Tōmasi S. Monisoni
Ko Hono Tali ʻa e Ui ʻo e Fatongiá
Naʻe fuoloa pē e tukupā ʻa Palesiteni Tōmasi S. Monisoni ia ke fakahoko ʻa hono fatongiá ke fai e ngāue ʻa e ʻEikí pea ke muimui ʻi he faʻifaʻitakiʻanga ʻa Sīsū Kalaisí
Kuo tā tuʻo lahi e lea ʻa Palesiteni Tōmasi S. Monisoni, “ʻOku ou saiʻia ʻi he foʻi lea ko e ngafá.” ʻOkú ne fakakaukau ko ha “meʻa toputapu”1 ia. ʻI heʻene fakahoko hono fatongia ko e Palesiteni hono 16 ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, naʻá ne pehē, “ʻOku tukupā ke līʻoa ʻeku moʻuí, hoku mālohí—mo ia kotoa pē ʻoku ou maʻu ke foakí—ki he ngāue [ʻa e ʻEikí] pea ki hono tataki ʻa e ngaahi meʻa ʻi Hono Siasí ʻo fakatatau mo Hono finangaló pea mo ʻEne ueʻi fakalaumālié.”2
ʻOku ʻiloa ʻa Palesiteni Monisoni ʻi heʻene tokoniʻi e niʻihi kehé, ʻi he taimi ʻokú ne folau ai ki muli ʻo fakahoko ha ngaahi ngāué, he ʻokú ne faʻa foaki ʻa hono ngaahi sutí mo e suú pea foki mai mo e vala pē ʻokú ne tuí mo hono silipá. Kuó ne angamaheni ʻaki e ʻaʻahi ki hono ngaahi kaungāmeʻa mo e maheni ʻoku nau fie maʻu ha fakalotolahí. Kuó ne faitāpuekina ha kakai tokolahi ʻi he ngaahi falemahakí mo e ngaahi senitā ʻoku nau tokangaekina e kakai mahamahakí, peá ne muimui ki he ueʻi fakalaumālie ke fai ha ngaahi telefoni, pea mo lea ʻi ha ngaahi meʻafakaʻeiki lahi ʻaupito. Kuó ne ʻave ha ngaahi meʻatokoni, moa kuo ʻosi maau ke tunu, mo ha ngaahi tohi ʻoku hiki ai ha pōpoaki ʻoku ongo ki he lotó. ʻI heʻene hoko ko e Palesiteni ʻo e Siasí ʻoku fonu ʻa ʻene taimitēpilé ʻi he ngaahi fakatahá mo e ngaahi taimi ʻaʻahí, ka ʻokú ne fakaʻataʻatā maʻu pē hono taimí maʻá e kakaí—ko e lahi tahá ko e fakataha fakatāutaha mo kinautolu. ʻE ʻiloa ia ʻi he ngaahi fakamatala ʻi he hisitōlia ʻo e Siasí, ʻi heʻene ʻofa ki he kakaí mo ʻene fakahā ʻo e ʻofa ko iá ʻaki ʻene foaki kiate kinautolu ʻa hono taimí.
Faʻifaʻitakiʻanga ʻa Sīsū Kalaisi ʻo e Fatongiá
ʻOku hanga ʻe he fakamoʻoni ʻa Palesiteni Monisoní ki he ʻEiki ko Sīsū Kalaisí ʻo tākiekina ʻene ngāué. Naʻá ne pehē: “Neongo naʻa Ne hāʻele mai ki he mamaní ko e ʻAlo Ia ʻo e ʻOtuá, ka naʻá Ne tauhi ʻi he loto fakatōkilalo ki he kakai naʻá Ne feohi mo iá. Naʻá Ne haʻele mai mei he langí ke nofo ʻi he māmaní ʻi Heʻene hoko ko ha tangata matelié pea mo fokotuʻu ʻa e puleʻanga ʻo e ʻOtuá. Naʻe hanga ʻe Heʻene ongoongolelei nāunauʻiá ʻo liliu e fakakaukau ʻa e mamaní.”3 Naʻe fakahā ʻe he Fakamoʻuí ʻa ʻEne ongo ki hono fatongiá ʻi he taimi naʻá Ne folofola ai, “Kuó u haʻu ki he māmaní ke fai ʻa e finangalo ʻo ʻeku Tamaí” (3 Nīfai 27:13). Naʻá Ne “faʻa feʻaluaki ʻo fai lelei, … he naʻe ʻiate ia ʻa e ʻOtuá” (Ngāue 10:38) ʻi he loto vilitaki mo e angalelei ko e tupu mei he vakai ki he taʻengatá.
