Kevaka O Gadreva Dina Mo Kila, Ko na Kila Vakaidina

Mai vei Elder Walter F. González

Ena Mataveiliutaki ni Vitusagavulu

Sa tawamudu na noqu vakavinavinakataka na iVola i Momani. Sa veisautaka vakadua na noqu bula, kau kila ni sa rawa me veisautaka na nomu bula.

Au a yabaki 18 ena gauna au a lewena kina na Lotu. Ea iusutu ni noqu saumaki mai na iVola i Momani. Ena gauna o ya, au a vakasaqara tiko kina na veivakasama vou me matata kina vei au na veika ni vuravura sa wavoliti au tu. Au vakasamataka lesu na nodra veivakavulici na parofesa e noqu koronivuli ena veika e kilai vakayago. Au sa tekivu meu goleva na vakasama vakatamata baleta na kena bula tiko na Kalou.

E dua na siga au raica sara e dua na ivola karakarawa rau a biuta tu mai e rua na daukaulotu e neitou vale ena ono na yabaki sa oti. Oqo e dua na iVola i Momani. A tiko vata kei na ivola oqo e dua na tikidua baleti Parofita Josefa Simici vakakina eso na ivakasala baleta na ivakarau ni masu vua na Kalou.

Au sa tekivu wilika sara na iVola i Momani. Au se qai wilika ga e vica na tiki ni ivola oqo, ena 1 ni Nifai, au sa vakila e dua na ka. Sa tekivu me veiba na yaloqu kei na noqu kila-ka. Au sa qai mani masu vua na Kalou.

Oqo na isevu ni gauna meu masu niu tekiduru. Na veika a yaco vei au sa dua vei ira na gauna vakalou duadua ki na noqu bula. Sa vakasinaiti au e dua na yalomarau e cecere niu sa mai kila e yaloqu ni iVola i Momani e sega walega ni dua na ivola. Oqo na ivola sa vu mai vakalou. Sa dodonu me vosa ni Kalou. E muri au sa qai mai kila kina vakavinaka ni o ya na Yalotabu sa tukuna tiko vei au na ka dina.

Eso beka ena tautauvata na veika a yaco vei ira, ia e tiko eso tale na sala me na kila e dua ni sa dina na iVola i Momani.

O Na Kila Vakacava?

1. Eso era na kila ena veika era rogoca. O na rairai dua beka vei ira era rogoca na veika e rogoca na veika e vakavulica na ivola. E tukuni ena ivola i Momani e udolu era a rogoca na nodratou vakavulica na luvei Mosaia na kosipeli i Jisu Karisito ka ra “sa saumaki vua na Turaga” (raica na Alama 23:5–6). Edaidai era sa vakatavulica tiko na daukaulotu na kosipeli vata ga o ya ena iVola i Momani. Eso era na kila ni iVola i Momani sa vosa ni Kalou ena nodra wasea eso na kena ivakavuvuli.

2. Eso era na kila ena nodra wilika. Sa rawa talega mo oka kei ira era kila ena nodra wilika na iVola i Momani ni ra sa gadreva mera kila. A yaco oqori vei watiqu. Se qai yabaki 12 o koya a muria na ivakasala me wilika tasevu na ivola oqo. Ni sa vakayacora, sa qai kila ni sa ka dina. Sa sobuti koya na kena yalo, ni sa wiliwili tiko, ka sa lomana me muria na iVakabula ena nona bula taucoko. Sa dina tikoga kina ena veika a vakila.

3. Eso era na kila ni ra cakava. Sa rawa mo oka kei ira era vakayacora ga na veika e vakavulica na ivola. Eso era rawata na nodra ivakadinadina ena nodra cakava (raica na Joni 7:17). E kila vakavinaka tu na ivakavuvuli oqo o Nifai, e dua na parofita ena iVola i Momani. A vola o koya me rawa ni “vakauqeti ira kina mera vakadinata na Turaga na nodra iVakabula … Au sa vakamacalataka na ivakavuvuli ni ivola tabu me keimami kila, ka taurivaka ena neimami bula” (1 Nifai 19:23; vakamatatataki). Ni vakatauvatani, se vakayacori, na ivakavuvuli ni iVola i Momani ena nomu bula, sa rawa talega mo vakauqeti mai na kena yavu vakalou.

