Anaa sa mga Balita
Himoanan og Pelikula sa Jerusalem Gipahinungod
Ang Himoanan og Pelikula sa Jerusalem nga gitukod sa Simbahan alang sa mga produksyon sa salida nga may tema sa ebanghelyo gipahinungod ug sa karon gigamit na alang sa paghimo og pelikula. Kini unang gigamit sa paghimo sa New Testament Scripture Library Project—usa ka sunod-sunod nga mga video nga nagpakita og importante nga mga eksena gikan sa mga kinabuhi ni Jesukristo ug sa mga Apostoles.
Ang dapit nahimutang sa LDS Motion Picture Studio South Campus sa Goshen, Utah, USA, dili mominos sa 60 ka milya (97 km) habagatan sa mga punoang buhatan sa Simbahan sa Siyudad sa Salt Lake. Kini dili kopya nga hulagway sa Jerusalem, apan usa ka paghimog usab sa importante nga mga dapit diha sa siyudad.
Ang gamay nga lungsod sa Goshen napili tungod sa pagkasusama sa palibut nga dapit sa hiyograpiya sa Jerusalem—mga bungtud-bungtod, mga kapatagan, mga kakahoyan nga cedar, pinadpad nga mga balas, ug usa ka sapa. Ang duol nga Utah Lake mobarug alang sa Dagat sa Galilea.
Sa pipila ka mga sitwasyon, ang daw tinuod nga mga gi-computer nga talan-awon mohulip sa mga detalye sa dapit nga dili makit-an.
Mga Palisiya sa Hingkod nga mga Misyonaryo Giusab
Ang Unang Kapangulohan ug ang Korum sa Napulog Duha ka mga Apostoles bag-ohay nga mitugot og mga kausaban diha sa mga palisiya kalabut sa gidugayon sa serbisyo ug pinuy-anan sa senior missionary sa pag-awhag og daghan pa nga mga magtiayon sa pagserbisyo og full-time nga mga misyon ug sa pagpalambo sa ilang kasinatian.
Gisugdan niadtong Septyembre 1, 2011, ang mga magtiayon mahimo na karong moserbisyo sulod sa 6, 12, 18, o 23 ka bulan. Agi og dugang, limitado sa $1,400 (US) matag bulan ang gimugna alang sa mga bayranan sa pinuy-anan. Ang mga magtiayon mopadayon sa pagbayad alang sa pagkaon ug uban nga personal nga mga galastoan.
Kaniadto, ang palisiya mao nga ang mga magtiayon nga nagserbisyo sa gawas sa ilang nasud gitawag sa dili mominos sa 18 ka bulan. Kadto kinsa nanghinaut nga moserbisyo sa gawas sa ilang nasud nga pinuy-anan sulod sa dili mominos sa 18 ka bulan makahimo na karon kon sila mobayad alang sa ilang kaugalingon nga transportasyon padulong ug pauli gikan sa misyon.
Ang mga pangutana mahitungod sa hingkod nga mga misyon mahimong ipadala ngadto sa seniormissionaryservices@ldschurch.org.
Simbahan Nagpalapad sa Gidaghanon sa Pinulongan sa Online
Ang LDS.org nagpauswag sa gidaghanon sa pinulongan. Sa pagkakaron 48 ka bag-o nga home page sa pinulongan ang gidugang ngadto sa opisyal nga website sa Simbahan. Pinaagi sa pag-klik diha sa bisan hain nga pinulongan ubos sa “Languages” nga link diha ibabaw sa tuo nga dapit sa bisan hain nga pahina sa LDS.org, ang mga bisita makakita og mga link ngadto sa materyal sa Simbahan nga karon anaa sa online niana nga pinulongan.
Lain-lain nga mga seksyon sa LDS.org sa kadugayan maanaa sa 10 ngadto sa 15 ka mga pinulongan. Diha niana nga higayon, ang pahina sa pinulongan alang niadto nga mga pinulongan dili na gamiton. (Sama pananglit, walay pahina sa pinulongan alang sa Iningles, Pranses, Aleman, Italyan, Portuguese, o Kinatsila, tungod kay kadto nga mga pinulongan aduna nay daghan sa LDS.org sa ilang pinulongan.)
Ang mga empleyado sa Simbahan nagtrabaho usab sa paghimo sa mga magasin ug uban nga gihubad nga mga materyal gikan sa LDS.org nga maanaa sa mga cell phone.
Ang bag-o nga himoanan og pelikula sa Simbahan diha sa Goshen, Utah, pagagamiton sa pagpelikula og mga eksena gikan sa kinabuhi ni Jesukristo ingon nga girekord diha sa Bag-ong Tugon.
© IRI