Kuo Teʻeki ai Ke ke ʻAukai
Keti Konisiteni, Kuatalupe
Naʻá ku fiefia ʻi heʻeku hoko ko ha faʻē kei talavou ʻi he 1998. Ka naʻá ku hohaʻa lahi ʻi ha ʻaho ʻe taha ʻi heʻeku fakatokangaʻi e hapotu e mānava ʻeku tamasiʻi mahina-onó ʻo ʻikai lava ai ke ne folo ha meʻa. Ne vave hono fakamatalaʻi mai ʻe he toketaá ko e mahaki ʻokú ne moʻua ai ʻoku fekauʻaki ia mo e halanga mānavá (bronchiolitis), ʻa ia ko ha fufula ʻo e fanga kiʻi halanga ʻea iiki ʻaupito ki he maʻamaʻá ʻi hano fakatupu ʻe ha vailasi. Naʻá ne ʻomai e faitoʻó mo ha founga fakamalohisino.
Naʻe hoko e ngaahi ʻaʻahi ki he tokotaha fai-fakamālohisino ko ha ʻahiʻahi ia kiate au mo hoku fohá. Naʻá ne taʻefiemālie ki hono ueʻi holo iá, peá u manavasiʻi naʻá ne mamahiʻia mei he fakamalohisinó. Kae kehe, naʻá ku lotolahi pē ʻi he fakamatalaʻi mai ai ʻe he tokotaha faifakamalohisinó ʻa e ngaahi lelei ʻo e fakamalohisinó.
Neongo e faitoʻó mo e fakamālohisino, ka naʻe ʻikai ke fakalakalaka e tuʻunga ʻo ʻeku kiʻi tamasiʻí. Naʻe siʻisiʻi pē ʻene kaí, pea hoko atu pē e hapotu ʻene mānavá. Naʻe toe fakalahi ʻe he toketaá e lahi hono ʻave ki he tokotaha fai-fakamālohisino ke ma toe ʻaʻahi tuʻo 5 ki ai, makehe mei he 10 naʻá ma ʻosi faí.
Lolotonga ʻeku tatali ki heʻema ʻaʻahi hono 13, naʻá ku lau ha fakamatala ʻi he ʻōfisi ʻo e toketaá ʻoku pehē hono tefitó “ʻOku Tāmate ʻa e Mahaki Fekauʻaki ʻo e Halanga Mānavá (Bronchiolitis).” ʻI heʻeku lau iá, ne u ʻilo ʻe lava pē ke mate ʻeku kiʻi tamasiʻí. Ne u ongoʻi ʻo hangē ne faingataʻaʻia hoku mafú. ʻI he ʻosi ʻa e fakamālohisinó, naʻe talamai ʻe he tokotaha fai-fakamālohisino ne ʻikai ha fakalakalaka ʻi he tuʻunga ʻeku tamasiʻí. ʻOku ʻikai mahino pe naʻe anga fēfē ʻeku aʻu ki ʻapí he naʻe ʻikai ke u meimei lava ʻo sio lelei ʻi heʻeku tangí.
Naʻá ku telefoni ki hoku husepēnití pea kamata ke u lotu. Naʻá ku fakahā ki heʻeku Tamai Hēvaní kapau ko Hono finangaló ke ʻave ʻa ʻeku kiʻi tamasiʻí, ʻe fie maʻu ke Ne ʻomi ha mālohi ke u matuʻuaki ia.
Hili ʻeku lotú ne u fakakaukau pe ko e hā ha meʻa te ma lava ʻo fai makehe mei heʻema ngaahi lotú mo e tāpuaki ʻo e lakanga fakataulaʻeiki naʻe maʻu ʻe heʻema kiʻi tamasiʻí. Naʻá ku hila atu ki he tukuʻanga tohí ʻou vakai ai ki ha tatau ʻo e Liahona (L’Étoile ʻi he taimi ko iá). Naʻá ku fakaava noa pē, ko e fekumi ki ha tokoni, peá u maʻu ai e fakamatala ʻoku tefito “Naʻá ku ʻAukai ki Heʻeku Pēpeé.” Peá u fanongo leva ki ha leʻo mahino naʻá ne pehē, “Kuo teʻeki ai ke ke ʻaukai maʻa hoʻo tamá.”
Naʻe teʻeki ai ke u fai ia, ko ia ai naʻá ku ʻaukai maʻana he taimi pē ko iá. Naʻá ku kei ʻaukai pē ʻi he taimi fakamālohisino he ʻaho hono hokó. Hili hono siviʻi hoku fohá, ne hangē ʻoku mataʻi ʻohovalé e tokotaha fai-fakamālohisinó.
Naʻá ne pehē mai, “Fineʻeiki, ʻoku sai pē ho fohá. ʻOku ʻikai mahino kiate au hono ʻuhingá, ka ʻoku ʻikai fie maʻu ia ke toe haʻu.”
Ne ʻikai ke u lava ʻo taʻofi e ngaahi loʻimata ʻo e fiefiá. ʻI heʻeku foki ki ʻapí, naʻá ku tūʻulutui ʻo fakamālō ki he ʻOtuá koeʻuhí ko ʻEne ʻaloʻofá mo e ʻofá. Naʻá ku tā telefoni ki hoku husepānití ke talaange ki ai e ongoongo fakafiefiá. Naʻá ku vete leva ʻeku ʻaukaí ʻi he loto fiemālie, ʻo ʻikai ha toe veiveiua ki he tokoni ʻa e ʻEikí.
Ne fakamoʻui hoku fohá koeʻuhí ko e tui, lotu, ngaahi tāpuaki ʻ o e lakanga fakataulaʻeikí, mo e ʻaukaí. ʻOku ʻikai te u veiveiua ʻoku ʻofaʻi au ʻe he Tamai Hēvaní pea ʻokú Ne ʻofa foki ki hoku fohá. ʻOku ou falala ʻe hokohoko atu ʻEne tokoni ke mau ikunaʻi e ngaahi faingataʻá.