iTukutuku ni Mataveiliutaki Taumada

Yalayala Talei ni iVola i Momani

Mai vei Peresitedi Thomas S. Monson

iVakatakilakila

President Thomas S. Monson

Ena vica na yabaki sa oti au a duri tu ena yasa ni loga ni dua na tamanigone gone sa voleka sara tiko ni mate. Ratou duri voleka tu e kea ena rarawa levu na watina kei na rua na luvedrau. A taura o koya na ligaqu ka taroga cake mai, “Bisopi, au kila niu sa na voleka ni mate. Tukuna mai vei au se cava ena yaco vua na yaloqu niu sa mate”.

Au cabora e dua na masu vuni me rawa ni vukei mai lagi ka raica sara ena teveli e yasa ni loga ni davo koto kina e dua na iVola e Tolu. Au tomika cake ka tekivu cega.Vakasauri noqu sa raica niu sa yacova yani na wase 40 ni Alama ena iVola i Momani. Au sa qai wilika vua na veivosa oqo:

“Raica sa vakatakila vei au e dua na agilosi, ena gauna sa veibiu kina na yago kei na yalo, … sa kau kina vanua sa vakarautaka vei ira na Kalou, o koya ka a buli ira.

“Ia ko ira sai valavala dodonu, era na kune marau kei na vakacegu mai parataisi, ia era na vakacegu kina mai na nodra rarawa kei na oca. (Alama 40:11–12).

Niu sa wiliwili tiko yani me yaco kina Tucaketale, e serau mai na irairai ni matana na turaga o ya ka vaka me dredre na tebe ni gusuna. Niu sa vakacavara na noqu veisiko, au vakamoce vei iratou na matavuvale.

Au a qai raici iratou tale ena soqo ni veibulu. Au nanuma lesu na bogi o ya ni a vaqara tiko e dua na turaga na dina ka qai sauma mai na iVola i Momani na isau ni nona taro.

E lako mai na iVola i Momani na yalayala talei, wili kina na yalayala ni vakacegu, galala, kei na veivakalougatataki, kevaka walega meda na qarava na Kalou ni vanua, sa i Jisu Karisito.” (Ica 2:12).

E lako mai na veidrau ni ivola na yalayala ni “marau sega ni vakaiyalayala” vei “ira na talairawarawa kina ivakaro ni Kalou. Raica era sa vakalougatataki ena veika vakayago kei na veika vakayalo” (Mosaia 2:41).

E tiko ena veidrau ni ivola na yalayala ni “reki levu” vei ira era sa “lesi mai vua na Kalou” ena nodra vakabulai na luvena tagane kei na yalewa (Alama 28:8; 29:9 ).

E volai tu ena loma ni ivola na yalayala ni nodra na vakasoqoni vata tale na Isireli — e dua na itavi eda sa vakaitavitaki kina ena veiyasai vuravura ena itavi ni kaulotu (raica na 3 Nifai 16; 21–22).

Tabaki tale tu ga kina na yalayala ni da masu vua na Tamada ena yaca i Jisu Karisito, ena vakalougatataki na noda matavuvale (raica na 3 Nifai 18:21).

Ena kena vakawiliki vakavinaka ena kilai kina na dina ni yalayala vakaparofita ni “ena yaco mai kina nomu bula kei na nomu matavuvale na kena torocake na cakacaka ni Yalotabu, na kena vaqaqacotaki na dina ni kena vakamuri na Nona ivakaro, kei na kena qaqaco cake na ivakadinadina ni bula dina tiko na Luve ni Kalou.”¹

Ena lako mai na iVola i Momani na yalayala ni, ena masu ni vakabauta, na vakabauti Karisito eda rawa ni kila na dina ni yalayala oqo, “ena kaukauwa ni Yalo Tabu” (raica na Moronai 10:4–5).

Au vakadinadinataka na dina me vakataki ira tale eso na parofita ni “ivola ka dodonu taudua e vuravura,”² na iVola i Momani, ka dua tale na ivakadinadina kei Jisu Karisito. Sa roboti vuravura na kena itukutuku ka kauta yani vei ira na wilika mera kila na dina. Sa noqu ivakadinadina ni iVola i Momani ena veisautaka na bula. Meda sa na dau wilika vakawasoma. Meda sa na dau wasea ena yalomarau vei ira na luvena na Kalou na noda vakadinadinataka na kena yalayala talei.

iTaba vakadroini mai vei Christina Smith