ʻOku fakatokangaʻi ʻe Palesiteni Monisoni ko e taimi naʻe hoko mai ai kia Sīsū Kalaisi ʻa e ui ki he fatongiá ʻi he Ngoue Ketisemaní, naʻá Ne tali, “ʻA ʻeku Tamai, kapau ʻe faʻa fai, pea ʻave ʻa e ipú ni ʻiate au: kae ʻoua naʻa faʻiteliha pē au, ka ko koe pē” (Mātiu 26:39). Naʻe ʻafioʻi ʻe he Fakamoʻuí peá Ne tali maʻu pē ki Hono fatongiá ke tataki, fakamāmaʻi, mo fakalotolahiʻi ʻa e fānau kotoa ʻa ʻEne Tamaí. Naʻe lea ʻa Palesiteni Monisoni ʻo kau ki he meʻá ni: “Naʻe ngāue mo femoʻuekina maʻu pē ʻa e Fakamoʻuí—ke akoʻi, fakamoʻoniʻi, mo fakamoʻui ʻa e kakai kehé. ʻOku hoko ʻa e ngaahi ngāue ko iá ko hatau fatongia fakafoʻituitui foki ʻi heʻetau hoko ko e [kāingalotú].”4
Ko e Ako ke Fakahoko Hono Fatongiá
Naʻe tupu hake ʻa Palesiteni Monisoni ʻi he Uooti Ono-Fitú ʻi he Siteiki Temipale Viu ʻIutaá. Naʻá ne ako ai fekauʻaki mo hono fatongia ke fakahoko ʻene ngaahi ngāue ʻi he lakanga fakataulaʻeikí ʻi hono tataki ia ʻe ha kau taki lakanga fakataulaʻeiki poto, peá ne maʻu ʻa e ʻilo mo ha fakamoʻoni ki he ongoongolelei ʻo Sīsū Kalaisí mei ha kau faiako naʻe ueʻi fakalaumālie.
Naʻe fokotuʻu ʻa Tōmasi Sipenisā Monisoni ʻi he taʻu 1950, ʻi hono taʻu 22 ke hoko ko e pīsope ʻo e Uooti Ono-Fitú. Naʻá ne fakaʻaongaʻi ʻa e meʻa naʻá ne ako ʻo kau ki hono fua e fatongiá kiate kinautolu naʻa nau akoʻi ange hono ʻuhingá. Naʻá ne hoko ko e tamai ʻo e uōtí, ko e palesiteni ʻo e Lakanga Taulaʻeiki Faka-ʻĒloné, ko ha tauhi ki he masivá mo e faingataʻaʻiá, ko e tokotaha tauhi lekōtí, pea mo e fakamaau ki ʻIsileli. Naʻe lahi hono ngaahi fatongiá, ka naʻá ne fua kinautolu ʻaki hono ʻulungaanga fakatuʻamelie ki he leleí.
Ko e taha ʻo e ngaahi fatongia ʻo e pīsopé ko hono ʻave ki he kau ngāue fakakautau kotoa pē ʻa e ongo makasini Church News mo e Improvement Era pea mo fai ha tohi fakatāutaha kiate ia ʻi he māhina taki taha. Koeʻuhí ne hoko ʻa Palesiteni Monisoni ko ha sōtia ʻi he tautahí ʻi he Tau Lahi Hono II, naʻe hounga kiate ia ʻa e mahuʻinga ʻo ha tohi mei ʻapi. Naʻe ʻi ai haʻane kau mēmipa ʻe toko 23 ʻi he uōtí naʻe ngāue fakakautau, ko ia ai naʻá ne uiuiʻi ha fineʻofa ʻi he uootí ke ne tokangaʻi hono meili ʻa e ngaahi tohi ko ʻení. ʻI ha efiafi ʻe taha naʻá ne ʻoange kiate ia ʻa e tohi ʻe 23 ʻoku ʻave fakamāhiná.
Naʻá ne ʻeke ange, “ʻE Pīsope, ʻoku ʻikai koā ke ke foʻi koe? Ko e toe tohi ē kia Misa Palaisoni. Ko e tohi ʻaki ʻeni hono 17 kuó ke ʻave ki ai mo e ʻikai pē tali mai.”
