SaposYu Wantem Save Tru, Bambae Yu Save Stret

I Kam long Elda Wolta F. Gonsales

Blong Presidensi blong Olgeta Seventi

Mi filim wan bigfala tangkyu from Buk blong Momon. Hem i bin jenisim laef blong mi blong oltaem, mo mi save se hem i save jenisim laef blong yu.

Mi gat 18 yia taem mi kam wan memba blong Jos. Buk blong Momon i bin plei wan ki pat blong jenis long laef blong mi. Long taem ia, mi bin stap lukaotem sam niu aedia we i save eksplenem wanem i stap long wol raon long mi. Mi tingbaot se ol profesa blong mi long skul oli tekem ol tingting blong wol ia blong stap tij. Mi stat blong lukluk i go long sam nara aedia abaot save ia se i gat wan God o nogat.

Wan dei, mi bin luk wan blu buk we sam misinari i bin livim long hom blong mifala samples sikis yia i pas finis. Hem i Buk blong Momon. Wetem buk ia, oli bin livim wan smol buk abaot Profet Josef Smit mo tu, sam instraksen long olsem wanem blong prea long God.

Mi bin stat blong ridim Buk blong Momon. Mi stat blong ridim sam ves nomo insaed long buk ia, long 1 Nifae, taem mi bin filim wan samting i defren. Mi stat blong faet wetem ol filing mo tingting blong mi. Mekem se mi disaed blong askem God long wan prea.

Hemia i bin fas taem long laef blong mi we mi bin stap nildaon blong prea. Eksperiens we i kam afta i kam wan long ol taem we i tabu moa long laef blong mi. Wan filing blong wan bigfala glad i fulumap mi, mekem se mi save long hat blong mi se Buk blong Momon i moa bitim wan buk nomo. Hem i wan buk we i kam long heven. Hem i gat toktok blong God. Samtaem afta, mi kam blong andastanem se filing ia i bin Spirit we i bin stap testifae long mi se buk ia i tru.

I gat sam we ating oli gat semmak eksperiens, be i gat ol defren wei we wan i save kam blong save se Buk blong Momon i tru.

Olsem Wanem Bae Yu Save?

1. Sam bae oli save taem bae oli harem samting long sora blong olgeta. Ating yu yu wan long olgeta we bae i save nomo taem yu lisin long wanem buk ia i stap tijim. Buk blong Momon i tokbaot plante taosen we oli bin harem ol boe blong Mosaea oli tijim gospel blong Jisas Kraes mo “oli bin jenisim laef blong olgeta long Lod” (luk long Alma 23:5–6). Ol misinari tedei, oli tijim semfala gospel ia we i stap long Buk blong Momon. Sam bae oli save se Buk blong Momon i toktok blong God nomo taem oli harem ol narawan oli serem ol tijing we oli stap insaed.

2. Sam bae oli save taem bae oli ridim. Ating yu yu wan long olgeta we bae i save nomo taem yu ridim Buk blong Momon wetem wan tru hat blong save trutok. Hem i bin olsem long waef blong mi. Hem i bin gat 12 yia taem hem i bin putum long hat blong hem se bae hem i folem instraksen blong ridim buk stat long stat i go kasem en. Taem hem i bin mekem, hem i bin save se hem i tru. Filing ia i bin strong tumas we, taem hem i bin ridim, hem i bin mekem tingting blong folem Sevya blong oltaem. Hem i bin stap tru long wanem we hem i bin filim.

3. Sam bae oli save taem oli mekem. Ating yu yu wan long olgeta we bae i save nomo taem i mekem olgeta samting we buk ia i stap tijim. Sam pipol oli kasem testemoni blong olgeta bae oli mekem (luk long Jon 7:17). Nifae, wan profet blong Buk blong Momon, i bin andastanem gud prinsipol ia. Hem i bin raetem se blong “save winim ful tingting blong olgeta blong oli bilif long Lod, Ridima blong olgeta, … mi bin yusum evri skripja long laef blong mifala, blong hem i save stap blong helpem mo lanem mifala” (1 Nifae 19:23; oli ademap italik). Taem yumi putum, o yusum ol tijing blong Buk blong Momon long laef blong yumiwan, yumi save kam blong save stret se buk ia i kam wea.

