ʻAfilika
Konitinēniti ʻo e ʻAmanaki Lelei
ʻOku fokotuʻu ʻe he tui mo e talangofua ʻa e Kau Māʻoniʻoni ʻi he Ngaahi ʻAho Kimui Ní ʻi ʻAfilika mo Matakasikaá ha sīpinga ki he kāingalotu ʻo e Siasí he feituʻu kotoa.
Naʻe pehē ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi Filītauni ʻi Siela Lione, he lolotonga ha ngāue naʻá ne fakahoko ʻo kau ai haʻane ʻaʻahi ki Laipīlia mo Kana, “ʻOku faingofua ke ʻofa he kakai ʻo ʻAfiliká.”1
Naʻá ne pehē ʻoku fokotuʻu ʻe he tui mo e talangofua ʻa e Kāingalotu ʻo ʻAfiliká ʻa e sīpinga ki he kāingalotu kotoa ʻo e Siasí, tuʻunga ʻi heʻenau ʻofa ki he ongoongoleleí.
Naʻe pehē ʻe ʻEletā Hōlani, ʻoku fakafiefia ke “mamata ki hono lahi e mahuʻinga ʻo e ongoongoleleí kiate kinautolú, ke mamata ki he meʻa ʻoku nau fai ʻakí, anga ʻo ʻenau mataʻikoloaʻakí, ke mamata ki heʻenau faivelenga ʻi he vahehongofulú pea ʻi he ngāué, ʻi he ō ki he temipalé—te u pehē ko e temipalé ko ha ʻīmisi fungani—pea ke mamata ki heʻenau ohi hake ʻenau fānaú ʻi he Siasí mo ʻoatu honau ngaahi fohá mo e ʻofefiné ki he ngāue fakafaifekaú. Ko ha fakamoʻoni lelei ia ʻo ʻenau faivelengá.”2
ʻI Homou ʻAó
Naʻe fakamahino ʻe ʻEletā Hōlani, kuo teʻeki ke aʻu ʻo taʻu 30 e ʻi ʻAfilika ʻa e Siasí, tukukehe ʻa ʻAfilika Tonga (ʻa ia ne fokotuʻu ai ha siteiki ʻi he 1970). Koeʻuhí ko ia, kuo kamata ai ʻa e Siasí “ʻi homou ʻaó, ʻi ha kuonga,” pea “ko ʻAfiliká ko e taha ia ʻo e ngaahi feituʻu makehe te ke lava ʻo mamata ai ki he nāunau ʻo e ʻEikí, ki he fakaofo mo e mana ʻo hono Toe Fakafoki mai ʻo e Ongoongoleleí, ʻoku hoko tonu ʻi homou ʻaó.”3
Naʻá ne pehē te ne manatuʻi maʻu pē ʻene ʻi ʻAkalā ʻi Kana, mo Palesiteni Kōtoni B. Hingikeli (1910–2008), ʻi heʻene fakahā ʻe langa ha temipale ʻi aí. “Naʻe tuʻu [ʻa e kakaí] ʻo kalanga, tangi mo tauʻolunga, fepukeʻaki, mo tangi. Ko hono moʻoní, ʻoku kei hoko atu pē e laumālie ko iá. Ko ʻeku ʻofa ia ki he kakai ʻo ʻAfiliká—ko ʻenau fiefia taʻe-tūkua ʻi he ongoongoleleí. Ko e tokolahi tahá ʻoku siʻi fau ʻenau meʻa ʻoku maʻu ʻi he koloa fakamāmaní, ka ʻi heʻenau maʻu ʻa e ongoongoleleí, naʻa nau pukenimā ia. … Pea ʻoku nau kei fai ia. ʻOku nau fakahoko ia ʻo aʻu ki he ʻahó ni.”4
Kuo Fakahoko e Ngaahi Kikité
ʻOku fakamatalaʻi ʻe he kau palōfita mo e kau ʻaposetolo kehe kuo nau fakahoko ha ngaahi ngāue ʻi ʻAfiliká e konitinēnití ko ha feituʻu ʻoku fakahoko moʻoni ai e ngaahi kikite ʻo e ʻEikí.
