Kae ʻOua Ke Tau Toe Feʻiloaki
Ko e Fononga ki ʻApí
ʻOku nofo ʻa e taha naʻá ne faʻú ʻi ʻIutā, USA.
Ko e taimi ʻoku ʻikai ke tau toe ʻilo ai pe te tau tafoki ki feé, ʻoku fakahā mai ʻe Sīsū Kalaisi ʻa e halá.
Naʻe tatau pē ʻeku foki pasi mai mei he ngāué mo ha toe heka pasi angamaheni. ʻI ha miniti pē ʻe nima, kuo falala atu hoku ʻulú ki he matapā sioʻatá pea ʻikai hano taimi kuo luelue au ʻe he toutou tuʻu mo kamata ngaue ʻa e pasí ke u mohe. Naʻá ku kei fakaangaanga ki he ngaahi fatongia foʻou ne hoko fakataha mai mo ʻeku toki mali lolotonga ʻeku ngāue mo ako taimi kakató. Naʻe ʻi ai ha ngaahi ʻaho ʻe niʻihi naʻe ʻikai ke u toe lava ʻo taʻofi ka ne u mohe he lolotonga ʻo e lele ʻa e pasí ki he ngāué mo e fokí.
ʻI heʻeku tule mohé, naʻá ku ongoʻi ha ngaahi leʻo ʻoku nau kaila mo fai mai ha fakahinohino. Naʻe vave ʻeku fakatokangaʻi naʻe pau ke fakahinohinoʻi ʻa e taha fakaʻuli pasi foʻoú ʻi he afe kotoa pē, ʻi he halá takitaha, pea ʻi he tuʻuʻanga pasi kotoa pē he fononga maile ʻe 50 (kilomita ʻe 80).
ʻI heʻeku ʻilo ʻe meimei lōloange ʻi he houa ʻe taha mo e konga angamaheni ke aʻu ki ʻapí, naʻe kamata leva ke u ʻita. Naʻe fakafonu ʻaki ʻeku fakakaukaú ha ngaahi fakakaukau taʻeʻofa fekauʻaki mo e taʻepoto ʻa e fakaʻulí. Ne hoko atu hono tuʻusi ʻe he ngaahi kaila fakahinohinó ʻeku feinga ke mohé.
Neongo ia, ne ʻikai fuoloa, kuó u fakatokangaʻi kuo tuku e kaikailá. Naʻá ku fakatokangaʻi hake ha fefine ʻokú ne fakahinohino fakalelei ʻa e fakaʻuli pasí mei hono nofoʻangá ʻi ha ʻotu ʻe ua ki muʻa ʻiate au. Naʻá ku sio pē ki heʻene fakahinohino ʻofa mo lelei ʻa e tangatá pea, kimuʻa pea hifo he tuʻuʻanga ne hifo aí, naʻá ne toe fakamatala ange mo ha ngaahi tuʻuʻanga siʻi ʻi he hoko atu ʻo e halá. Hili ha taimi lahi mei heʻeku aʻu ki ʻapí, naʻá ku ongoʻi halaia ʻi heʻeku tōʻonga fakaangá ʻi hono fakafehoanaki ki he fakahinohino angaʻofa ʻa e fefine ko ʻení.
Naʻá ku fakatokangaʻi naʻá ku hangē ko e taha fakaʻuli pasí—ʻoku ʻikai ke u ʻilo hoku halá ʻi he moʻuí ʻo sai ange ʻi he ʻilo ʻe he taha fakaʻuli pasí hono halanga foʻoú. Naʻá ma fakatou ʻi ha hala foʻou. ʻOku ou tui pau naʻá ne fakahoungaʻi ʻi he ʻi ai ha taha naʻá ne ʻosi fonongaʻia ʻa e halá ki muʻa, naʻá ne fie fai ha fakahinohino ʻi he faʻakātaki fekauʻaki mo e meʻa ʻoku tatali mei muʻá.
ʻOku fakahoko ʻe Kalaisi e meʻa tatau maʻatautolu. Ko e taimi ʻoku ʻikai ke tau ʻilo ai e hala ke tau fou aí, ʻoku fakahinohino mai Heʻene sīpingá ʻa e halá. Ko e taimi ʻoku ʻi ai ai haʻatau ngaahi fehuʻí, ʻokú Ne ʻomai ʻa e ngaahi talí ʻi he ʻofa. Kuo tuʻo fiha nai ʻEne feinga ke feau e ngaahi fiemaʻu ʻa e niʻihi kehé, neongo ʻEne ongosia he fononga mamaʻó?
Talu mei he ʻaho ko iá, kuo ʻosi ʻi ai haʻamau kau fakaʻuli pasi foʻou tokosiʻi kehe. Taimi ʻe niʻihi ʻoku nau fie maʻu ha fakahinohino, pea fakamālō ko e sīpinga ne fakahaaʻi mai ʻe he fefine ʻofá kiate aú pea mo hotau Fakamoʻuí, kuó u loto fiefia ke ʻoange ha fakahinohino.