Meu Kunea Evei na iSau ni Taro?

Olga Ovcharenko, Sverdlovsk Oblast, Russia

Niu a se yabaki 21 kina, era a vakavulica tiko na daukaulotu ni Lotu i Jisu Karisito ni Yalododonu Edaidai na kalasi ni vosa Vakavalagi ena noqu yasana mai Rusia. Taumada au a laki taura sara na kalasi ni vuli vosa oqo, ia sa laki balavu sara na noqu tiko ena vuku ni veituberi vakayalo rau sa wasea na cauravou daukaulotu ni oti na kalasi ka meu taroga eso na ka.

Au a susugi cake mai ena matalotu sa kovuta raraba tu na noqu vanua, ia e levu sara tiko na veika vakalotu au lomatarotarotaka tiko. Sa tu vei rau na daukaulotu kei ira na nodrau lewe ni Lotu na isau ni noqu vakatataro ka se bera mada vakadua ena gauna e liu me vakacegui au vakaoqo.

Au a yaloqaqa vakalailai ni oti e dua na kalasi Vakavalagi, ka kerea vei rau na daukaulotu e dua na nodrau iVola i Momani. Ia niu sa yaco i vale, au a laki biuta tu ga ena vatavata ka sega ni wilika.

Ia, a sega ni dede na kena toka e kea. Au a rogoca ni ra tukuna o ira na lewe ni Lotu era tiko ena kalasi Vakavalagi ni iwali ni leqa e tiko ena ivolanikalou. Ni gauna au dau bolei kina se sotava na leqa eso, au dau taura mai na iVola i Momani mai na vatavata ka tekivu wilika. E vakavuqa, au kunea kina na isau ni taro—na mataqali isau ni taro e tukuna vei au na veika sara ga au gadreva tu meu kila.

E na gauna o ya au sa tekivu vakila niu sa sega ni rawa ni biuta na Lotu ena noqu bula. Oqo na vanua au vinakata meu tiko kina. Oqo na vanua au vakila niu sa itaukei kina.

Ia, au vinakata meu vakadeitaka ena noqu kerea vua na Kalou. Na leqa e tiko niu a tiko vata kei itaukei ni dua na vale redetaki, e dua ga na kena rumu, o ya e dua na marama qase sara, ka sega na vanua meu masu duadua kina. Ia ena dua na yakavi au a gole sara ki valenikuro—ka vakatikitikitaki au mai na neirau loma ni vale—ka taroga vua na Tamada Vakalomalagi ke sa dina na Lotu. A yaco vei au e dua na yalo e qaqa sara meu sa kila na veika meu na cakava.

Ni oti ga vakalailai au a papitaiso, ka sa gauna marautaki duadua ki na noqu bula niu sa lewena tu na Lotu. Mai na noqu lomatarotaro, sa tu oqo vei au na kena isau. Niu a laladidi tu e liu, au sa mai vakatawani oqo.

Au vakavinavinaka vua na Tamada Vakalomalagi ni sega ni biuti keda meda lomatarotaro voli. Au kila ni sa dau vosa mai vei keda, ni da masu kei na kena mai na ivolanikalou.