Naʻe fakamatala ʻa ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá hili haʻane talanoa mo e kāingalotu ʻo e Siasí ʻi Mōsamipiki mo Naisīliá. “Ko e kakai ʻAfiliká ko ha kakai angaʻofa mo faʻa kātaki. ʻOku ʻikai lahi haʻanau paʻanga hū mai pe ngaahi maʻuʻanga tokoni ke nau lava ai ʻo fai ha ngaahi meʻa fakapaʻanga, ko ia, ʻoku nau fakahoko pē kinautolu ʻi he feinga moʻoni. Te nau lue ʻi ha ngaahi laumaile mo toe lōloa ange ke fakahoko ha faʻahinga meʻa ʻoku ueʻi kinautolu ke nau fai ʻe he Laumālie Māʻoniʻoní ke paotoloaki e ngāué.”5
Naʻe fakamahino ʻe ʻEletā Sikoti ʻi heʻene fakatapui ai ʻa Mōsamipiki he 1999, ki hono malangaʻi ʻo e ongoongoleleí, naʻe toko 40 pē kāingalotu aí, pea naʻe hoko e fonuá ko ha konga ʻo e Misiona ʻAfilika Tonga Sohānisipēkí. ʻI heʻene ʻaʻahi hono ua ki ai ʻi Sānuali 2011, kuo tupu e Siasí ʻi Mōsamipiki ʻo laka hake ʻi he kāingalotu ʻe toko 5,000 kuo mafola ʻi ha vahefonua ʻe ua mo ha kolo ʻo e Siasí ʻe 19 ʻo lotu ʻi he fonuá kotoa. ʻOku toe hoko foki ʻa Mōsamipiki ko e hetikuota ia ʻo e Misiona Mōsamipiki Maputó, ʻa ia ʻoku kau ai e fonua ko ʻEngikolá.6
Kei Foʻou Ka ʻOku Tupulaki
Naʻe pehē foki ʻe ʻEletā Lāsolo M. Nalesoni ʻo e Kōlomu ʻo e Kau ʻAposetolo ʻe Toko Hongofulu Mā Uá he lolotonga ʻene ʻaʻahi ki Matakasikā, Malauī, mo Keniā, “ʻOku tau kei foʻou heni,”7. ʻOku tau mamata ki he ngāue mai ʻa e ʻEikí ki he konitinēniti lahi ʻo ʻAfiliká ke tāpuakiʻi e kakaí … ʻaki e moʻoní, maama ʻo e ongoongoleleí, [kau ai] e ngaahi ouau ʻo e fakamoʻuí mo e hakeakiʻí.”8 Naʻá ne pehē naʻe tautautefito ʻene fakatumutumú ʻi he mālohi ʻo e tuʻunga fakatakimuʻa fakalotofonua ʻi ʻAfiliká: “ʻOku ʻikai ke u lava ʻo fakamatalaʻi atu e lahi ʻemau houngaʻia ʻi he kau taki [fakalotofonua] ko ʻeni, ʻoku foaki honau taimí mo honau talēnití ki he ngāue ʻa e ʻEikí ke tāpuakiʻi e moʻui ʻa e kakaí ni.”9
ʻOku “mātuʻaki fakatuʻamelie” ʻa ʻEletā Nalesoni ki he kahaʻu ʻo e Siasí mo e kakai ʻi ʻAfilika pea mo Matakasikaá koeʻuhí he ʻoku mālohi ange ʻenau tuí ʻi honau ngaahi faingataʻaʻiá. Naʻá ne pehē ʻi he fakataha ʻi Matakasikaá, “Ko e fānau moʻoni kimoutolu ʻa e ʻOtuá, ko e fānau ʻo e fuakava ʻo ʻIsilelí, naʻe teuteuʻi ke fakafeʻiloaki ki he ʻEiki ko Sīsū Kalaisí mo e ʻOtua, ko ʻetau Tamai Taʻengatá, pea nofo ʻi Hona ʻaó mo [homou] ngaahi fāmilí”10. Naʻá ne toe pehē foki, “Ko ha kakai ʻeni ʻoku malava ke fai ha meʻa. ʻOku nau tui. ʻOku nau ʻofa ki he ʻEikí, pea ʻoku nau maʻu e meʻa kotoa ʻoku fie maʻu ke ʻai e kakaí ke nau mālohi moʻoni.”11
Naʻe pehē ʻe ʻEletā Nalesoni he lolotonga ha ʻinitaviu ʻi Nailopi ʻi Keniā, “Kuo tau maʻu e ngaahi falelotu ʻo e Siasí. Kuo tau maʻu ha siteiki ʻi heni [ʻi] Nailopi. Ne fai haʻatau konifelenisi fakasiteiki he ʻahó ni. Ko ha meʻa fakafiefia ke feʻiloaki mo e kakaí. Naʻe fakataha mai ha kakai ʻe tokol tahaafe tupu, [pea naʻa nau mātuʻaki] ʻapasia [mo maʻu ha] kuaea mālie, mo [ha] kau palesitenisī fakasiteiki lelei, [pea mo ha] pēteliake ʻi muʻa. ʻE anga fēfē haʻaku fakahaaʻi ʻeku fiefiá he taimi ʻoku ou mamata ai ki he fakalakalaka peheé?”12
