Na Parofita o Josefa Simici

Na Dauvakavakadewa ni iVola i Momani

Na iVola i Momani e dua na ivola duatani sara ni ivolanikalou. E dina ni ra a vola na parofita ni gauna makawa, a sega ni yaco mai vei keda me vaka na iVolatabu. Na iVolatabu a dui maroroi tu na kena ivola yadua ena ivolavivigi ena Vuravura Makawa ka ra dau lavetaka na liganivolavola ena veisenijiuri. Ena ikava ga ni senijiuri ni oti o Jisu Karisito era a qai cokoti vata na ivola duidui oqori ka vakarautaki ena dua ga na ivola ka da sa vakatoka me iVolatabu.

E duidui na iVola i Momani, ni ra a vola na parofita ni gauna makawa ena Vuravura Vou ena veipeleti kaukamea, ka qai semata vata e dua na parofita—o Momani (me vaka na yacana)—ena ikalima ni senijiuri a.d. ena dua ga na kena itukutuku ena peleti koula. E muri a qai buluta o Moronai, na luvena tagane, na peleti ena vanua a tu kina me yacova na yabaki 1827, na gauna a qai rairai mai kina o Moronai ni sa tucaketale ka mai solia vua e dua na cauravou na yacana o Josefa Simici.

A qai tarava mai na italanoa ni nona ciqoma, vakadewataka, ka tabaka o Josefa na itukutuku sa kilai tu oqo me iVola i Momani: E Dua Tale na iVakadinadina kei Jisu Karisito. E vakadinadinataka sara ga na iVakabula vakataki Koya ni dina na ivola oqo (raica na V&V 17:6).

1. Ena 1820 a vakatikotiko kina e Palmyra mai Niu Ioka e dua na cauravou yabaki 14 ka yacana o Josefa Simici. E dina ni se gone ga, a dau kauwaitaka vakalevu na kena ituvaki vua na Kalou, e vakavuna vua na veilecayaki na nodra dau vaqara tamata yani me ra curu ena nodra vakabauta na veimatavakabauta Vakarisito ka ra dau vakacala kina na nodra ile eso tale. Ni vakauqeti ena veika e vulica mai na iVolatabu, sa mani lewa kina o Josefa me vakasaqara na vuku ena nona kerekere vua na Kalou, o koya “sa solia vakalevu kivei ira kecega na tamata, a sa sega ni dauveivakadirideini, ka na soli ga vua” (Jemesa 1:5). A lako ki na dua na veikau voleka ki na nodratou vale me masu kina.

2. Ni tekiduru o Josefa me masu, a lutuki koya e dua na rarama. A raica e loma e rua na Tamata. A vosa na Tamada Vakalomalagi ka kaya, “Oqo na noqu Gone ni Toko. Mo Rogoci Koya! Josefa Simici—Ai Tukutuku 1:17) E tukuna vei Josefa na Turaga me kakua ni curu ki na dua vei ira na lotu oqori baleta ni sega ni dua vei ira e dina, ia a yalataki vua “ni na qai vakatakilai vua ena dua na gauna e muri na taucoko ni Kosipeli.”¹

3. Sa sivi yani e tolu na yabaki, sa dau wasea tiko kina o Josefa Simici na veika a sotava—ka vakacacani kina. A qai tukuna kina: “E dina niu sa mai sevaki ka vosa vakacacani ena noqu tukuna na kena itukutuku, ena sega ga ni vakalasui kina na ka au a raica; ia … au a yalo vakacegu ga ka kaya lo e lomaqu: A cava meu vosa vakacacani kina niu sa tukuna na ka dina? Au a raica dina e dua na raivotu; ko cei koi au meu cakitaka na Kalou, a cava era sa vinakata kina na kai vuravura meu cakitaka na ka a vakatakilai vei au? Io au a raica dina e dua na raivotu; au sa kila na ka oqori, kau kila ni sa kila talega na Kalou, sa dredre sara meu cakitaka” (Josefa Simici—Ai Tukutuku 1:25).

4. Ena ika 21 ni Sepiteba, 1823, a masu tiko o Josefa ena gauna a vakasinaiti kina na nona rumu ni moce e cake ena rarama ka rairai mai e dua na agilosi na yacana ko Moronai. A tukuna vei Josefa o Moronai na nodra volavola eso na parofita makawa. Na ivolatukutuku oqori, ka ceuti tu ena peleti koula, e bulu tu ena dua na delana voleka ga. A tukuni vei Josefa me na vakadewataka o koya na itukutuku oqori.

5. Kena itinitini, ena ika 22 ni Sepiteba, 1827, sa soli kina vei Josefa na veipeleti oqori, a laveta mai na dua na kato vatu ka bulu tu ena ruku ni dua na vatu levu ena dua na delana volekati Palmyra e Niu Ioka.

6. A sega soti ni vuli vinaka sara o Josefa Simici me vaka ni matau tu oqori ena veikoro yawa mai tauni ena gauna oya. A vakarautaka vua na Kalou e dua na iyaya ni vakavakadewa ka vakatokai na Urimi kei na Cumimi me vukea na nona vakavakadewa. A vakalougatataki talega mai vei ira na liganivolavola ka ra dau vola na veika e cavuta ena nona vakavakadewa. Eratou a nona liganivolavola o Emma na watina; Martin Harris, e dua na dauteitei vuavuai vinaka; kei Oliver Cowdery, e dua na qasenivuli. A mai vakacavari na iwase levu ni cakacaka ni vakavakadewa ni oti ga e tolu na vula mai na gauna e tekivu qarava kina o Oliver na itavi vakaliganivolavola.

