Ko ʻEtau Tafaʻakí
Ko e Hā ʻOku Hoko Ai e Ngaahi ʻAhiʻahí?
ʻOku tau fifili he ngaahi taimi lahi ki he ʻuhinga ʻoku lahi ai ʻetau ngaahi palopalemá neongo ʻetau tauhi ʻa e ngaahi fekaú mo moʻui ʻaki ʻa e ongoongoleleí. Kuo pau ke ʻoua naʻa ngalo ʻiate kitautolu naʻa tau haʻu ki he māmaní ke siviʻi kitautolu. ʻI he taimi ʻoku tau ikunaʻi ai ʻa e ngaahi ʻahiʻahí pea fakahaaʻi ki he Tamai Hēvaní ʻi heʻetau ngaahi filí ʻoku tau ʻofa ʻiate Iá, te Ne tāpuekina kitautolu koeʻuhí ke pule ʻa e Laumālie ʻo e ʻEikí ʻi hotau fāmilí.
Kahelini V. (ʻi lalo), Venesuela
Fatongia ki he ʻOtuá
Kuó u ngāue ke fakakakato hoku Pale ʻo e Fatongia ki he ʻOtuá, ʻi he taimi naʻá ku nofo ai ʻi Venesuelá mo e taimi naʻá ku hiki ai mo hoku fāmilí ki Siainá.
Naʻe ueʻi fakalaumālie moʻoni ʻa e polokalama Fatongia ki he ʻOtuá. ʻE lava ʻe ha talavou ʻo ako ha ngaahi meʻa fakaofo te ne ngāueʻaki ʻi he toenga ʻo ʻene moʻuí ʻaki ʻene fakahoko e ngaahi taumuʻa ʻo e polokalamá. Te ne ako ha ngaahi meʻa fakalaumālie, fakatuʻasino, fakaenatula, mo ha ngaahi meʻa lahi ange.
ʻOku ʻaonga moʻoni ʻa e feinga ke foaki hoto taimí ke fakakakato e ngaahi taumuʻa ko ʻení. Kuó u ako ke u hoko ko ha tangata lelei ange, kuo tupulaki ʻeku fakamoʻoni ki he ongoongolelei ʻo Sīsū Kalaisí, pea kuó u mateuteu lelei ange ke maʻu ʻa e Lakanga Taulaʻeiki Faka-Melekisētekí pea ʻalu ʻo ngāue fakafaifekau. ʻOku fakafiefia ke u ʻiloʻi te u malava ke hoko ko ha faʻifaʻitakiʻanga lelei ki heʻeku fānaú ʻi ha ʻaho.
Sonatane A., Siaina
Ko e Potufolofola ʻOku ou Manako Taha Aí
ʻOkú ne fakamālohia ʻeku tuí ʻe he potu folofola ko ʻení he ʻoku fakahā ʻe Nīfai ʻokú ne kei talangofua pē mo fai ʻa ia ʻoku finangalo ʻe he ʻEikí ke ne faí neongo e ngaahi ʻahiʻahí. Pea ʻoku tāpuekina ai ia ʻe he Tamai Hēvaní.
Kaila T. (ʻi ʻolungá), Filipaini
Fakalakalaka Fakatāutahá
ʻI he ʻaho 27 ʻo Fēpueli, 2011, naʻá ku maʻu ai hoku Fakalāngilangi ʻo e Tuʻunga Fakafinemuí. ʻOku ou fiefia ʻi heʻeku fakakakato ʻa e polokalama Fakalakalaka Fakatāutahá, pea tauhi au ke u haohaoa mo maʻá, pea ʻoku ou laukauʻaki hono tui hoku mētalí. ʻOku ou ʻiloʻi ʻoku tokoniʻi kitautolu ʻe he houalotu ʻa e Kau Finemuí ke tau fakalakalaka mo mateuteu ke mali ʻi he temipale māʻoniʻoní. ʻOku ou houngaʻia ki heʻeku Tamai Hēvaní koeʻuhí ko e houalotu ko ʻení. Kuó u fakahoko e taha ʻo ʻeku ngaahi taumuʻá ʻi hono maʻu hoku mētalí, pea ʻoku ou ʻiloʻi te u lava ʻo hokohoko atu hono fai ha lelei lahi ʻi he ngāue ʻa e ʻEikí.
Katalina M., Venesuela
Ko Hono Maʻu ha Fakamoʻoni Fakatāutahá
Naʻá ku tupuʻi Siasi, pea naʻe ʻikai fuʻu mālohi ʻeku fakamoʻoní ka ne taʻeʻoua ʻeku lau loto fakamātoato ʻa e folofolá. Makehe mei hono lau e ngaahi lea ʻi he pepá, naʻá ku fekumi lahi ki honau ʻuhingá. Naʻá ku lau ʻa 3 Nīfai 11:3, peá u fakafehoanaki au ki he kakai ko iá. Naʻe ongo moʻoni kiate au e potu folofola ko iá mo e ngaahi folofola ne hoko atu aí. Naʻe hokohoko atu ʻeku lau e folofolá mo lotu fakamātoató, pea naʻe tupulaki ʻeku fakamoʻoní.
Laieni R., Uāsingatoni, USA