Fakatoka ʻo ha Fakavaʻe ʻe Tolongá

Palesiteni Henry B. Eyring, Tokoni ʻUluaki ʻi he Kau Palesitenisī ʻUluakí, “Ngaahi Faingataʻa ke Ikunaʻi,” Liahona, Mē 2012, 24.

ʻI heʻeku kei talavoú ne u ngāue ki ha taha ngāue totongi ki hono ngaohi e ʻū fakavaʻe ʻo e ngaahi fale foʻoú. Ko ha ngāue faingataʻa ia ʻi he faʻahitaʻu māfaná ke teuteuʻi e kelekelé ke huaʻi ai e sima ki he fakavaʻé. Ne ʻikai ha mīsini. Ne mau fakaʻaongaʻi pē ʻa e meʻangāue ki hono fahí mo e sāvoló. Ko ha ngāue faingataʻa he ngaahi ʻaho ko iá hono fakatoka ʻo ha fakavaʻe ʻe tolongá.

Naʻe toe fie maʻu mo ha kātaki lahi. Hili hono huaʻi e simá ki he fakavaʻé te mau tatali ke mōmoa. Neongo ʻemau loto ke hoko atu e ngāué ka naʻa mau tali foki ke mōmoa e fakavaʻé kae toki toʻo e ʻū poupoú.

Ne toe fakaofo ki ha tokotaha langa foʻou ke sio ki he taimi mo e ngāue lahi ʻo hono fakatoka e ngaahi kongokonga ukameá he papá ke fakamālohia ʻaki e fakavaʻé.

Kuo pau ke teuteuʻi lelei ʻi he founga tatau ʻa e kelekele ki hono fakavaʻe ʻetau tuí ke ne matuʻuaki e afā ʻe hoko mai he moʻuí. Ko e angatonu fakatāutahá ʻa e tefito fefeka ki hono fakavaʻe ʻo e tuí.

Te tau fakatupu ha kelekele fefeka ki heʻetau tuí ʻi heʻetau fili maʻu ai pē ʻa e meʻa ʻoku totonú. ʻE lava ke kamata kei siʻi ia koeʻuhí he ʻoku fāʻeleʻi mai e taha kotoa pē mo e meʻaʻofa taʻetotongi ko e Laumālie ʻo Kalaisí. Te tau lava ke ʻilo mei he Laumālie ko iá e taimi ne tau fai ai e meʻa ʻoku totonú ʻi he ʻao ʻo e ʻOtuá mo e taimi ʻoku tau faihala ai ʻi Hono ʻaó.

ʻOku hanga ʻe he ngaahi fili nai ʻe laungeau ʻoku tau fai he ʻaho kotoa peé ʻo teuteu e kelekele fefeka ʻoku langa ai hotau fale ʻo e tuí. Ko e ongoongolelei ʻo Sīsū Kalaisí mo e kotoa hono ngaahi fuakavá, ouaú mo e tefitoʻi moʻoní, ʻa e ukamea ʻokú ne ʻākilotoa ʻetau tuí.

Ko e taha e ngaahi kī ki ha tui ʻe tuʻuloá ko hono fakafuofuaʻi ke tonu e taimi te tau tuku ki ai ke moʻuí. …

ʻOku fie maʻu ha taimi lahi ia ke te matuʻotuʻa ai he ʻoku ʻikai hoko mai ia he taimi pē ko iá. ʻOku ʻikai maʻu ia heʻete taʻu motuʻá. Ka ko e tauhi maʻu pē ki he ʻOtuá mo e niʻihi kehé ʻaki hotau lotó, mo e ʻatamaí kotoa pea ʻe liliu ai e fakamoʻoni ʻo e moʻoní ke hoko ko ha mālohi fakalaumālie he ʻikai lava ke toe veuki.

Ngaahi Fehuʻi ke Fakalaulauloto ki aí:

ʻOkú ke lava nai ʻo manatu ki ha taimi naʻe siviʻi ai hoʻo angatonu fakatāutahá? Ko e hā e tali naʻá ke fai ki aí?
Ko e hā founga ʻoku hanga ai ʻe hoʻo tauhi ki he ʻOtuá mo e tokoni ki he niʻihi kehé ʻo fakamālohia ho fakavaʻe fakalaumālié?

Fakakaukau ke hiki hoʻo ngaahi fakakaukaú ʻi hoʻo tohinoá pe aleaʻi ia mo ha niʻihi kehe.