   A vakamacalataka o Emma na veika a sotava ena nona veiqaravi vakaliganivolavola vei Josefa: “E sega ni dua na tamata e rawa ni cavuta tikoga mai gusuna na veika me volai vakavo kevaka e vakauqeti kina; ena gauna au nona liganivolavola tiko kina, ena dau cavuta tiko mai vei au o [Josefa] ena vica vata na auwa na ka me volai; ni oti mai na kana, se ni oti e dua na ka curukoso, ena tekivu sara ga mai na vanua e mai yaco toka kina, ka sega mada ga ni bau raica na veika sa volai tu se me wiliki yani vua.”²

   E vakamacalataka o Josefa na bibi ni kena yaco mai na iVola i Momani: “Ena kaukauwa ni Kalou au vakadewataka kina na iVola i Momani mai na matanivola iyaloyalo, ka sa mai yali yani e vuravura na kena kilai, au a tu duadua ena gauna vakasakiti oya, e dua na cauravou sega ni vuli, meu vorata na vuku vakavuravura kei na lecaika ni tinikawalu na senijiuri, ena dua na ivakatakila vou.”³

7. Ena loma ni 18 na vula a tu kina vua na peleti, e sega ni o Josefa duadua ga a raica se tara. E tolu na turaga—o Oliver Cowdery, David Whitmer, kei Martin Harris—eratou a vakadinadinataka vakaivola ni a vakaraitaka vei iratou o Moronai na agilosi, na veipeleti koula ka ratou kila ni a “vakadewataki ena isolisoli kei na kaukauwa ni Kalou,” na veipeleti oya, “ni sa kaya vei keitou na domona.” E walu tale na turaga eratou vakadinadinataka talega ni ratou sa raica ka tara na peleti koula.⁴

8. Ena Okosita ni 1829, sa cakava kina o Josefa na konitaraki kei Egbert B. Grandin, na dautabaivola e Palmyra, Niu Ioka, me taba na voliumu. A mokititaka na nona vanua ni teitei o Martin Harris me saumi kina na kena taba na ivola, ia ena ika 26 ni Maji, 1830, sa vakarau volitaki tu kina na iVola i Momani.

9. Ena ika 6 ni Epereli, 1830, era a soqoni vata kina e rauta ni 60 na tamata ena dua na valetolonikau mai Fayette e Niu Ioka. E kea, me vaka na veidusimaki ni Turaga o Jisu Karisito, a tauyavutaka kina o Josefa Simici na nona Lotu na iVakabula, a vakalesui mai me vaka na kena a tauyavutaki taumada ka ra liutaka na iapositolo kei na parofita, ka ra vakadonui me ra vosa ena vukuna na Kalou. Ena ivakatakila a qai soli mai muri vei Josefa Simici a qai vakayacani kina na Lotu: Na Lotu i Jisu Karisito ni Yalododonu Edaidai (raica na V&V 115:4).

iDusidusi

1. Josefa Simici, ena Hisory of the Church, 4:536.

2. Veivakatarogi vata kei Emma Smith mai vei Joseph Smith III, Fepe. 1879, ena Saints’ Herald, 1 ni Okot., 1879, 290.

3. Nodra iVakavuvuli na Peresitedi ni Lotu: Josefa Simici (2007), 60.

4. Raica na “Na Nodratou iTukutuku na iVakadinadina e Lewe Tolu” kei na “Nodratou iTukutuku na iVakadinadina e Lewe Walu,” ena i tekivu ni iVola i Momani.

Me tekivu mai na 1830 e milioni na tamata era sa wilika na iVola i Momani ka ra lewena na Lotu i Jisu Karisito ni Yalododonu Edaidai me baleta na ivakadinadina ni iVakabula ena iVola i Momani. Sa ivakadinadina talega na ivola oqo ni parofita ni Kalou o Josefa Simici ka ni liutaka tiko na iVakabula na Nona Lotu nikua. E milioni na tamata era sa vakatovolea ka vakadinata na yalayala nei Moronai vei ira kece era vakasaqara mai vu ni yalodra na dina: “Mo dou kerea vua na Kalou na Tamada Tawamudu ena yaca i Karisito, me vakatakila vei kemudou se dina se sega; ia kevaka dou sa kerea ena yalodina ena lomamudou taucoko ka vakabauta na Karisito, ena vakatakila vei kemudou ko koya, ena kaukauwa ni Yalo Tabu ni sa dina” (Moronai 10:4).

Mai na imawi: Brother Joseph, mai vei David Lindsley © 1998; Joseph Smith Seeks Wisdom from the Bible, mai vei Dale Kilbourn © 1975 IRI; Joseph Smith’s First Vision, mai vei Greg Olsen, me kakua ni lavetaki; iyaloyalo ni vanua mai na Joseph Smith: Prophet of the Restoration, mai vei Matthew Reier © IRI

Mai na imawiThe Angel Moroni Appears to Joseph Smith, mai vei Tom Lovell © 2003 IRI; iyaloyalo ni vanua mai na Joseph Smith: Prophet of the Restoration, mai vei Matthew Reier © IRI; iyaloyalo ni vanua mai na Joseph Smith: Prophet of the Restoration, mai vei John Luke © IRI; By the Gift and Power of God, mai vei Simon Dewey; matailalai ni droini mai vei William Maughan © 1998; iyaloyalo mai vei Craig Dimond © IRI; iyaloyalo mai na Joseph Smith: Prophet of the Restoration, mai vei Matthew Reier © IRI