vola Tabu: “Ni da sa bula vei koya, ka yavala, ka rawata mai vua na noda bula, me vaka talega sa kaya ko ira na nomudou dau-ni-vucu eso, Sa nona kawa talega koi keda” (Cakacaka 17:28; raica talega na Same 82:6; Iperiu 12:9).
iVola i Momani: “Au sa kila ni [Kalou]sa lomani ira na luvena” (1 Nifai 11:17; raica talega na 1 Nifai 17:36).
Na Mate kei na Vuravura ni Yalo
Ai Vola Tabu: “Sa na qai lesu na kuvu ni qele me qele tale me vaka e liu, ia na yalo ena lesu vua na Kalou ko koya sa solia” (Na Dauvunau 12:7; raica talega na 1 Pita 3:19–20; 4:6).
iVola i Momani: “Sa na kau na yalo ni tamata kecega se vinaka se ca kina vanua sa vakarautaka vei ira na Kalou o koya ka a buli ira” (Alama 40:11; raica talega na tikina e 12–14).
Tucaketale
Ai Vola Tabu: “Ia, ni sa rusa sara na kuliqu oqo, kau na kunea ga na Kalou ena yagoqu” (Jope 19:26; raica talega na Isikeli 37:12; 1 Korinica 6:14; 15:54).
iVola i Momani: “Au kila ni dou sa kila ni na rusa vakaidina na yagoda oqo; ia ena yagoda ga oqo eda na raica kina na Kalou” (2 Nifai 9:4; raica talega na 2 Nifai 9:12; Alama 11:43–45; 40:23).
Na iVakaro ena Veidusimaki
E vakavulica na iVola Tabu ni Kalou sa solia na ivakaro ka na vakalougatataki keda ni da muria.O ira talega na parofita ni iVola i Momani ra vola na ivakaro ka talairawarawa kina.
Kalougata ni Talairawarawa
Ai Vola Tabu: “A sa vakaroti keda ko Jiova meda cakava na ilesilesi kecega oqo, meda rerevaki Jiova na noda Kalou me yacovi keda tikoga na ka vinaka ka me vakabulai keda. … Ia na ka oqo eda na dodonu kina ni da sa vakabauta ka cakava na ivakaro kecega oqo” (Nai Vakarua 6:24–25; raica talega na Vosa Vakaibalebale 4:4; Joni 14:21).
iVola i Momani: “A sa yalataka tu ko koya ni ko ni na tiko sautu ena vanua oqo, kevaka ko ni sa muria na nona ivunau ka sa dau vakayacora ko koya na ka sa vosataka, ia kevaka ko ni sa muria na nona vunau ena vakalougatataki kemuni ka vakasaututaki kemuni” (Mosaia 2:22; raica talega na 2 Nifai 1:20).
Na Vunau e Tini
Ai Vola Tabu: A solia na iVunau e Tini na Kalou vei Mosese (raica na Lako Yani 20:1–17).
iVola i Momani: E a vakavulica o Apinatai na iVunau e Tini vei ira na bete nei Tui o Noa (raica na Mosaia 12:33–36; 13:12–24).
iKatini
Ai Vola Tabu: “Dou kauta kece mai na isigana kina lololo me so kina na kakana ena noqu vale” (Malakai 3:10; raica talega na Na Vunau ni Soro 27:30).
iVola i Momani: “Ia, sa iMelikiseteki ga oqo e dau solia vua ko Eparaama na nona ikatini, ia sa solia vua na tamada ko Eparama na ikatini ni ka kecega” (Alama 13:15; raica talega na 3 Nifai 24:8–10).
Papitaiso kei na Yalo Tabu
Ai Vola Tabu: “Kevaka sa sega ni sucu e dua ena wai kei na Yalo Tabu, ena sega ni curu rawa kina matanitu ni Kalou” (Joni 3:5; raica talega na Marika 16:16; Cakacaka 2:36–38).
iVola i Momani: “Dou veivutuni oi kemudou kecega na kai vuravura, dou lako mai vei au ka papitaisotaki ena yacaqu, io mo dou vakasavasavataki ena isolisoli ni Yalo Tabu, mo dou savasava kina e mataqu ena siga mai muri” (3 Nifai 27:20; raica talega na 2 Nifai 9:23; 31:5–9).
Na Lotu i Jisu Karisito ena Veigauna e Liu
E a tauyavutaka na Turaga na Nona Lotu mai Jerusalemi vakakina mai Amerika. Erau vakadinadinataka na iVola i Momani kei na iVola Tabu ni o Koya e a vakayavutaka ka liutaki ira na Nona tamata ena veiliutaki ni parofita kei na iapositolo.
O Ira na Parofita
Ai Vola Tabu: “E dina ena sega ni vakayacora e dua na ka na Turaga ko Jiova, ena vakaraitaka mada ga na nona vosa vuni vei ira na nona italatala na parofita” (Emosi 3:7; raica talega na Jeremaia 1:7; 7:25).
iVola i Momani: “Sa dau vakaraitaka na Yalo Tabu vei ira na parofita na ka kecega” (1 Nifai 22:2; raica talega na Jekope 4:4–6).
Na Le Tinikarua
Ai Vola Tabu: “A sa kacivi ira na nona tisaipeli ka sa digitaki ira e lewe tinikarua mai vei ira a sa vakatokai ira me iapositolo” (Luke 6:13; raica talega na Efeso 2:19 –20; 4:11–14).
iVola i Momani: “Dou sa kalougata kevaka dou sa muria na nodra vosa na lewe tinikarua kau sa digitaka oqo mera qaravi kemudou” (3 Nifai 12:1; raica talega na 1 Nifai 11:29).
Dodonu ni Matabete
Ai Vola Tabu: “Dou sa sega ni digitaki au ia kau sa digitaki kemudou ka lesi kemudou mo dou lako ka vua ka me tiko talega na vuamudou” (Joni 15:16; raica talega na Maciu 16:19; Luke 9:1–2; Iperiu 5:4).
iVola i Momani: “[Alama] sa lesi ira na bete kei na italatala qase me vaka na ilesilesi ni Kalou; a sa tabaki ira e ligana mera veiliutaki ka ivakatawa ni lotu” (Alama 6:1; raica talega na 2 Nifai 6:2; Moronai 3).
iKuri ni Vuli
Na lisi qo e sega ni taucoko sara tu. Me tiki ni nomu vulica na ivolanikalou, ko sa na rawa ni vakuria ena ituvatuva oqo ka vaqara tale e so na ivakavuvuli ka vakavulici tu ena iVola i Momani kei na iVola Tabu ena vakayagataki ni iDusidusi kina Ulutaga se iDusidusi kina iVolanikalou, vakakina na ena initaneti scriptures.lds.org.
Na Droini kei Harold B. Lee mai vei Doyle Shaw, iloloma ni Church History Museum