4. Eso era na kila ni ra kerea vua na Kalou. Sa rawa mo oka kei ira era na kila ena nodra wilika na ivola i Momani ka kerea vua na Tamada Vakalomalagi ena masu ke sa dina na ivola oqo. Oqo na veika au a sotava. Oqo na iyalayala cecere mai vua e dua na parofita ni iVola i Momani, o Moronai, kivei ira era vakasaqara ena yalodina na dina oqo: “Raica au sa kaya vei kemudou … ni dou sa wilika na itukutuku oqo, mo dou kerea vua na Kalou na Tamada Tawamudu ena yaca i Jisu Karisito, me vakatakila vei kemudou se dina se sega; ia kevaka dou sa kerea ena yalodina ena lomamudou taucoko ka vakabauta na Karisito, ena vakatakila vei kemudou ko Koya ena kaukauwa ni Yalo Tabu ni sa dina” (Moronai 10:3–4). Au sa vakadinadinataka ni kevaka mo na wilika ka masulaka na iVola i Momani, ka vakamuria na veidusimaki i Moronai, ko na kila ni sa ka dina.

Sa Yalataka na Kalou ni Ko na Kila

Kevaka o gadreva dina mo kila, ena yaco dina mo kila ni sa dina na iVola i Momani. Sa yalataka tu na Kalou me solia na kila-ka oqo kivei ira era sa vakasaqara vakaidina na dina oqo, ni o Koya “na Kalou dina, io ko ni sa sega ni daulasu” (Ica 3:12).

E dua tale na parofita ni iVola i Momani, o Alama, a vakavulici luvena ni sa yalataka tu na Kalou ni na “maroroya na [ivola oqo] me vakayacori kina na nona inaki, io mera kila na nona ivakavuvuli ko ira na itabatamata mai muri. Raica sa vakayacora oti e dua na ka a yalataka, ko ya na nodra saumaki mai e vuqa … mera kila na ivakavuvuli dina; a sa vakatakila vei ira na nona ivakavuvuli, ka na qai vakatakila talega vei ira na itabatamata mai muri me vaka na nona inaki; a ka oqo sa maroroi tiko kina na [ivola oqo]” (Alama 37:18–19).

Sa tiko ena gauna oqo na veivakauqeti kaukauwa oqori ena ivolanikalou oqo, ka na vakatakila na Turaga vua e dua e vakasaqara vagumatua me kila. Au sa rawa ni vakadeitaka eke niu raicalesu na veisiga sa oti ena gauna au se vulica tiko kina na Lotu. Nikua, ena vuku ga ni veivakauqeti kaukauwa ni iVola i Momani, au sa vakadinadinataka eke ni iVola i Momani sa vosa ni Kalou, ka sa vakavulica ni o Jisu na Karisito, na Mesaia Savasava. Na ivola oqo sa ivakadinadina bula ni sa mai yaco na Vakalesuimai ni Nona kosipeli ka sa parofita ni Kalou o Josefa Simici.

Kevaka o dua vei ira era vakasaqara vakaidina tiko na dina, sa yalataka tu na Turaga ni ko na kila. Ena yaco mo kila ena nomu vakarogoca na ivakavuvuli ni ivola oqo, wilika na ivola oqo, bulataka na ka e vakavulica tiko, masulaka mo kila kena dina, se vakayacori ira kece oqo. Ia ko na kila.

iVakadinadina ni Dua na Parofita

“Na iVola i Momani sa vosa ni Kalou. Keimami sureti kemuni mo ni wilika na itukutuku talei oqo. Oqo e dua na ivola vakasakiti duadua sa tu vei keda nikua. Mo ni wilika vakavinaka sara ena masumasu, ni ko sa vakayacora oqo, ena solia vei iko na Kalou e dua na ivakadinadina ni sa dina me vaka a yalataka o Moronai (raica na Moronai 10:4).”