4. Sam bae oli save taem oli askem long God. Ating yu yu wan long olgeta we bae i save taem yu ridim Buk blong Momon mo afta, askem long Papa long Heven long prea sapos buk ia i tru. Hemia i wanem mi mi gotru long hem. Hem i bigfala promes we wan nara profet blong Buk blong Momon, Moronae, i givim long evriwan we oli gat tru tingting blong lukaotem trutok: “Luk, mi wantem askem strong long yufala se taem we bae yufala i ridim ol samting ia, sapos hem i waes tingting long God se bae yufala i ridim olgeta … se bae yufala i askem God, Papa we i no Save Finis, long nem blong Kraes, sapos ol samting ia i no tru; mo sapos bae yufala i askem wetem wan tru hat, wetem tingting we i tru blong wantem save, wetem fet long Kraes, bae hem i soemaot trutok blong ol samting ia long yufala, tru long paoa blong Tabu Spirit” (Moronae 10:3–4). Mi talem witnes blong mi se sapos yu ridim mo prea abaot Buk blong Momon, mo folem ol toktok blong Moronae, bae yu save se buk i tru.

God I Bin Promesem se Bambae Yu Save

Sapos yu wantem save tru, bambae yu kam blong save se Buk blong Momon i tru. God i bin promesem blong givim save ia long olgeta we oli gat ones tingting blong lukaotem trutok, mo Hem i wan “God blong trutok, mo [Hem i] no save giaman” (Ita 3:12).

Wan nara profet blong Buk blong Momon, Alma, i bin tijim boe blong hem se God i bin promesem se bae “hem i sevem [buk] ia blong wan waes stamba tingting long hem, blong hem i save soemaot paoa blong hem long ol fiuja jeneresen. Mo nao luk, wan stamba tingting hem i bin mekem i hapen finis, we i long kambak blong plante taosen long ol man blong Leman long save blong trutok; mo hem i bin soemaot paoa blong hem wetem olgeta, mo tu bae hem i soemaot paoa blong hem wetem olgeta long ol fiuja jeneresen; taswe bae oli sevem [buk ia]” (Alma 37:18–19).

Semfala paoa ia blong winim tingting blong man i stap tedei long wan ful buk blong skripja ia, mo Lod bae i soem long eniwan we i gat tru tingting blong wantem save. Mi save talem hemia wetem stret save taem mi stap lukbak long ol dei ia taem mi bin stap lanem abaot Jos. Tedei, from paoa ia blong Buk blong Momon blong winim tingting blong man, mi testifae se Buk blong Momon i toktok blong God, se hem i tijim se Jisas i Kraes, Tabu Mesaea. Buk ia i wan pruf we man i save holem, we i pruvum se Restoresen blong gospel blong hem i bin tekem ples, mo Josef Smit i wan profet blong God.

Sapos yu wan long olgeta we i stap tru blong stap lukaotem trutok, Lod i bin promesem se bambae yu save. Bae yu save kam blong save taem yu lisin long ol tijing blong buk ia, taem yu ridim buk, taem yu mekem wanem we buk ia i stap tijim, taem yu stap prea blong save se hem i tru o no, o taem yumi mekem evriwan long olgeta. Be bambae yu save stret.

Promes blong Moronae

Long en blong Buk blong Momon, wan profet we nem blong hem i Moronae, i promesem se sapos yumi ridim Buk blong Momon, tingting hevi long ol mesej blong hem insaed long hat blong yumi, mo askem God long prea sapos hem i tru, God bae i ansarem yumi tru long paoa blong Tabu Spirit (luk long Moronae 10:3–5).

Revelesen blong yuwan i blong yuwan. Hem i kam long ol defren rod mo long ol defren taem long wanwan long yumi folem tingting blong Lod. Taem yu andastanem olgeta prinsipol ia we i kam afta, bae i helpem yu blong kam blong save samting yuwan.

1. Tingting long Hem

Bifo hem i invaetem yumi blong prea, Moronae i invaetem yumi blong tingting hevi. Blong tingting hevi i minim blong tingting wetem ful tingting blong yu. Aksem yuwan: Mi filim olsem wanem taem mi ridim Buk blong Momon? From wanem mi filim olsem? Wanem nao mi bin lanem? Hem i gud o no?

Lod i bin tijim prinsipol ia long Oliva Kowdri. Oliva Kowdri i no mekem wan samting moa, be hem i askem nomo. Lod i talem long Oliva Kowdri se hem i mas stadi long samting ia long maen blong hem; afta, hem i mas askem long Lod sapos hem i stret, mo sapos hem i stret, bae Lod i mekem hat blong hem i wom (luk long D&C 9:7–8; oli ademap italik).

