Me Vulici Vakacava na iVola i Momani

Mai vei Elder D. Todd Christofferson

Ena Kuoramu ni iApositolo Le Tinikarua

E a vakavulica ena ruasagavulu kalima na yabaki sa oti o Peresitedi Ezra Taft Benson (1899–1994) e “tolu na vuna ka dodonu kina vei ira na Yalododonu Edaidai mera cakava me nodra vakatutu ni bula taucoko na wilika na iVola i Momani.”¹ Na vuna qo:

iMatai, na iVola i Momani e vatuivakadei ni noda lotu—e vatuivakadei ni noda vakadinadinataki Jisu Karisito, na noda ivunau, kei na noda ivakadinadina.
iKarua, na iVola i Momani e a volai me baleta na noda gauna.
iKatolu, na iVola i Momani e vukei keda meda voleka vua na Kalou

Na vu ni kena vulici na iVola i Momani ena rawa talega ni vakavuna na noda na gumatua meda vulica na ivolanikalou duatani oqo.

Na Vatuivakadei ni Noda Lotu

Ni sa vatuivakadei ni noda vakadinadinataki Karisito kei na taucoko ni Nona kosipeli na iVola i Momani, sa ka bibi kina meda na raica vagumatua na kena vakadinadinataki ka vakatavuvulitaki kina na iVakabula. E so era sa volia e dua na ilavelave vou ni iVola i Momani ka makataka kina na tikina e vakatavuvulitaka na iVakabula, na Nona veiqaravi, kei na Nona veivakalotutaki. Qo e vakatitobutaka na kena vakadinadinataki ni o Jisu Karisito e Luve ni Kalou ka vakavoui na veika e sa cakava oti kei na veika e se cakava tikoga me baleti keda.

Volai me Baleti Keda

O ira na volavola ena iVola i Momani era volavola ena nodra vakasamataki keda, vakatabakidua na itabatamata ena gauna oqo. Ena nona vakalekalekataka tiko na kedra itukutuku na Nifai, e kaya kina o Momani ni sega ni rawa me wili kina e “dua na ika duanadrau ni tikina” (raica na 3 Nifai 5:8; raica talega na iVola i Momani 1:5). Kaya o Moronai, “Ia, au sa vosa sara tiko ga oqo vei kemudou. Raica sa vakatakilai kemudou vei au ko Jisu Karisito kau sa kila kina na veika dou sa kitaka” (Momani 8:35). O rau na le rua na dauvolaivola oqo kei na so tale, era volavola ena veivakauqeti, ka ra vola na veika ena yaga vakalevu sara vei keda ena gauna oqo.

Sa dodonu kina meda na vulica ka taroga tiko na taro oqo: Na cava e volai kina na ka oqo? Ena yaga vakacava vei au nikua? E vakadreta o Peresitedi Benson me kena ivakaraitaki, ni ena iVola i Momani, eda na raica kina e dua na ituvatuva me namaki baleta na Lesumai Vakarua ni iVakabula. Eda vulica na nodra ivakarau ni bula na tisaipeli i Karisito ena gauna ni ivalu, vorata na veivakacacani kei na vukitani, era veivakalotutaki ga, ka ra sa qarava na leqa ena kena yaco mai.² Me vakataki Nifai ga, ni da vuli, e dodonu meda “taurivaka ena neimami bula—me vaka oqo, tovolea mo raica na ka e rawa ni caka me bulataki kina na ka eda wilika mai na iVola i Momani (raica 1 Nifai 19:23).

Toso Voleka Vua na Kalou

Me cavuti tale mada na ka e kaya o Peresitedi Benson: “E sega walega ni vakavulica na iVola i Momani na dina, ni o ya sara ga na ka e cakava. E sega walega ni vakadinadinataki Jisu Karisito na iVola i Momani, ka sa o ya saraga na ka e cakava.…Ia e dua tale na ka bibi cake. E koto e dua na kaukauwa ena ivola oqo ka na tekivu me drodrova yani na nomu bula ena gauna o tekivu vulica kina vagumatua.³

