ʻI he Ongoongó
Liahona Ala Maʻu he Taimí ni ‘i he Lea Faka-Siaina Fakanounoú
‘Oku ala maʻu he taimí ni ‘e he kau lea faka-Siainá ‘a e Liahoná ‘i he Lea faka-Siaina Fakanounoú.
Ko e Liahona ‘e 6 ʻoku pulusí—‘a ia ko e tatau ‘e ua ‘o e konifelenisí (Mē mo Nōvema) mo e pulusi maheni kehe ‘e fā (Sānuali, ‘Epeleli, Siulai, mo ‘Okatopa)—‘e pulusi ia ‘i he lea faka-Siaina fakanounoú ‘i he taʻu kotoa pē. Naʻe pulusi pē ki he ʻInitanetí ‘a e tatau ‘o Sānuali mo ‘Epeleli 2012; ka ko e Liahona ‘o Meé ko hono ‘uluaki pulusi ia ‘i he tohí.
Kātaki ‘o fetuʻutaki ki he Distribution Services pe ‘alu ki he store.lds.org ke maʻu ha fakahinohino mei ai ‘o kau ki hano maʻu atu ‘o e tatau taki taha ‘o e makasiní pe ko hano totongi fakataʻu ke maʻu atú.
Fakamamafaʻi ‘e he Ngaahi Makasini ‘a e Siasí ‘a e Ngaahi Tuʻunga Moʻui ‘o e Ki Hono Fakamālohia ‘o e Toʻu Tupú
‘E kamata ‘i he māhiná ni, hono fakamamafaʻi ‘e he ngaahi makasini ‘a e Siasí ‘aki ha ngaahi fakamatala ‘oku fakamamafaʻi ai ‘a e ngaahi tuʻunga moʻui ‘oku fokotuʻu atu ‘i he pulusi foʻou ‘o e ki‘i tohi ko e Ki Hono Fakamālohia ‘o e Toʻu Tupú. ‘E pulusi atu ‘a e ngaahi fakamatala ko iá ‘i he New Era mo e ngaahi peesi maaʻá e toʻu tupú ‘i he Liahoná ‘i ha ngaahi māhina lahi (tuku kehe ‘a e ngaahi makasini ‘o e konifelenisí); pea ‘e fakamamafaʻi ‘i he fakamatala taki taha ha tuʻunga moʻui kehe ‘i he taimi kotoa pē, pea ‘e faʻu ia ‘e ha mēmipa ‘o e kau palesitenisī lahi ‘o e Kau Talavoú pe Kau Finemuí pe ha mēmipa ‘o e Kau Fitungofulú.
‘E ‘i ai foki mo ha fakamatala peesi ‘e taha maʻá e kakai lalahí ki he anga ‘o hano akoʻi ‘e he ngaahi mātuʻá ‘a e tuʻunga moʻui ‘oku fakamamafaʻi ‘i he māhina ko iá ki heʻenau fānaú ‘i he Liahona mo e Ensign, mo e, taimi ‘e niʻihi ‘e ‘i ai ha ngaahi kaveinga ‘i he Ki Hono Fakamālohia ‘o e Toʻu Tupú ‘e fekauʻaki mo e ngaahi kaveinga ‘i he Ko ‘Eku Ngaahi Tuʻunga Moʻui ʻi he Ongoongoleleí maʻá e fānau Palaimelí, pea naʻe ‘i ai foki mo ha fakamatala maʻá e fānau īkí ‘e pulusi atu ‘i he Liahona mo e Friend.
Ala Maʻu he Taimí Ni ‘a e Polokalama Fakahokohoko Fakamotuʻalea FamilySearch
‘Oku tokoni ‘a e polokalama Fakahokohoko Fakamotuʻalea FamilySearch ki he kakai ‘oku nau ngāueʻaki ‘a e iPhone mo e iPad ke nau vahevahe ‘a e ngaahi lekooti fakatohihohoko mahuʻinga mei he ngaahi tapa kehekehe ‘o e māmaní ‘i he ngaahi meʻangāue ‘oku toʻotoʻo holo pē.
Naʻe fakaʻatā ‘a e polokalamá ‘i he meimei taimi tatau mo hono fakaʻatā ‘o e Tohi Kakai ‘o e ‘Iunaiteti Siteití ki he 1940 ke ngāue ʻaki ki hono fakahokohoko ‘o e tohi hohokó, ‘oku fakaʻatā ia ke hiki hano tatau (download) mei he Apple App Store (ngaahi meʻangāue iOS) pe Google Play (faʻahinga ‘o e Android).
‘Oku ala maʻu atu ia ‘i he lea faka-Pilitāniá pe faka-Sipeiní pea ‘oku fakaʻatā ‘e he polokalamá ‘a e kakai ‘oku nau ngāueʻaki iá ke nau sio ki ha ngaahi ‘īmisi iiki—hangē ko ha hingoa, pe feituʻu, pe ha fakamatala mahuʻinga kehe—mei ha ngaahi tohi fakamoʻoni tohi nima hangē ko ha ngaahi tohi fāʻeleʻi, tohi mali, pe ngaahi lekooti tohi kakai. Ko e meʻa pē ‘oku fai ‘e he tokotaha ‘oku vakai ki aí ko haʻane hiki (fakahokohoko) ‘a e meʻa ‘okú ne sio ki aí, pea ‘e hanga leva ‘e he polokalama fakahokohoko FamilySearch ‘o tānaki ‘a e fakamatala ko iá ki he ngaahi lekooti tohi hohoko taʻe totongi ‘oku tauhi pea ‘oku lava ke maʻu mei he familysearch.org.
‘Oku ala lau he taimí ni ‘e he kakai lea faka-Siainá mei he ngaahi tapa kehekehe ‘o e māmaní ‘a e Liahoná ʻi he lea faka-Siaina fakanounoú.
‘E fakaʻatā ‘e he polokalama Fakahokohoko Fakamotuʻalea FamilySearch foʻoú ha kakai tokolahi ange ke nau tokoni ki he fekumi hisitōlia fakafāmilí ‘i ha founga fakangatangata pē pe ‘i ha founga lahi ‘aupito.