Vakai ki he Peesi Fakaʻosí
Natalia Sepakova, ʻIukuleini, ʻo hangē ko hono fakamatala kia Pavalina ʻUpikó
ʻI heʻeku kau ki he Siasí, naʻá ku vēkeveke ke u kau atu ki he ngāue ʻi he hisitōlia fakafāmilí. Naʻe kamata ke u ʻaʻahi ki ha ngaahi tauhiʻanga lēkooti fakalotofonua ke fekumi ki he ngaahi fakamatala ʻo ʻeku ngaahi kuí mei ha ngaahi lekooti kuo tuku atu ki he kakaí.
Naʻe fakafiefia e ngāué, ka naʻe ʻikai ke faingofua maʻu pē. Naʻe faʻa faingataʻa ke lau e tohinima motuʻá, pea ne tuhituhi e ngaahi tohí ʻe niʻihi, ʻa ia ne uesia lahi ai ʻa hoku mahaki helá. Ka ne u kei hokohoko atu e fekumí ʻi he lelei taha ne u ala lavá.
Naʻá ku fekumi ʻi ha ʻaho ʻe taha ki heʻeku kuitangatá, ʻou kumi hono ʻaho fāʻeleʻí. Naʻá ku maʻu ha tohi peesi ʻe 1,500 ne ngali ʻaonga kiate au. Kae fēfē kapau he ʻikai maʻu e tali naʻá ku fie maʻú? Naʻá ku manavasiʻi ke fekumi ʻi ha ngaahi tohi lahi mo efua.
Naʻá ku kamata sio fakavavevave ki he tohí, mo fakaʻamu ke u fakatokangaʻi ha hingoa ʻoku ou ʻilo. Ne fakafokifā e hangē ne u ongoʻi ʻoku pehē mai ha taha, “Ko e peesi fakamuimui tahá.” Naʻá ku vakai takai holo, ka naʻe ʻikai ha taha ne lea mai kiate au. Naʻe hoko atu ʻeku lau tohí. Peá u toe ongoʻi e lea tatau pē: “Ko e peesi fakamuimui tahá.” Naʻá ku vakaiʻi ʻi he loto veiveiua e peesi fakamuimui tahá. Naʻá ku maʻu ai e fakalea angamahení: ko ha fakamatala nounou ʻo e fānau naʻe fāʻeleʻí mo e lahi fakakātoa ʻo e ngaahi pēsí. Ne u vakaiʻi e peesi kimuʻa ʻi he peesi fakaʻosí, ka naʻe ʻikai maʻu ai ha meʻa ʻe ala tokoni mai, ko ia ai naʻá ku toe foki ki he peesi naʻá ku tomuʻa laú.
Ne toe tohoakiʻi ʻeku fakakaukaú ʻe he kiʻi leʻo siʻi mo vilitakí: “Ko e peesi fakamuimui tahá!” Naʻá ku toe fakakaukau ke toe huke ki he peesi fakamuimui tahá peá u toutou lau e fakalea angamahení.
Naʻá ku fakatokangaʻi leva ha meʻa ne ʻikai te u ʻiloʻi kimuʻa: ko ha peesi makehe naʻe fakapipiki ʻi he takafi ʻi muí. ʻI heʻeku lau e tohinima ʻi he pēsí, naʻá ku vakai ai ki ha ngaahi hingoa ʻo e fānau naʻe fāʻeleʻi ʻi he konga kimui ʻo Tīsemá. Naʻá ku ʻiloʻi ai e hingoa ʻo ʻeku kui tangatá peá u vakai ai ki he feituʻu mo e taimi naʻe fāʻeleʻi mo papitaiso ai iá. Naʻá ku ʻohovale mo loto houngaʻia ʻi hono takiekina au ki he fakamatala naʻá ku fie maʻú.
ʻE lava pē ke faingataʻa e hisitōlia fakafāmilí ʻi he taimi ʻe niʻihi, ka ʻoku ou ʻiloʻi ʻoku tataki mo tokoniʻi kitautolu ʻe he ʻOtuá ʻi heʻetau ngaahi feingá.