Ni vulici vagumatua na iVola i Momani ena sureta na Yalotabu, ni ivakatakila e lako sara ga mai na Yalotabu. Qo e vakaraitaka meda vulica ena vakasama bibi, ka vakanomodi—vakasama titobu, masumasu, ka dau vakavola toka na ka o vakila ni o wiliwili tiko. Qo ena biuti keda ena dua na vanua me da vakararamataki kina vakalevu ka kila dina sara, na veika eda vulica tiko kei na veika tale e so. Ena so na gauna ena veivuke meda wilika kece sara na iVola i Momani ena dua na gauna lekaleka, me rawa ni da na kila na kena italanoa kei na kena itukutuku Ia, e dodonu ga me vakanamata ena wasei ni gauna me wiliki na ivola oqo ena veisiga ka sega ni wili e dua na iwiliwili ni tabana se tikina ena dua na siga.

Vukevuke ni Vuli

Sa dua na ka vinaka nikua ni sa tiko na veika me vukea na kena vulici na iVola i Momani. E so sa tiko vata sara ga kei na noda volanikalou—na iDusidusi ni Ulutaga, iVolanivosa ni iVola Tabu, kei na ituvatuva vakamatanivola ni ivolanikalou Vakavalagi kei na iDusidusi ni iVolanikalou ena so tale na vosa. Ka sa tiko ena ilavelave ni ivolanikalou ni Yalododonu Edaidai e levu sara na ivakamacala e botoni tabana kei na ivolaveivuke ena veitabana.

E so tale na ivukevuke ka sa tabaki tu e wili kina na iDusidusi ni Lewenivuli ni Wilivola ni Sigatabu kei na iDusidusi ni lewenivuli ni Semineri vakakina na iVola ni vuli ni Inisitute. E ka vou ena noda gauna na levu ni veika vakalivaliva me vukei keda ka vakamacalataki tiko ena babani tabana e 31.

iYaragi ni Saumaki

Na iVola i Momani e dua na iyau dredre ka sa iyaragi ni saumaki ka sa vakarautaka tu na Turaga me baleta na itabatamata eda bula donuya. Au sa raica rawa ni sa yavu sara ga ni noqu ivakadinadinataki Jisu Karisito, na itavi vakaparofita i Josefa Simici, kei na Lotu i Jisu Karisito ni Yadodonu Edaidai, “ni sa matanitu ni Turaga sa tauyavu e vuravura.”⁴ Au marautaka meu semata na noqu ivakadinadina vei Jisu Karisito ni “me vaka sa bula na Turaga na nomudou Kalou, sa dina sara na itukutuku ko ya” (V&V 17:6). Me sa nomu ituvatuva ni bula na vulici ni iVola i Momani ka me na titobu nomu rai ka tuberi iko yani kina bula tawamudu.

Na iVolanikalou ena Initaneti kei na Veiyaya Veikauyaki

Me ikuri ni kena vakarautaki ka vakatotolotaki ni kena laurai na veivuke na yavunivosa ka veidutaitaki na veitikinivola ena initaneti (scriptures.lds.org) kei na iyaya e veikauyaki (mobile.lds.org) ena vakarautaki e so na veivuke ka na rawa ni vukei iko ena nomu vuli:

Na Noqu iVolalailai ni Vuli (notebook.lds.org)

Na ivolalailai oqo ena initaneti ena tiko kina e levu sara na veika ko sa na rairai vakayagataka oti beka ena nomu vuli—me rokataki, makataki, ka veidutaitaki, ena kena ivakaraitaki—ia ena solia vei iko mo vakayagataka ka maroroya ena komipiuta. Kena ikuri, sa na rawa mo “tag” se wasewasea na nomu ivakamacala kei na so tale na lewena ena gauna e rawa kina. Me vaka ni ko a sasaga curu kina ki na My Study Notebook vata kei na LDS account, na nomu ivola lailai ena sega ni veisau, sega ni dua na ka se cava ga o vakayagataka mo raica kina. Na iyaya ena vukei iko mo cakacakataka ga na nomu ituvatuva ni mamaroroi ena vulici ni kosipeli kei na kena vakavulici.

Scripture Formats and Languages (scriptures.lds.org)

Na ilavelave vakalivaliva kei na katokatoni ni ivolanikalou sa tu oqo ena levu sara na veimataqalai vosa, ka sa cakacakataki tale tiko e so tale na vosa.

