Bok in Mormon
Juon Kam̧ool āinļo̧k wōt Baibōļ eo
Ilo kajokkun wōt juon ippān kakien eo an baibōļ me “kōn lo̧n̄in ruo ak jilu ri kōnnaan renaaj kapen naan otemjej” (2 Korint 13:1), jimo̧r Bok in Mormon im Baibōļ eo rej kam̧ool kōn Jisōs Kraist im pedped ko ilo ko̧jpeļ eo An. Eļtōr Russell M. Nelson an Doulul eo an Jon̄oulruo Rijilōk ro eaar kwaļo̧k bwe “jeje ko rej kapen an doon kam̧ool. Katak in kar kōm̧eļeļeiki etto ke juon rikanaan eaar je bwe Bok in Mormon kar ‘je n̄an kōttōpar eo me kom̧ maron̄ tōmak [Baibōļ eo]; im eļan̄n̄e kom̧ij tōmak [Baibōļ eo] kom̧ naaj tōmak [Bok in Mormon] ej barāinwōt’ [Mormon 7:9]. Kajjojo bok kein rej kōnono kōn doon. Kajjojo bok ej jutak āinwōt kein kam̧ool bwe Anij ej mour im ej kōnono n̄an ajri ro Nejin kōn m̧adenļo̧k n̄an rikanaan ro An.”1
Itulaļ ej juon laajrak in katak ko m̧oktata kar katakin ilo Baibōļ eo me Bok in Mormon ej kobaik tok dam̧oļo̧k in juon kam̧ool.
Mijen eo an Jisōs Kraist
Baibōļ im Bok in Mormon eo rej kam̧ool kōn Jisōs Kraist, eo Nejin Anij, im Pinmuur eo An. Rej katakin bwe Rilo̧mo̧o̧r eo eaar bōk ioon Make jerawiwi ko ad im anjo̧ ioon mej.
Make Wōt Nejin Eaar Keotak
Baibōļ: “Bwe kōn an Anij yokwe laļ, Ear letok juōn wōt Nejin Ear keotak, bwe jabdewōt eo ej lōke E en jab jako, a en mour indeeo” (Jon 3:16; lale barāinwōt Matu 16:16; Jon 6:69).
Bok in Mormon: “I jeļā bwe Jisōs Kraist Enaaj itok, aaet, eo Nejin, eo Nejin E make Keotak in Jemān, obrak kōn jouj, im tiriam̧o, im m̧ool’ (Alma 5:48; lale barāinwōt 1 Nipai 11:16–21; Mosaia 3:5–8).
Pinmuur kōn Jerawiwi ko Ad
Baibōļ: “Bwe men in daō da in kallim̧ur, eo e to̧o̧r kōn kōn elōn̄ n̄an juurļo̧k jero̧wiwi ko” (Matu 26:28; lale barāinwōt Hibru 9:28; 1 Piter 3:18).
Bok in Mormon: “Lo, Eaar ajeļo̧k E make juon katok kōn jerawiwi, n̄an uwaake jem̧ļo̧k in kien eo, n̄an aolep ro ewōr aer bōro erup im jetōb ettā” (2 Nipai 2:7; lale barāinwōt 1 Nipai 11:33; Alma 34:8–10; 3 Nipai 11:14).
Kar Inek Buromōj ko Ad
Baibōļ: “E m̧ool Ear inek en̄taan ko ad, im bōkļo̧k būrom̧ōj ko ad” (Aiseia 53:4; lale barāinwōt Hibru 2:18).
Bok in Mormon: “Im Enaaj ilo̧k, en̄taan kōn metak ko im kaen̄tanaan ko im kapo ko otemjelo̧k; … bwe En maron̄ jeļā ekkar n̄an kanniōk ekōjkan jipan̄ armej ro An ekkar n̄an mōjino ko aer” (Alma 7:11–12; lale barāinwōt Mosaia 14:3–5).
Anjo̧ Ioon Mej
Baibōļ: “A kiiō em̧ōj an Kraist jerkakpeje jān ro re mej, leen m̧oktata iaan ro rej kiki” (1 Korint 15:20; lale barāinwōt Jon 14:19; Jerbal 26:23).