Peresitedi Howard W. Hunter (1907–95), The Teachings of Howard W. Hunter, ed. Clyde J. Williams (1997), 54.

iVakadinadina ni Dua na Parofita

“Oi au e dua sa ciqoma mai vua na Turaga na ivakatakila kaukauwa duadua me baleta na dina [ni Vakalesuimai, kei na iVola Momani]. A solegi au tu na vakatakilakila oqo ena vuqa sara na auwa; kei na veituvaki cava ga e yaco ena noqu bula, ki na veigauna au vakilai au tu kina na kila-ka uasivi oqo ena tudei tu ga vei au.”

Peresitedi Lorenzo Snow (1814–1901), ena Conference Report, Oct. 1900, 61.

Yalayala nei Moronai

Ena itinitini ni iVola i Momani, e kaya kina e dua na parofita o Moronai ni kevaka meda na wilika na iVola i Momani, vakasamataka vakatitobu e lomada na kena itukutuku, ka kerea vua na Kalou ena masu kevaka e dina na ivola, ena sauma mai vei keda na Kalou ena kaukauwa ni Yalo Tabu (raica na Moronai 10:3–5).

Na ivakatakila ki na tamata yadua sa nona ga. E yaco mai ena sala eso kei na kena gauna kivei keda yadua me vaka na lewa ni Turaga. Na nomu kila na ivakavuvuli oqo ena vukei iko mo na kila ga vakataki iko.

1. Mo Vakasamataka Mada

Ni bera ni sureti keda meda masu, a sureti keda e liu o Moronai meda vakasamataka vakatitobu. Na vakasama vakatitobu o ya meda tugana ki lomada. Tarogi iko: Na cava au vakila niu wilika na iVola i Momani? Na cava na vuna? Na cava au sa vulica rawa? E ka vinaka beka?

A vakavulica na Turaga na ivakavuvuli oqo vei Oliver Cowdery: “Ko a sega mada ni vakasamataka; ia ko a nanuma ga mo rawata na ka ko sa kerea vei au. Ia au sa kaya vakaidina vei iko, a dodonu sara mo vakasamataka vakavinaka taumada; kevaka sa dodonu vei iko mo qai kerea” (V&V 9:7–8; vakamatatataki).

2. Masu Vagumatua

E gadrevi na ituvaki vinaka ni vakasama meda vakanananu donu ka vakarorogo tiko ki na domo rogo lailai ni Yalo Tabu. Oqori beka na vuna e tukuna kina o Inosi ena iVola i Momani ni nona masu sa vaka e “yaluma … ena mata ni Kalou” (Inosi 1:2).

Ni ko wilika, vakasamataka vakatitobu, se masu, vakayagataka e dua na gauna kei na vanua e sega kina na kosakosa. Tuvanaki iko mo vakarorogo matua. Ni ko masu me rogo ena vukea mo vakasama vakatabakidua kina.

3. Kerea na Veika Dodonu

A kaya na Turaga vei Oliver Cowdery me kakua walega ni kerekere ia me kerea ke sa donu na veika e kerea tiko. Sa vakavuqa, vakabibi ni se vou vei keda na ciqoma na isau ni masu mai vua na Tamada Vakalomalagi, ni rawarawa cake meda kila vakavinaka na isau ni masu ena io se sega.

