Ko e Faʻifaʻitakiʻanga ʻEku Fineʻeikí
Tā fakatātaaʻi ʻe Brian Call
Naʻá ku haʻaki e peletí ʻi he mīsini fufulu peletí peá u tangi ʻi heʻeku loto ʻitá.
Naʻe pehē mai ʻeku tangataʻeikí, “ʻĒlini, te ke lava ʻo ʻalu ki he paati ko iá. ʻE lava ke ke kiʻi mālōlō ki ai.”
Naʻá ku kaila ʻi heʻeku hū fakavavevave ki tuʻa mei he lokí, “ʻOku ʻikai ko ia!”
Naʻe ʻikai te u ʻitá ko e paati ʻa ʻEtiané. Ne puke ʻi he niumōniá ʻa ʻeku fineʻeikí mo hoku tehina siʻisiʻi taha ko ʻEpí. Naʻá ku feinga mo ʻeku tangataʻeikí ʻi he uike kuo ʻosí ke tauhi kinaua mo fai e ngāue angamaheni fakaʻapí. Ne kau ai e feimeʻatokoní, fakamaau falé, fakatau meʻakai mei he falekoloá, fai ʻa e foó, mo hono ʻave holo hoku ongo tehiná.
Ne hanga ʻe he ngaahi meʻá ni kotoa ʻo fakasiʻisiʻi ʻeku loto hohaʻá mo e ilifiá. Naʻá ku hohaʻa ki hoku fāmilí peá u tailiili koeʻuhí ko e vave ʻa ʻeku ʻalu ki he ʻunivēsití. Ko ia ai naʻá ku femoʻuekina pea feinga ke tukunoaʻi ʻeku ilifiá. Naʻá ku palani ke u nofo mei he paati ʻa ʻEtianí, pea ʻi heʻeku helaʻiá mo fakakaukau atu ki ha efiafi fakafiefia, feohi mo e ngaahi kaungāmeʻá ʻi he veʻe vaikaukaú, naʻá ku toe ongoʻi lomekina ai. Naʻá ku fuʻu ʻita ‘aupito pea tō hoku ʻitá ki heʻeku tangataʻeikí.
Naʻá ku tangi ʻi hoku loki mohé. Pea ʻi heʻeku ongoʻi halaiá, naʻá ku ʻalu ki ʻolunga ke vakai pe naʻe fie maʻu ʻe heʻeku fineʻeikí pe ko ʻEpi ha meʻa. Naʻá ku maʻu atu ʻeku faʻeé ʻokú ne ʻoange e faitoʻó ki hoku tehina naʻe mofí. Naʻe ʻikai meimei lava ʻeku faʻeé ʻo mānava pea kuo ʻaho lahi ʻa ʻene tokotó. Naʻá ma tapou mo ʻeku tamaí ke ne foki ʻo tokoto. Ne ma talaange ki ai te ma lava ʻo tokangaʻi ʻa ʻEpi. Ka naʻe ʻikai ke ne fie fanongo.
Naʻá ne pehē, “ʻOku ou sai pē au. Mo ō ʻo mohe. ʻOku fie maʻu au ʻe ʻEpi.”
Naʻá ku feinga ke ʻoua naʻá ku tangi ʻi heʻeku sio ki heʻeku fineʻeikí ʻokú ne fakanonga hoku tehina taʻu 10. Naʻá ne vakaiʻi e māfana hono sinó, tokoniʻi ia ke ne tokoto he mohengá, peá ne toki tokoto hifo ʻo pukepuke hono sino teteteté. Naʻe tuʻu e toʻe ʻa ʻEpí peá ne nonga ʻi he malumalu ʻo ʻeku fineʻeikí.
Naʻe puke ʻeku fineʻeikí ʻo lahi ange ʻi ha toe taimi kimuʻa. Naʻe faifai pea tokoto falemahaki ʻi ha ngaahi ʻaho lahi koeʻuhí ko e niumōniá. Ka naʻe ʻikai te ne siokita lolotonga ʻene faingataʻaʻiá. Naʻe ʻikai ke ne lāunga koeʻuhi ko ʻene puké, ka naʻá ne ʻiloʻi ha founga ke fakafiemālieʻi ʻa e mamahi ʻa ʻene tama fefiné.
Naʻá ku palani ke tukuange ʻeku fie maʻú he pō ko iá ʻaki ʻeku nofo ʻo tokoni ʻi ʻapi. Kae kehe, naʻá ku mā ko ʻeku ʻitá peá u ongoʻi loto fakatōkilalo koeʻuhí ko e ngaahi ʻulungaanga ʻo ʻeku fineʻeikí. ʻI heʻeku vakai kiate iá, naʻá ku ʻiloʻi te ne fai ha faʻahinga meʻa pē ke tokoniʻi au mo hoku fototehiná.
Naʻá ku ongoʻi ʻene ʻofá ʻi he pō ko iá peá u fie muimui ki heʻene faʻifaʻitakiʻangá. Naʻá ku fakapapauʻi te u fakahaaʻi kiate kinautolu ʻoku ou ʻofa aí te u ʻi ai ʻi he taimi te nau fie maʻu ai aú, ʻo tatau ai pē pe ko e hā e feilaulau fakatāutaha ʻoku fie maʻú.