Sa rawa me tauri ena gauna oqo na ilavelave vakomipiuta kei na katoni ni ivolanikalou, at LDS.org vakakina ena iyaya dauveikauyaki ena vuqa na vosa me vaka sa vakayacori tale tikoga ena vuqa tale. Na itikotiko vou ena komipiuta ni ivolanikalou ni Lotu e tiko talega kina na kena rawa ni wasei na itukutuku e tiko kina vata kei ira tale e so ena imeli kei na sala ni veitaratara tale e so.

Na ivolanikalou e tiko ena LDS.org sa tiko oqo ena 21 na vosa; na kena ka rawa ni veikauyaki sa tiko ena 10 na vosa vakatau ena kena ka vakarautaki.

LDS Scripture Citation Index (scriptures.byu.edu)

Na veivurevure oqo e rau biuta vata e rua na qasenivuli mai Brigham Young University, ena semata na veitikina mai na ivolanikalou kei na nodra vosacavuti na parofita kei na iapositolo. Me kena ivakaraitaki, ni kevaka o via kila se o cei a vosa mai na 1 Nifai 3:7 ena koniferedi raraba. Kiliki ena Book of Mormon link ena imawi ni sikirini ka qai dreta sobu kina 1 Nifai 3; e kea o na raica kina na kena isau.

iTuvatuva Vakamatanivola ni Veiulutaga ni Koniferedi Raraba (conference.lds.org)

Dua tale na ivurevure ka na veivuke mo semati iko kina vulici ni ivolanikalou kei na nodra vosa na parofita, conference.lds.org ena tiko kina na ituvatuva ni ulutaga ena veikoniferedi yadua. Kena ivakaraitaki, kevaka mo vulica tiko na Veisorovaki mai na ivolanikalou, ena rawa ni ko na raica e lima na vosa ka tiko kina na ulutaga o ya ena koniferedi ni Epereli 2011.

Vulica na Vuli ka Vuli Tikoga

Au se bera ni lewenilotu kau sa wilika rawa na iVola i Momani. Au wilika rawa ena dua na macawa niu se qai yabaki 16. Niu sa voleka ni vakacavara noqu wiliwili, au qai sotava e dua na tikina ka tukuna tiko ni kevaka me nei Karisito na Lotu e dodonu me tiko kina na yacana (raica 3 Nifai 27:8). E kea sa tekivu me drodro sobu na wai ni mataqu. Kau kila ni dina na iVola i Momani, kau sa via papitaiso sara ga.

Au wilika tale na ivola niu sa papitaiso oti, ia oqo au sa volia e dua noqu peni kala meu na makataka na veitikina kei na italanoa ka ra sa veivakauqeti dina vei au. E muri au cakava tale vakakina ia au sa vakuria ga na noqu vola e so na ivakamacala ena veitikina kei na tutu ni drauni ivola. E muri au sa qai vola tale kina e so na ka ena tikina o ya, se mai na iVola i Momani se mai na nodra vosa na parofita.

Ni tekivu tale edua na yabaki, au sa volia tale e dua na noqu ivolanikalou me vaka ni sa makataki kece tu na veitabana kau a vakayagataka tu ena gauna ni kaulotu, niu a dau vakarautaka kina na noqu lesoni. Na gauna oqo na noqu vuli kei na noqu makamaka sa yavutaki ena ulutaga. Au a vakayagataka e dua na roka kina dui ulutaga—kena ivakaraitaki, roka moli na vakabauta, drokadroka na veivutuni, kei na so tale.

Ena kena vulici tikoga na iVola i Momani ni vakayagataki tiko na veigaunisala duidui, au qai kila ni kena wiliki ga vakadua na iVola i Momani ena sega ni rauta. Ena vulici sara vakavinaka ena kena vulici tikoga. Au sa vulica talega ni sega ni dua na ka kevaka me sa wiliki wasoma, ena dua ga na ka ena vakavuna me na tarogi, “Cava au sega ni raica kina na ka o ya e liu? E dodonu me a tiko kina.”

Na ivolanikalou—vakauasivi na iVola i Momani—ena vakavulici keda baleti Jisu Karisito vakakina na Tamada Vakalomalagi. Na vulici ni ivolanikalou sa dreti au sara vakavoleka vei Rau.

Cristina Vergara Ramírez, Chile

iTaba droini mai vei Craig Dimond