Bok in Mormon: “Leke Jisōs Kraist, bwe E ej eo Nejin Anij, im bwe Eaar mej jān ri Ju ro, im jān kajoor eo an Jemān Eaar bar jerkak, eo kōn menin Eaar bōk anjo̧ ioon lōb eo” (Mormon 7:5; lale barāinwōt Mosaia 16:7–8; Hilamōn 14:17).
Karōk eo an Anij n̄an Kōj
Baibōļ im Bōk in Mormon eo rej katakin bwe Anij ej Jemedwōj Ilan̄, Āinwōt an jim̧we, Eaar kepooj juon “karōk in lo̧mo̧r” (Alma 24:14) me jemaron̄ in bōk lo̧mo̧r kōn Pinmuur eo an Jisōs Kraist.
Jemed ilo Lan̄ Em̧m̧an
Baibōļ: “Bwe ilo E jej mour, im etetal, im pād, āinwōt jet iaan ro ami ri kine al raar ba, Bwe kōj barāinwōt ro nejin” (Jerbal 17:28; lale barāinwōt Sam Ko 82:6; Hibru 12:9).
Bok in Mormon: “Ijeļā bwe [Anij] ej iakwe aolep ro nejin” (1 Nipai 11:17; lale barāinwōt 1 Nipai 17:36).
Mej im Laļ eo an Jetōb
Baibōļ: “Im būn̄al ej jepļaak n̄an bwidej āinwōt e kar m̧okta: im an ej jepļaak n̄an Anij eo Eaar leļo̧k e (Ekklisiastis 12:7; lale barāinwōt 1 Piter 3:19–20; 4:6).
Bok in Mormon: “Jetōb ko an aolep armej, mekarta n̄e rem̧m̧an ak renana, rej ilo̧k n̄an jikier n̄an Anij eo eaar leļo̧k n̄an er mour” (Alma 40:11; lale barāinwōt eoon 12–14).
Jerkakpeje
Baibōļ: “Im ālikin an jako kilō, ilo ānbwinnō in wōt inaaj lo Anij” (Job 19:26; lale barāinwōt Ezekiel 37:12; 1 Korint 6:14; 15:54).
Bok in Mormon: “Ijeļā bwe kom̧ ke ānbwinid renaaj m̧adeon̄eon̄ļo̧k im mej; mekarta, ilo ānbwin kein ad jenaaj lo Anij” (2 Nipai 9:4; lale barāinwōt 2 Nipai 9:12; Alma 11:43–45; 40:23).
Kien ko rej Letok Tōl
Baibōļ eo ej katakin bwe kien ko an Anij rej letok im naaj kōjeram̧m̧an kōj n̄e jej pokake. Rikanaan ro ilo Bok in Mormon rej barāinwōt jeiki im ļoor kien ko.
Kōjeram̧m̧an ko jen Pokake
Baibōļ: “Im Jeova ear jiron̄ kōm bwe jen kōm̧m̧an kien kein otemjej, im mijak Jeova ad Anij, n̄an ad jeraam̧m̧an iien otemjej, bwe en kōjparok kōj je mour. … Im enaaj men in wānōk ipped, eļan̄n̄e jej pokake aolepen kien in” (Duteronomi 6:24–25; lale barāinwōt Jabōn Kōnnaan Ko 4:4; Jon 14:21).
Bok in Mormon: “Eaar kalikkare n̄an kom̧ bwe eļan̄n̄e kom̧ naaj kōjparok kien ko An kom̧ naaj jeram̧m̧an ilo āneo; im E jamin kar ukoktak jān ta eo Eaar ba; kōn menin, eļan̄n̄e kom̧ij kōjparok kien ko An E ej kam̧ōņōņō im kōjeram̧m̧an eok” (Mosaia 2:22; lale barāinwōt 2 Nipai 1:20).
Kien ko Jon̄oul
Baibōļ: Irooj eaar kwaļo̧k Kien ko Jon̄oul n̄an Moses (lale Exodus 20:1–17).
Bok in Mormon: Abinadi eaar katakin Kien ko Jon̄oul n̄an pris ro an Kiin̄ Noa (lale Mosaia 12:33–36; 13:12–24).
