Ko ʻEkuSioloto Atu Kiate Au ʻi he Temipalé
Tā fakatātaaʻi ʻe Craig Stapley
Naʻe ʻi ai ha tangata matātangata he ngāueʻangá naʻá ne kole ke ma ʻalu ʻo ʻeva, pea naʻe ʻikai ko ha mēmipa ia ʻo e Siasí, ka naʻe ʻi ai haʻaku taumuʻa ke u mali ʻi he temipalé.
ʻI heʻeku kei siʻí, naʻá ku fie kau ki ha fāmili taʻengata. Naʻá ku taʻu 12 ʻi he taimi naʻe silaʻi ai hoku fāmilí ʻi he Temipale Sao Paulo Palāsilá. ʻOku ou manatuʻi lelei pē ʻa ʻeku tūʻulutui mo hoku fāmilí ʻi he ʻōlita ʻo e temipalé ʻo silaʻi kimautolu ki taimi mo ʻitānití. Naʻá ku ʻiloʻi ai ko e faʻahinga fāmili ʻeni naʻá ku fie maʻú. Naʻá ku fokotuʻu ha tā ʻo e Temipale Sao Pauló ʻi he tafaʻaki ʻo hoku mohengá, peá u sio ki ai ʻi he pō kotoa pē, ʻo fakafoʻou ʻeku tukupā ke ʻoua naʻá ku fiemālie ki ha meʻa ʻoku siʻi hifo ʻi he fāmili taʻengatá.
Hili ha ngaahi taʻu siʻi mei ai, naʻá ku ngāue ʻi he potungāue fefakatauʻaki ʻo ha kautaha lahi. Naʻe fakafeʻiloaki au ʻe homau pulé ki ha tokotaha ngāue foʻou ʻi ha ʻaho ʻe taha. Ko ha talavou palōloa kanoʻimata fakaʻofoʻofa mo lanu pulū, mata malimali, pea mo poto he teuteú.
Ne u ʻohovale ʻi he kamata ke ne fakakaumeʻa mai kiate aú. Naʻá ku ongoʻi fuʻu fiefia ʻaupito! Naʻá ku fiefia ke ʻiloʻi ʻi heʻema fuofua teití, ko ha tokotaha tā nafa ia ʻi ha kulupu tāmeʻa naʻe kamata ke ongoongoa. Naʻá ku toe ʻiloʻi foki naʻá ne ifi mo inu, ka naʻá ku pehē ʻoku sai pē ia he naʻe ʻikai ko ha mēmipa ia ʻo e Siasí.
ʻI heʻeku aʻu ki ʻapi ʻi he pō ko iá, ne tuku pē ʻeku fakakaukaú ʻi he talavou fakaʻofoʻofa ko iá. Ka ʻi heʻeku tūʻulutui ke lotú, ne u sio ki he tā ʻo e temipalé, pea naʻe kāpui au ʻe ha ongo faikehe. Naʻá ku tukunoaʻi ia peá u ʻalu ʻo mohe.
ʻI heʻema ʻalu ʻo ʻeva ʻi he ʻaho hono hokó, ne ʻikai sai kiate au ʻa ʻene inu mo ifí. Naʻá ku mā ke u tangutu ʻi ha tēpile ne ʻi ai e ʻolokaholó, neongo naʻe ʻikai te u ala ki ai. Naʻá ku tomuʻa ongoʻi fiefia pea mo puputuʻu ʻi heʻene feinga ke ʻuma mai kiate aú. ʻI he taimi naʻá ku nāmuʻi ai ʻa e sikaletí mo e kava mālohí ʻi heʻene mānava maí, naʻe ngata pē ai ʻene feinga ʻuma maí!
Ne u tūʻulutui he pō ko iá ʻo lotu, peá u sio ai ki he tā ʻo e temipalé. Naʻá ku fakakaukau he ʻikai lava ʻe he talavou ko ʻení ʻo ʻave au ki he temipalé ke u mali taʻengata.
Kimuʻa peá u tokoto hifo ke mohé, naʻá ku fakakaukau fiefia ki heʻeku taumuʻa ke mali mo ha talavou moʻui taau te u lava ʻo fokotuʻu mo ia ha fāmili taʻengatá.
Neongo naʻe kei matātangata pē e tamasiʻi tā nafá, ka naʻe ʻikai toe toʻoa ai hoku lotó. Naʻá ku ʻiloʻi ʻa e faʻahinga mali naʻá ku fie maʻú.
Hili ha taʻu ʻe taha mei ai, naʻá ku mali ʻi he Temipale Sao Pauló ki ha tokotaha maʻu lakanga fakataulaʻeiki taau mo feʻunga ʻoku ou ʻofa ai. Naʻe ʻaonga ʻeku tatali ki ha talavou faivelenga ʻa ia te ma lava ʻo tali fakataha e tāpuaki fakaofo ko iá mei he ʻEikí.