Jipan̄ ajri ro Kōppopo N̄AN Peptaij
Ajri ej juon tōre elem̧ōņōņō me men ko jinoin rej kwaļo̧k. Iien eo jinoin tata in iuwe ioon juon bajkōļ, pād ilo jikuuļ, ak kajieon̄e juon m̧ōn̄ā kāāl rej jet iaan iien ko rōkaitoktok limo me rej kareel mour an juon ajri. Āinwōt ro rerūtto, ewōr ad iien em̧m̧an n̄an jipan̄ ajri ro ilo iaļen ekkatak in. Āinwōt rūtto ro ilo Kabun̄ in, ebarāinwōt wōr ad iien em̧m̧an n̄an jipan̄ er eddōkļo̧k ilo ko̧jpeļ in (lale D&C 68:25). Ta eo jemaron̄ kōm̧m̧an n̄an kanooj lale bwe peptaij eo an ajri eo—ej bujen eo m̧oktata juon armej ej kōm̧m̧an ippān Jemedwōj Ilan̄ eo eiakwe—ej juon iien eo eaiboojoj im ewōr tokjen?
“En̄in ej jibadbad eo im̧aantata an Kabun̄ in ej n̄an katakin jodikdik ro: m̧oktata ilo kapijuknen eo im innām ilo m̧ōn jar eo,” Būreejtōn Boyd K Packer. eaar katakin.1
Ilo waanjon̄ak kein ilaļ, ro jinen im jemān rej kwaļo̧k ekōjkan aer kōpooj ajri ro nejier n̄an kain̄i ko rekwojarjar im bujen ko an peptaij im kapen.
Em̧ōkaj Am Ijjino
“Kajjojo iiō n̄e ajri ro rej tōpar jiljilimjuon iiō ej juon tōre n̄an keemem,” Lori eaar ba, eo emān nejin ajri. Liin im ļeo ippān rej katakin ajri ro nejier kōn peptaij jān raan eo raar ļotak tok. Mekarta, n̄e kajjojo ajri rej tōpar jiljilimjuon, baam̧le eo aer ej jino lukkuun ļapļo̧k aer m̧aanjebpopo. Rej kōm̧m̧ane juon katak n̄an nokon in jota an baam̧le kajjojo allōn̄ kōn katak ko reoktak kōn peptaij, āinwōt bujen ko im waanjon̄ak eo an Jisōs.
Lori ej ba katak ko ilo allōn̄ eo eralitok iiō an ajri ro relukkuun in em̧m̧an. Liin ej kwaļo̧k n̄an ajri ro nuknuk ko raar kōņaki ke raar bōk juon āt im juon kōjeram̧m̧an, im liin ej kōnono kōn raan eo me kain̄i eo eaar kōm̧m̧an.
“Ej juon tōre em̧m̧an n̄an pedped wōt ioon bujen kōjeram̧m̧an ko an tampeļ,” Lori ej ba. “Kōm̧ij aolep iien kwaļo̧k juon unin kōnono jān katak eo me kālet eo n̄an peptaij en bun̄tōn eo im̧aantata ilo kōppopo n̄an kōjeram̧m̧an ko an tampeļ.”
Kōm̧ij Kōm̧m̧ane Āinwōt juon M̧akūtkūt an Baam̧le
Monica, juon m̧am̧a eo ewōr emān nejin, rie bwe ajri ro rōrūttoļo̧k rej bōk koņaer ilo jipan̄ ro jatier kōppopo jabdewōt iien n̄e emaron̄. “Ron̄jake an ļaddik im leddik ro jeier kam̧ool im kwaļo̧k en̄jake ko aer relukkuun letok kajoor,” liin ej ba. Lori ej kakkobaba bwe jet iien n̄e rej kajjitōk ippān ajri ro rej m̧aanjebpopo n̄an peptaij n̄an katakin ta eo raar katak n̄an ajri ro jatier reddikļo̧k.