2. Prea Wetem Strong Tingting

Blong putum tingting blong yumi nomo long ol kwaet ansa blong Tabu Spirit i nidim paoa long tingting. Ating from hemia nao Inos i stap tokbaot, long Buk blong Momon, se prea blong hem i olsem “traehad … long fored blong God” (Inos 1:2).

Taem yu stap ridim, tingting hevi, o prea, faenem wan taem mo wan ples we i no gat tumas samting i pulum tingting blong yu. Faenem wan posisen we i save helpem yu blong yu putum ful tingting blong yu long prea. Blong stap prea long wan laod voes i save helpem yu blong putum ful tingting blong yu long prea.

3. Askem Ol Stret Kwestin

Lod i bin talem long Oliva Kowdri blong no jes stap askem samting, be blong askem sapos tingting we hem i gat i stret. Plante taem, speseli taem yumi no gat tumas eksperiens blong kasem ol ansa we i kam long Papa long Heven, hem i moa isi blong andastanem ansa long wan simpol kwestin we ansa blong hem i yes o no.

“Wan ki blong wan gudfala prea i blong lanem blong askem ol stret kwestin.” Hemia Elda Rijad G. Skot blong Kworom blong Olgeta Twelef Aposol i bin tijim.¹

4. Wanem Nao Yu Stap Tingting blong Mekem?

Wan long ol ki blong promes blong Moronae i blong wanem yumi askem, yumi askem wetem ful tingting.” Presiden Henri B. Aering, Fas Kaonsela long Fas Presidensi i bin talem se taem Josef Smit we i bin gat 14 yia i go long bus blong prea, “hem i bin prea wetem tingting ia blong lisin, be tu, wetem tingting blong obei.” Mo “… from hem i bin fetful, long ol dei mo manis mo yia bifo, ansa blong ol prea blong hem oli kam olsem wan bigfala wota blong laet mo trutok.”²

5. No Mestem

I no evri revelesen we i hapen olsem wan bigfala samting. Sam pipol oli gat ol drim, ol visen, o ol visit. Be plante long yumi bae i gotru wan samting we i kwaet mo i naes, olsem wan gudgudfala filing blong pis.

Presiden Spensa W. Kimbol (1895–1985), namba 12 Presiden blong Jos, i bin tijim se: “Taem i ting se bigfala samting bae i hapen, nao hem i nomo luksave we God i stap givim revelesen oltaem.”³

Olsem Wanem Nao Mi Save

Nomata mi bin kasem baptaes taem mi bin gat naen yia, famle blong mi i no bin strong insaed long Jos. Be taem mi gat 13 yia, ol misinari oli bin invaetem mi blong go long jos mo mi bin go. Mi bin go tu long seminari. Stadi kos i bin Doktrin blong Ol Kavenan, we mi luk se i stap mekem mi konfius. Speseli, mi stap traehad wetem Josef Smit mo Buk blong Momon. Mi bin wantem blong faenem God, be mi no save stret se bae mi mekem olsem wanem mo weaples.

Wetem taem, mi bin tingting plante abaot ol storian we mi gat wetem ol misinari. Mi tingting abaot seminari. Mi tingting abaot ol storian we mi bin gat wetem ol memba blong ol narafala relijin. Wanwan taem, mi bin prea blong save wanem we i stret, be mi no tingting tumas long hem, i no wan kwestin we i kam long hat blong mi. Afta, wan naet, mi bin disaed blong prea wetem “tru hat” blong mi.

Mi bin talem long Papa long Heven se mi bin wantem blong save Hem mo kam pat blong tru Jos blong Hem. Mi bin promes olsem: “Sapos Yu, Papa, Yu letem mi save se Josef Smit i wan tru profet o sapos Buk blong Momon i tru, bae mi mekem wanem we Yu wantem mi blong mekem. Sapos Jos blong Jisas Kraes blong Ol Lata-dei Sent i tru Jos, bae mi folem Jos ia mo neva givap.”

I no gat wan bigfala samting i bin hapen, be mi bin filim wan pis mo mi go long bed. Plante aoa afta, mi wekap wetem wan stret tingting: “Josef Smit i wan tru profet mo Buk blong Momon i tru.” Tingting ia i kam wetem wan pis we mi no save tokbaot. Mi slip bakegen, mo mi wekap afta wetem stret tingting mo filing ia bakegen.

Stat long taem ia, mi neva gat tu tingting se Josef Smit i wan tru profet. Mi save se hemia i from wok blong Sevya mo Papa long Heven bae i ansa long ol tru prea blong yumi.

Rodolfo Armando Perez Bonila, El Salvado