iVaqa ni Veisiko
Kevaka Eda Sega Ni Vakatitiqa
Vulica na itukutuku oqo, ka me veivosakitaki vata kei ira na marama o sikova ena kena gauna donu. Vakayagataka na taro me vukea na nomu vaqaqacotaki ira na marama ka cakava me sa tiki kaukauwa ni nomu bula na iSoqosoqo ni Veivukei.
Vakabauta • Matavuvale • Veivukei
Eda na wilika ena iVola i Momani, na kedra italanoa e so na cauravou, ka ra sa bau yalodei. yaloqaqa, ka yalo kaukauwa. “Raica era sa tamata dina sara ka yalomatua, era sa vakavulici mera muria tikoga na ivunau ni Kalou ka caka dodonu e matana” (Alama 53:21). O ira na cauravou oqo era vakavinavinakataki ira na tinadra—ni ra nodra ivakaraitaki ka qasenivuli.
Era a bula na tinadra na cauravou yaloqaqa i Ilamani ena dua na gauna e sega ni tautauvata kei na noda gauna. Na veika era sotava e dredre ka vakadomobula, ka ra dau kacivi na itabagone mera tucake ka taqomaka na nodra bula kei na nodra galala. Nikua eda bula tiko ena dua na vuravura eda “sa sega ni veivala walega kei ira na tamata eda sa veivala talega kei ira era sa liu, kei ira era sa kaukauwa, kei ira era sa veitaliataka na butobuto kei vuravura oqo, kei ira na veivavakoso yalo ca ena veiyasana vakalomalagi” (Efeso 6:12).
Era kaci mai na veigauna dredre vei ira na itubutubu yaloqaqa mera ivakaraitaki ni vakavulica na dina ka a vakatavuvulitaki vei ira na cauravou yaloqaqa nei Ilamani: “Kevaka mera vakabauta, na Kalou ena vakabulai ira.” (Alama 56:47). Na kena vakavulici ka vakaraitaki na dina oqo ena gadrevi kina na qaqarauni. Ia, ena sega ni vinakati meda lomaleqa. Nida sa kilai keda ka da kila na se o cei na Kalou ni da sa ia oti na veiyalayalati kei Koya eda—na vakataki ira na tinadra na cauravou yaloqaqa—meda na itakataka ni veika vinaka ena veigauna taucoko.
Kena irairai ni o ira na 2,060 na cauravou yaloqaqa nei Ilamani era a tuberi ga mai vua e dua na tina. Ia o ira na tina oqo era sega ni cakacaka duadua. Ena nodra veivuke e so na turaga kei na marama yalododonu, era a semata vata na marama tina a ivakaraitaki vinaka kei na vakavulici ni kaukauwa ni veiyalayati. Era sa kila na itabagone ena gauna o ya na veiyalayalati era sa cakava na nodra itubutubu mera kakua ni veivaluvaluti. Ena gauna sa dau dredre kina, sa na dau dolava na Tamada Vakalomalagi na sala vei ira na itubutubu oqo mera na maroroya na nodra veiyalayalati—ka taqomaka na nodra galala (raica na Alama 56:5–9). Meda na vakakina ena maroroi ni veiyalayalati me rawa kina vei ira na gone kei na itabagone—o ira na luveda kei ira ena noda tabanalevu, tabana, vanua eda tiko kina, kei na noda itikotiko—mera na kila ka tokona na maroroi ni veiyalayalati.
Ni da sa maroroya na noda veiyalayalati, sa na vakarautaka vei keda na sala na Tamada Vakalomalagi. Me da sa na bulataka sara ga vakadodonu na noda veiyalayalati. Me ivakaraitaki, sa na rawa vei keda meda dau masu, vulica na ivolanikalou, sasaga me dua na ivolatara ni valetabu, me rakorako na isulusulu, ka vakatabuya na Sigatabu. Ni da sa vakayacora vaka oqo, era sa na kila na luveda ka ra na tukuna, “Keimami a sega ni vakatitiqataka na nodra ivakavuvuli na tinai keimami” (Alama 56:48).
O ira na marama Yalododonu Edaidai ka ra sa raica ni nodra kaukauwa e lako mai na Veisorovaki ni Turaga, era sega ni dau soro ena gauna sa yaco mai kina na veigauna dredre. Ni da dau maroroya na veiyalayalati, eda na sasaga ena kena bucini, maroroi, ka taqomaki ira na gone kei na itabagone me na rawa ni dua na siga eda na kaya vei ira na itabatamata tubucake tiko mai, “Au se sega mada ni raica e liu e dua na yaloqaqa me vakataki ira na luvequ oqo” (Alama 56:45).
Julie B. Beck, peresitedi raraba ni iSoqosoqo ni Veivukei.
Mai na iVolanikalou
iTaba mai vei Robert Casey