Neongo ʻa e Faingataʻá
Naʻe pehē ʻe ʻEletā Hōlani ʻoku tupulaki ʻa e Siasí ʻi ʻAfilika neongo ʻa e ngaahi faingataʻá. Hangē ko ʻení, naʻá ne pehē, “Lolotonga ʻe tau fakalotofonua ne hoko ʻi Kouti ʻAivolī [Ivory Coast], naʻe kei ō mai pē Kau Māʻoniʻoni ʻi he Ngaahi ʻAho Kimui Ní … ki he temipalé. Ko ha fakaʻilonga maʻongoʻonga ia kiate kiate kinautolu. ʻOku ou ongoʻi ʻaʻapa.”13
Naʻe pehē ʻe ʻEletā Hōlani fekauʻaki mo Siela Lione pea mo Laipīlia fakatouʻosi, “Koeʻuhí ne ʻi ai ha tau fakalilifu lahi kimuí ni mai, ʻoku hoko ia ko e taha ʻo e ngaahi ʻuhinga ʻoku tuʻu mālohi ai ʻa e ongoongoleleí. Kuo nau ʻosi mamata ki he tuʻunga ʻoku ʻikai totonu ke ʻi ai ʻa e moʻuí, pea ʻi he fakamoʻoni ko ʻeni ʻa e kau faifekaú mo e kāingalotú, kuo nau mamata ki he tuʻunga ʻoku lava ke ʻi aí. Kuo lava ʻe he langí ʻo liliu [honau ngaahi faingataʻaʻiá] ko ha tāpuaki, pea ʻoku nau hiki hake kinautolu mei he palopalema fakapolitikalé moe fekeʻikeʻi faka- sivilé.”14
ʻIkai ngata ai, naʻe fakamahinoʻi ʻe ʻEletā Hōlani ko e tupulaki ʻa e Siasí ʻi Simipāpué ʻoku kei hokohoko atu neongo e ngaahi taimi faingataʻa he ngaahi taʻu kimui ní: “Kuo matala ʻa e Siasí. Kuo tau tupulaki, ʻoku ʻi ai hotau ngaahi misiona. Ko e meʻa ia ʻoku lolotonga hoko kotoa ʻi ʻAfiliká.”15
Ko Hono Malangaʻi ʻo e Ongoongoleleí
Naʻe pehē ʻe ʻEletā Hōlani ko e taha ʻo e kī ki he ola lelei ʻa e Siasí ʻi ʻAfiliká, ko e “ʻikai ke tau kau ʻi he ngaahi palopalema fakapolitikale pau. ʻOku tau malangaʻi ʻa e ongoongoleleí. ʻOku tau tokanga ki he fakamaau totonú, pea ʻoku tau tokanga ki he faingamālie fakasōsialé mo e tuʻunga tataú. Ka ʻoku tau fakakaukau [ʻoku maʻu ʻa e talí ʻi he ongoongoleleí], ko ia ʻoku tau malangaʻi ai pē ʻa e ongoongoleleí. Pea naʻe moʻoni ia ʻi he potu kotoa pē pea ʻoku moʻoni ia ʻi ʻAfilika, ʻoku maʻu ʻe he kakaí ʻa e ʻilo, tāpuaki, mo e māmaá ʻi heʻenau moʻuí, pea fakafokifā pē kuo kamata ke liliu e ngaahi meʻá pea tāpuekina ʻenau moʻuí.”16
Ko e Talaʻofa ‘a e ‘Eikí
Naʻe fakaʻaongaʻi ʻe ʻEletā Hōlani e folofola ʻa e Fakamoʻuí, ʻa ia naʻá Ne pehē, “Ko e muimuí ʻe muʻomuʻa, pea [ko e] muʻomuʻá [ʻe] muimuí” (Mātiu 20:16).
Naʻá ne pehē, “ʻOku tōmui ʻi ha ngaahi meʻa ʻe niʻihi e hū mai ʻa e ongoongoleleí ki ʻAfiliká, ka ʻoku tau fakahoko ia ʻi he taimi-tēpile ʻa e ʻEikí—pea ko e taimi-tēpile ʻeni ʻa e ʻEikí, ʻoku ou fakapapauʻi atu [ia]. Naʻe toki kimú ni mai pē hono maʻu ʻe he kakai ʻo ʻAfiliká e ngaahi misioná mo e kau faifekaú, ʻa e ngaahi tāpuaki ʻo e lakanga fakataulaʻeikí, mo e ngaahi alā meʻa peheé. Ko ha konitinēniti lahi, pea ʻoku kei toe lahi e meʻa ke tau faí. Ka ʻoku ou tui ko e tupulaki ʻoku tau mātaʻia he taimí ni ʻi ʻAfiliká ko e konga ia e fakahoko e talaʻofa ʻa e ʻEIkí. ʻOku hū mai e Kāingalotu ʻo ʻAfiliká mo e tui. ʻOku nau laka. ʻOku nau fehangahangai mo e faingataʻa ʻo e tali ʻo e ongoongoleleí mo ʻai ia ke mahino ʻi heʻenau moʻuí.”17