Au a Vakatovolea na Yalayala i Moronai

Francesco Ferraresi, Lombardy, Itali

Ena vica na yabaki sa oti au a tiko ena dua na vale nei noqu itokani kau sotavi rau kina e rua na cauravou isulusulu vinaka ka rau kaya ni rau daukaulotu ni Yalododonu Edaidai. Au nanuma ni duatani toka me rau gole sara mai ki Itali me rau mai veisautaki ira na tamata era sa vakabauta oti tu na iVakabula.

Au a kerei rau me rau gole mai i noqu vale. “Ke drau vinakata, drau laki raici au yani me tou na veiwasei itovo ni vanua,” au a kaya. “Ia drau kakua ni nanuma niu na veisautaka na noqu lotu.”

Ni keitou sa mai sota ena bogi e tarava, rau a tukuna na daukaulotu na iVola i Momani. Au nanuma ni duatani toka niu se bera mada ni bau rogoca e liu. Au a sureti rau tale, ia ni oti na ikarua ni sota, a kaya sara o watiqu o Anna Maria, ni rau lialia tiko ka dau biuta na vale ena gauna ni neitou soli lesoni. E vaka talega vei au ni rau duatani toka na daukaulotu oqo, ia au via kila tikoga na veika rau na tukuna ka tomani tale na noqu raici rau.

Ena dua na bogi sa yaco mai vale o Anna Maria, ka rogoca sara ni keitou a veivosakitaka tiko na vakamau tawamudu. A taleitaka sara mai o koya, ka keirau sa lomavata me keirau tekivu tauri lesoni vata tale. E matua sara o koya ena ivolanikalou ka vakataroga na veika eso. Rau a sauma sara mai na daukaulotu, ia eso na taro rau na laki vakadikeva i vale. Ena veimacawa rau na lesu vata tiko mai kei na kena isau, ka sa dau tu yani vei Anna Maria eso tale na taro.

Vakalailai ga ni sa mai oti toka na soli lesoni, au kurabui ni sa kerea o Anna Maria meu vakadonuya na nona papitaiso. Au a tukuna vua niu na sega ni saqata kevaka sa veisau dina o koya. Au a tiko ena nona papitaiso ena ika 5 ni Maji, 1995, ka marau na yaloqu ena soqoni o ya.

Au a wilika e vuqa sara na itukutuku ni Lotu, ka rau vakauqeti au tikoga na daukaulotu. E kena itinitini au a tovolea meu raica mada na yalayala i Moronai (raica na Moronai 10:4–5). Au a vinakata meu kila se sa lako dina mai vua na Kalou na iVola i Momani se dua ga na ivola italanoa vinaka.

Ena dua na siga ena June 1995 au a tiko duadua e vale, ka tekiduru sara e yasani noqu loga ka taroga vua na Tamada Vakalomalagi, “E dina beka na iVola i Momani, ke sa vakakina, ena gauna cava meu sa papitaiso kina?” E vakasauri na noqu sa vakila e lomaqu kei na noqu vakasama e dua na domo sa matata ka tukuna maivei au, “E dina na iVola i Momani.” Sa qai matata mai vei au na gauna meu sa papitaiso kina. Ni oti e dua na macawa au a masu tale ka ciqoma na kena isau vata ga o ya. Sa uabaleti ena reki na yaloqu. Au sa mai kila oqo ni a vosa vei au na Kalou ka sa parofita dina o Josefa Simici.

E kena tinitini, ena ika 17 ni Sepiteba, 1995, au a curuma na wai ni papitaiso, ni oti e dua veimama na yabaki vakatekivu mai na gauna au a sotavi rau kina na daukaulotu. Ni oti o ya, sa tekivu malele mai na luvei keirau yalewa ki na Lotu ka sa papitaiso talega. Ena Janueri ni 1997 keitou a vauci vakamatavuvale ena Valetabu e Bern Switzerland.

Keitou kila ni oqo na Lotu dina, sa liutaka tiko o Jisu Karisito mai vua e dua na parofita kei na kena matabete. Keitou sa vakavinavinaka vua na Turaga ena vuku ni Nona loloma, ena nona a muataki keitou vei rau na daukaulotu, kei na neitou sa mai kila na kosipeli.