Naʻá ne tali ange, “Sai pē, mahalo ko e māhina ʻeni ʻe tali mai aí.” Pea ko e meʻa ia ne hokó. Ko e tali meia Misa Palaisoní naʻe peheni: “Siʻi Pīsope, ʻoku ʻikai ke u fuʻu poto he faitohí. ʻOku ou fakamālō atu he makasiní mo e Church News, kae meʻa tepuú, ʻoku ou fakamālō atu he ngaahi tohi fakatāutahá. Kuo liliu ʻeku moʻuí. Kuo fakanofo au ko ha taulaʻeiki ʻi he Lakanga Taulaʻeiki Faka-ʻĒloné. ʻOku ou maʻu ha loto nonga. Ko ha tangata fiefia au.”
Naʻe vakai ʻa Palesiteni Monisoni ʻi he tohi ko iá ki he hoko ʻo moʻoni e lau ʻoku pehē “Fai [ho] fatongiá, ko e lelei tahá ia. Tuku e toengá ki he ʻEikí.” Hili ha ngaahi taʻu lahi mei ai, lolotonga ʻa ʻene kau atu ki ha konifelenisi fakasiteikí, naʻá ne lea ai he meʻa naʻá ne aʻusia ʻi he faitohi ki he kau ngāue fakakautaú. Hili ʻa e fakatahá, naʻe haʻu ha talavou kiate ia ʻo fehuʻi ange, “ʻE Pīsope, ʻokú ke manatuʻi au?”
Naʻe ʻikai toe tatali ʻa Palesiteni Monisoni ka ne tali ange, “Misa Palaisoni! ʻOkú ke fēfē hake? Ko e hā ho fatongia ʻi he Siasí?”
Naʻe tali fiefia ange ʻe he tangata ngāue fakakautau mālōlō ko ʻení ʻokú ne sai pē pea ʻokú ne fua fatongia ʻi he kau palesitenisī ʻo e kōlomu kaumātuʻá. “ʻOku ou toe fie fakamālō atu koeʻuhí ko siʻo tokanga kiate aú pea mo e ngaahi tohi fakatāutaha naʻá ke ʻoangé pea ʻoku ou kei tauhiʻofa pē ia.”5
Naʻe lea ʻa Palesiteni Monisoni ʻo kau ki he ngaahi meʻa pehení ʻo pehē: “ʻOku faʻa hoko e fanga kiʻi ngāue tokoni īkí ko e meʻa pē ia ʻe fie maʻu ke langaki mo faitāpuekina ha taha kehe: ha kiʻi fehuʻi pē ʻo kau ki he fāmili ʻo ha taha, ngaahi lea fakalotolahi, ha fakamālōʻia moʻoni, ha kiʻi tohi fakamālō pe telefoni nounou pē. Te tau lava ʻo fakahoko ha lelei lahi ʻo kapau te tau faʻa tokanga mo ʻiloʻi e ngaahi meʻa ʻoku hokó pea kapau te tau ngāue ʻo fakatatau ki he ngaahi ueʻi fakalaumālie ʻoku tau maʻú.”6
Ko Hono Ako ke Fakahoko Hotau Fatongiá
Naʻe pehē ʻe Palesiteni Monisoni, “ʻI heʻetau muimui ʻi he ngaahi ʻahó ni ki [he] sīpinga [ʻa Sīsū Kalaisí], ʻe lava ke tau toe maʻu ai ha faingamālie ke faitāpuekina e moʻui ʻa e niʻihi kehé. ʻOku fakaafe mai ʻa Sīsū kiate kitautolu ke tau foaki: ‘Vakai, ʻoku fie maʻu ʻe he ʻEikí ʻa e loto mo e ʻatamai fie faí.’”7
Ko e vakai ko ia hotau palōfitá ki he fatongiá, ʻoku fie maʻu ki ai ha vakai ʻoku mahulu ange ia ʻi he holí, lavameʻá, fakafiemālié, pe fakafiefia fakatāutahá kae aʻu atu ki he ʻiloʻi mo tali ki he lelei ʻoku maʻongoʻonga angé. Naʻe pehē ʻe Palesiteni Monisoni, “Ke maʻu ʻa e fiefia moʻoní, kuo pau ke tau fekumi ki ai ʻi he nofotaha ʻetau tokangá he tokoni taʻesiokitá. Kuo teʻeki ai ke ako ha taha ʻa e ʻuhinga ʻo e moʻuí kae ʻoua leva kuó ne tukulolo hono loto-hīkisiá ke ngāue tokoni ki hono kāingá. Ko e tauhi ki he niʻihi kehé ʻoku tatau ia mo e fatongiá, ʻa ia ʻokú ne ʻomai ʻa e fiefia moʻoní ʻi hono fakahoko iá.”8
