A Vosa vei Au na iVola i Momani

Gina Baird, Utah, USA

Ni se qai yabaki rua tiko o Amanda, na luvei keirau gone duadua, sa laurai ni sa tauvi koya tiko na liukimia. E kaukauwa sara vua, ka sega ni bau vakalailaitaki sobu na kenisa oqo ni oti na kemocerapi. Me sa na seleti ka sosomitaki na nona uto ni sui.

Ena gauna ratou a tiko kina mai vale o watiqu kei rau na luvei keirau tagane mai Utah, au a tiko vata kei Amanda ena dua tale na yasai Amerika mai na Sepiteba ki na ivakatekivu ni vula o Janueri. Keitou a sega ni marautaka vata na Siganisucu, ia ni oti na veiqaravi vakavuniwai, keirau sa lesu i vale.

Ena imatai ni nona raici vakavuniwai e valenibula ni keirau sa lesu mai vale, era sa raica tale na vuniwai na manumanu ni liukimia ena dra nei Amanda. A sega ni yaga na veisele o ya. Niu rogoca na itukutuku oqo, sa vaka sara ga niu sa kino sobu ena vuloa. Keitou sa curuma mai vakamatavuvale na lomaocaoca, na cakacaka eso, na veitawasei, kei na veigauna dredre. Ia sa na rairai takali ga na luvei keirau oqo.

Au a lesu i vale vei rau na luvequ tagane ena yakavi o ya. Ni keitou waraki watiqu tiko me lesu mai ena cakacaka, keitou taura mai na neitou iVola i Momani ka tekivu wiliwili. Keitou a wilika sara na 2 Nifai 9. Ni sa wiliki tiko, a voqa mai vei au na vosa oqo:

“Au sa vosataka vei kemudou na veika oqo mo dou marau kina ka laveta cake na ulumudou me tawamudu, ni na vakalougatataki ira na nomudou kawa na Turaga na Kalou.

“Au sa kila ni vuqa vei kemudou sa vakasaqara me kila na veika ena yaco mai; ia au sa kila ni dou sa kila ni na rusa vakaidina na yagoda oqo; ia ena yagoda ga oqo eda na raica kina na Kalou. …

“Ia me vaka sa yaco na mate ki na tamata kecega, sa kilikili me yaco na kaukauwa ni tucaketale mai na mate me vakayacori kina na inaki loloma i koya sa Bulia na ka kecega. …

“A ka levu vakaidina na nona loloma na noda Kalou, raica sa vakarautaka na sala meda dro kina mai na ivesu ni manumanu ko ya, ko mate. …

“Ia ena lako mai ki vuravura me vakabulai ira na tamata kecega kevaka era na vakabauta na nona vosa; a sa colata ko koya na rarawa ni tamata kecega, ia na rarawa ni veika bula kecega, na tagane kei na yalewa kei na gone; ko ira na kawa i Atama.

“Ia sa vosota na kece oqo mera rawata kina na tucaketale mai na mate na tamata kecega, ka ra na tu e matana ena siga ni veilewai” (2 Nifai 9:3–4, 6, 10, 21–22).

Niu sa wilika oti na veivosa oqo, sa vakasinaita na rumu na Yalo Tabu. Au vakila ni sa kila o Tamaqu Vakalomalagi na itukutuku au a ciqoma e na siga o ya. Au vakila ni vosa a vola o Jekope ena 2000 vakacaca na yabaki sa oti a volai ena vukuqu me baleta na siga o ya sa lako sara ga mai vua na iVakabula. E kila o koya na rarawa kei na mosi a yaco vei au ni sa na vakarau mate na luvei keirau. Ka sa tu e kea o Koya me vakaceguya na neitou matavuvale ena Nona iyalayala ni sa vakarautaka tu o Koya e dua na sala ena kena siga, ena kaukauwa ni Tucaketale, “ni keitou na raica na Kalou ena yagoi keitou.”

A bula tiko o Amanda volekata ni dua tale na yabaki, ia au sega ni guilecava vakadua ni a voqa vei au na vosa ni iVola i Momani niu a leqa ka solia mai na Turaga vei au na inuinui, veivakacegui, kei na kila vakavinaka na Nona ituvatuva.