Kōm̧ij Kōjerbale Āinwōt juon Kein Jerbal an Mijenede.
Ke leddik eo nejin Daniel eaar tōpar ralitōk iiō dettan, eaar jeļā bwe leddik eo enaaj kar kōņaan kwaļo̧k raan in peptaij eo an ippān ro m̧ōttan ro rejjab uwaan Kabun̄ in. Kōn menin baam̧le eo aer raar leļo̧k kūr ko n̄an iien peptaij eo an Allison n̄an ro m̧ōttan jān jikuuļ im ro ritūriin. Rein m̧ōttan raar kajjitōk bwe ren bōktok eoon ko ilo Baibōļ rem̧m̧an tata ippāer n̄an peptaij eo. Ālkin peptaij eo, Allison eaar kōkkaleik eoon ko ilo jeje ko rekwojarjar an rekāāl im kar je etan ro m̧ōttan ilo kōtaan eoon ko.
“Aaet, āinwōt baam̧le eo an, kōm̧ ar lukkuun bōk kūņaam ilo raan eo. Ak kōm̧ ar barāinwōt kōtļo̧k bwe en pād ippān ro m̧ōttan ālkin jidik iien im kōnono n̄an er kōn ta eo eaar en̄jake,” Daniel eaar ba. “Eaar juon iien eo em̧m̧an n̄an loe an ajri eo nejūm̧ kōm̧mane juon waanjon̄ok.”
Kōm̧ ar Kōmmālmeli Intōrpiū eo an Bisop.
Kimberly, jinen juon ajri eo m̧ōttan jidik etōpar iiō in peptaij, kar keememej an etal n̄an opiij eo an bisop n̄an intōrpiu n̄an peptaij eo an ke eaar ralitōk an iiō. “Iaar ikum̧kum̧!” Kimberly eaar ba.
Kiiō liin ej kajieon̄ n̄an lale bwe ajri ro nejin ren jab jelm̧ae en̄jake ko rewiwijet. Liin im ļeo ippān raar kōnono n̄an ajri ro nejier kōn intōrpiu ko an bisop im kajjitōk ippāer kajjitōk ko kōn intōrpiu in peptaij āinwōt n̄e iien intōrpiu. Intōrpiu kein eļapļo̧k jān aer kajineet ajri ro kōn jekjek in intōrpiu—rej barāinwōt rōjan̄ ajri ro nejier n̄an lukkuun kōļmenļo̧kjeņ kōn ta meļeļe in bujen eo an peptaij n̄an er.
Ewōr Am̧ Iien Em̧m̧an
Rein jinen im jemān em̧ōkaj aer kalikkar bwe rej jan̄in kōm̧m̧ane jabdewōt men rejjab menin aikuj ilo kōppopo n̄an ajri ro nejier n̄an peptaij im kapen eo, bōtaab elōn̄ iaer rej kōjerbal naan ko āinwōt “kōn” im “jab oktak” n̄an kōmeļeļeik katak ko raar katakin ium̧win iiō ko. “Kōm̧ij lukkuun lale bwe ajri ro nejūm̧ raar meļeļe en̄in eaar juon bun̄tōn eaorōk ilo mour ko aer, im bwe eaar juon jerbal eļap,” Kimberly ej ba. “Kōm̧ij aolep iien lukkuun lale bwe en kōm̧ eo kōm̧ij kōpooj er, im jab kōjatdikdik wōt bwe rūkaki ro an Būraimere ren katakin er.”
Juon iien em̧m̧an n̄an am jipan̄ kōpooj ajri ro kōm̧ij iakwe n̄an peptaij im kapen! Ilo am lukkuun jar kake menin, Irooj enaaj pād ippam̧ n̄an kōkm̧anm̧anļo̧k jinoin bujen in ilo en̄jake kōn juon pedped eo ekajoor ilju im jekļaj ilo eddōkļo̧k ilo jetōb.
Kōmeļeļe in pija ko jen John Luke, Graig Dimond, im Cody Bell