ʻOkú ne tui ko e fakakaumeʻá ʻokú ne fakafaingofuaʻi ʻa e tauhi ʻo e niʻihi kehé. Naʻá ne pehē “ʻOku tokanga lahi ange ʻa e kaungāmeʻa leleí ke tokoniʻi ʻa e kakaí kae ʻikai ko ʻene maʻu ha lāngilangí. ʻOku tokanga ʻa e kaungāmeʻá. ʻOku ʻofa ʻa e kaungāmeʻá. ʻOku fakafanongo ʻa e kaungāmeʻá. Pea ʻoku ala atu ʻa e kaungāmeʻá ke tokoni.”9
ʻI he ngaahi taʻu kuo hilí naʻe ʻalu ʻa Palesiteni Monisoni ki ha konifelenisi fakasiteiki ʻi Sitā Veili, Uaiōmingi, USA, ʻi ha fatongia ke fokotuʻutuʻu foʻou ʻa e kau palesitenisī fakasiteikí. Ka naʻá ne fai ha meʻa naʻe mahulu ange ʻi hono fakahoko e fatongia ko iá. Naʻe ongo ki he taha kotoa pē naʻe ʻi he fakatahaʻangá ʻa e founga mahinongofua ʻo e ʻofá naʻá ne tukuange ʻaki ʻa e palesiteni fakasiteikí, ʻa E. Falanisisi Uinitā, ʻa ia naʻá ne fua fatongia ʻi ha taʻu ʻe 23.
ʻI he ʻaho ʻo e konifelenisi fakasiteikí, naʻe fakafonu ʻe he kāingalotú ʻa e falé. Ne hangē nai naʻe taki taha “fakahā fakalongolongo pē ʻa e fakamālō ki he takimuʻa fakaʻeiʻeiki ko ʻení,” ʻa ia naʻá ne fua hono fatongiá ʻaki hono lotó kotoa ʻi he māteaki. ʻI he tuʻu hake ʻa Palesiteni Monisoni ke leá, naʻá ne fakahā ʻa e fuoloa hono tokangaʻi ʻe Palesiteni Uinitā ʻa e siteikí mo ʻene hoko maʻu pē “ko ha pou tuʻuloa mālohi ki he tokotaha kotoa pē ʻi he teleʻá.” Naʻe ueʻi ia ke ne fai ha meʻa ne teʻeki ai ke ne fai kimuʻa pe talu mei ai. Naʻá ne kole ki he tokotaha kotoa pē ne tākiekina ʻe he moʻui ʻa Palesiteni Uinitaá ke nau tuʻu hake ki ʻolunga. Ko hono olá naʻe fuʻu fakafiefia. Naʻe tuʻu hake ʻa e tokotaha kotoa pē ʻi he haʻofangá.
Naʻe fakahā ʻe Palesiteni Monisoni ki he fakatahaʻangá, ʻa ia ko e tokolahi ai naʻa nau loʻimataʻia, “ʻOku ʻikai ngata pē hono fakasino mai ʻe he tokolahi ko ʻení ʻa e ngaahi loto fakafoʻituituí, ka ʻoku kau ai mo e fakahoungaʻi ki he ʻOtuá ʻo ha moʻui ʻaonga moʻoni.”10
Ko e Fakamoʻoni ʻa Hotau Palōfitá ki he Fatongiá
Kuo ʻomai kiate kitautolu ʻe Palesiteni Monisoni ʻa e ngaahi akonaki fakalotolahi ko ʻeni fekauʻaki mo e fatongiá:
“Ko e hā pē hao lakanga, pe lahi hoʻo manavasiʻí pe tailiilí, tau lotu muʻa pea laka atu ʻo fakahoko, mo manatuʻi e folofola ʻa e ʻEikí, ʻa e ʻEiki ko Sīsū Kalaisí, ʻa ia naʻá Ne talaʻofa: “ʻOku ou ʻiate kimoutolu maʻu ai pē ʻo aʻu ki he ngataʻanga ʻo māmaní.’”11
“Te tau lava ʻo fefakamālohiaʻaki; he ʻoku tau malava ʻo fakatokangaʻi ʻa e ngaahi meʻa ʻoku ʻikai faʻa fakatokangaʻí. Ko e taimi ʻoku tau maʻu ai ha mata ʻoku mamatá, ha telinga ʻoku fanongo mo ha loto ʻokú ne ʻilo mo ongoʻí, te tau lava leva ʻo tokoni pea mo fakahaofi kinautolu ʻoku fakafatongia ʻaki kitautolú.”12