Juon M̧ōttan Jon̄oul
Baibōļ: “Komwin bōktok aolepen m̧ōttan jon̄oul eo n̄an m̧ōn kakoņkoņ eo bwe en wor m̧ōn̄ā ilo m̧weo Im̧ō” (Malakai 3:10; lale barāinwōt Leviticus 27:30).
Bok in Mormon: “Eaar ejja Melkisedek in wōt eo Ebream eaar kōļļā joortak ko; aaet, em̧ool eo jemād Ebream eaar kōļļā juon m̧ōttan jon̄oul in men ko aolep an” (Alma 13:15; lale barāinwōt 3 Nipai 24:8–10).
Peptaij im Jetōb Kwojarjar
Baibōļ: “Eļan̄n̄e armej e jab ļotak jān dān im Jetōb, e ejab maron̄ deļo̧n̄ ilo aelōn̄ in Anij” (Jon 3:5; lale barāinwōt Mark 16:16; Jerbal 2:36–38).
Bok in Mormon: “Kom̧in ukweļo̧k, kom̧ aolep jeban ko an laļ, im itok n̄an Eō im baptais ilo Eta, bwe kom̧in maron̄ kokwojarjar jān bōke Jetōb Kwojarjar, bwe kom̧in maron̄ jutak ilo ejjeļo̧k lipijinjin im̧aō ilo raan eo āliktata” (3 Nipai 27:20; lale barāinwōt 2 Nipai 9:23; 31:5–9).
Kabun̄ eo an Jisōs Kraist ilo Tōre ko Etto
Irooj eaar kajutak Kabun̄ eo An ilo Jerusalem im ilo Amedka. Baibōļ im Bok in Mormon rej kam̧ool bwe Eaar ejaake im tōl armej ro An kōn rikanaan ro im rijilōk ro.
Rikanaan ro
Baibōļ: “Ilo m̧ool Irooj Jeova e jab kōm̧m̧an jabdewōt n̄e ab Ej kwaļo̧k pepe eo An n̄an ro ri karijeran, rikanaan ro” (Amos 3:7; lale barāinwōt Jeremiah 1:7; 7:25).
Bok in Mormon: “Jān jetōb men otemjej rej waļo̧k n̄an rikanaan ro” (1 Nipai 22:2; lale barāinwōt Jekab 4:4–6).
Jon̄oulruo ro
Baibōļ: “Ej an̄in̄intok ro rū kaļoran, im Ej kāālōt jon̄oul im ruo ļo̧k iaer, im Ej likūt etaer ri jelōk” (Luk 6:13; lale barāinwōt Epesōs 2:19–20; 4:11–14).
Bok in Mormon: “Em̧ōņōņō kom̧ eļan̄n̄e kom̧ naaj eo̧ron̄ naan ko an rein jon̄oulruo ro Iaar kālōt jān ilubwilijimi n̄an jipjipan̄ kom̧” (3 Nipai 12:1; lale barāinwōt 1 Nipai 11:29).
Mālim eo an Priesthood
Baibōļ: “Kom̧ ar jab kāālōt Eō, a N̄a Iar kāālōt kom̧, im likūt kom̧ bwe kom̧win ilo̧k im jebar leen, im bwe leen eo ami en pād wōt” (Jon 15:16; lale barāinwōt Matu 16:19; Luk 9:1–2; Hibru 5:4).
Bok in Mormon: “[Alma] eaar kapit pris ro im elder ro, kōn likūt pā ko ekkar n̄an laajrak eo an Anij, n̄an tōl im oņaake Kabun̄ eo” ( Alma 6:1; lale barāinwōt 2 Nipai 6:2; Moronai 3).
Kein Ekkatak Ko Jet
Jaat in ejjab juon laajrak eo ededeļo̧k. Ej m̧ōttan wōt kein ekkatak eo am̧ make ak katak jeje ko rekwojarjar an baam̧le, kom̧ maron̄ kobaik eoon in jipan̄ ko n̄an jaat in im pukōt elōn̄ pedped ko kar katakin ilo Bok in Mormon im Baibōļ eo kōjerbal Topical Guide eo ak Guide to the Scriptures im kein ekkatak ko ilo online ilo scriptures.lds.org.
Pija in Harold B. Lee jān Doyle Shaw, jipan̄ jān Church History Museum