“Na idola ni vakavinakataki ni masumasu sa ikoya na kena vulici ni kena tarogi na veitaro dodonu,” e vakavulica o Elder Richard G. Scott ena Kuoramu ni iApositolo Le Tinikarua.¹

4. Na Cava e Lomamu?

E dua vei ira na idola ki na iyalayala nei Moronai o ya meda na kerea ena “lomada taucoko.” Ena gauna sa gole kina na cauravou yabaki 14 o Josefa Simici ki na veikau me laki masu, “a laki masu ni sa lomana me vakarorogo ka talairawarawa talega,” a kaya o Peresitedi Henry B. Eyring, iMatai ni Daunivakasala ena Mataveiliutaki Taumada. “… Ena vuku ga ni nona talairawarawa, ena veisiga kei na veivula kei na veiyabaki sa tu e liu vua ka sa saumi mai na nona masu ena rarama kei na dina kaukauwa.”²

5. Kakua ni Calata

Era sega ni veivakurabuitaki na ivakatakila taucoko. Eso era na tadra, raivotu, se raica eso. Ia e vuqa vei keda eda na sotava na veika e vakanomodi ka duatani, me vaka e dua na yalo e vinaka, ka veivakacegui.

E vakavulica o Peresitedi Spencer W. Kimball (1895–1985), na ika 12 ni Peresitedi ni Lotu, “Ni namaki na veika e veivakurabuitaki, ena sega beka kina ni kidava sara vakavinaka e dua na drodro tiko mai vakayauyau ni ivakatakila.”³

iDusidusi

1. Richard G. Scott, “Vakayagataki ni iSolisoli Cecere ni Masumasu,” Liaona, Me 2007, 8.

2. Henry B. Eyring, “Prayer,” Liahona, Jan. 2002, 18.

3. Nodra iVakavuvuli na Peresitedi ni Lotu: Spencer W. Kimball (2006), 281.

Au Kila Vakacava

E dina ga au a papitaiso niu se yabaki ciwa, e ratou sega tu ni laki Lotu na noqu matavuvale. Ia niu sa yabaki 13 kina, rau sa sureti au na daukaulotu meu laki lotu, kau a gole sara. Au a lewena talega na semineri. Keimami a vulica na Vunau kei na Veiyalayalati, ka vaka meu veilecayaki kina. Au a lomatarotarotaka na veika baleti Josefa Simici kei na iVola i Momani. Au sa vinakata meu kunea na Kalou, ia au sega ni kila na kena sala se vanua.

Ni toso na gauna au sa vakasamataka tiko na veika rau tukuna vei au na daukaulotu. Au nanuma sara na semineri. Au vakasamataka na noqu veivosaki kei ira na lewe ni lotu Vakarisito tale eso. Sa dau yaco meu masulaka meu kila na veika e dodonu, ia sa vaka ga me dua na vakasama cacavukavuka ka sega ni dua na taro me lomaqu dina. Ia e dua na bogi au sa gadreva meu masu ena “lomaqu taucoko.”

Au a kaya vua na Tamada Vakalomalagi niu vinakata meu kilai Koya ka meu tiki ni Nona Lotu dina. Au a yalataka: “Kevaka mo ni vakatakila mai vei au ke sa parofita dina o Josefa Simici ka sa dina na iVola i Momani, au na cakava na veika cava ga o ni vinakata meu kitaka. Kevaka sa Lotu dina na Lotu i Jisu Karisito ni Yalododonu Edaidai, au na muria ka sega vakadua ni biuta.”

A sega ni yaco mai vei au e dua na ivakatakilakila veivakurabuitaki, ia au vakila na vakacegu ni yaloqu kau gole meu moce. Ni oti e vica na auwa a vakayadrati au e dua na vakasama duatani: “E parofita dina o Josefa Simici, ka sa dina na iVola i Momani.” E salavata mai kei na vakasama oqo e dua na vakacegu sega ni vakamacalataki rawa. Au sa mani moce tale, ia au a vakayadrati tale ena vakasama kei na vakacegu vata ga o ya.

Vakatekivu mai na gauna o ya, au sa sega tale ni vakatitiqataka ni o Josefa Simici e parofita dina. Au kila ni oqo sa cakacaka ni iVakabula ka na sauma mai na Tamada Vakalomalagi na noda kerekere ena lomada dina.

Rodolfo. Armando Pérez Bonilla, El Salvador