“ʻOku ʻikai ha taha ʻiate kitautolu ʻoku nofo tuēnoa—ʻi hotau koló, hotau puleʻangá, pe ʻi he māmaní. ʻOku ʻikai ha ʻā vahevahe ʻi he vahaʻa ʻo ʻetau tuʻumālié mo e masivesiva ʻa hotau kaungā ʻapí.”13
“ʻOku ʻi ai ha ngaahi vaʻe ke fokotuʻu maʻu, nima ke pukepuke, ʻatamai ke poupouʻi, loto ke tataki fakalaumālie pea mo ha moʻui ke fakahaofi.”14
“Mahalo pē ʻi he taimi te tau fehangahangai ai mo e Fakamoʻuí, he ʻikai ke Ne fehuʻi mai, ‘Ko e ngaahi fatongia ʻe fiha naʻá ke fua?’ ka ko e, ‘Ko e kakai ʻe fiha naʻá ke tokoniʻí?’”15
“ʻI heʻetau moʻui fakaʻahó, ʻoku tau ʻilo ai ha ngaahi faingamālie lahi ke muimui ʻi he sīpinga ʻa e Fakamoʻuí. ʻI he taimi ʻoku feongoongoi ai hotau lotó mo ʻEne ngaahi akonakí, ʻoku tau ʻiloʻi ʻa e ofi mai ʻo ʻEne tokoni fakalangí. ʻOku meimei hangē nai ʻoku tau fai e fekau ʻa e ʻEikí; pea tau ʻiloʻi leva ai, ʻi he taimi ʻoku tau fai ai e fekau ʻa e ʻEikí, ʻoku ʻi ai ʻetau totonu ki he tokoni ʻa e ʻEikí.”16
“ʻI heʻetau ako, tui, pea mo muimui kiate Iá, ʻoku tau maʻu ai ha faingamālie ke hoko ʻo hangē ko Iá. ʻE lava pē ke liliu [hotau] fōtungá, lava ke fakavaivaiʻi mo e lotó; ʻe lava pē ke fakavaveʻi ange ʻetau laká; pea mo fakaleleiʻi hotau faingamālie ki he kahaʻú. Pea aʻusia ʻe he moʻuí ʻa e tuʻunga ʻoku tonu ke ʻi aí.”17
ʻE lava ke tau hangē ko hotau palōfitá, Palesiteni Tōmasi S. Monisoni, ʻo tau tukupā ke fakahoko hotau fatongiá ke fai ʻa e ngāue ʻa e ʻEikí mo muimui ʻi he sīpinga ʻa Sīsū Kalaisí.
Mei ʻolungá: Ko e hāsino e ʻofa ʻa Palesiteni Monisoni ki he kakaí ʻi heʻene lulululu mo e kau Sikautí, tali ha meʻaʻofa (mo hono uaifí, Falanisesi), fakahinohinoʻi ha kiʻi taʻahine ʻi ha tāpuaki kelekele, pea mo taʻataʻalo ki he kāingalotú ʻi he konifelenisi lahí (mo hono uaifí).
Naʻe akonaki ʻa Sīsū Kalaisi ʻi he fale lotú mo e veʻe vaitupú. Naʻá Ne tāpuakiʻi ʻa e longaʻi fānaú pea mo fokotuʻu hake ʻa e ʻofefine ʻo Sailosí mei he maté.
ʻI he kole ʻa Palesiteni Monisoni ke tuʻu hake ʻa e tokotaha kotoa pē naʻe tākiekina ʻene moʻui ʻe he palesiteni fakasiteikí, naʻe kamata ke tuʻu taha taha hake ʻa e kāingalotú kae ʻoua kuo tuʻu hake ʻa e tokotaha kotoa pē.
Toʻohema: faitā ʻa Craig Dimond; toʻomataʻu, mei ʻolunga: faitā ʻa Jed A. Clark © IRI, Jeffrey Allred © Deseret News, © Deseret News, mo Christina Smith
Toʻohema, mei ʻolunga: Maama mo e Moʻoní fai ʻe Simon Dewey; Vai Moʻuí, fai ʻe Simon Dewey; Tuʻuhake pea ʻAlu, fai ʻe Simon Dewey; tā fakatātā ʻa Dan Burr; toʻomataʻu: tā fakatātā (illustration) ʻa Paul Mann