Ko Hoku Taʻokete Faifekaú
“[ʻOku ou fakaʻamu ke vahevahe ʻa e ongoongoleleí ki he kau fie ʻilo e moʻoní]” (“ʻOku Ou ʻAmanaki ʻe Ui Au Ke u ʻAlu ʻo Ngāue Fakafaifekau,” Tohi Hiva ʻa e Fānaú, 91).
Naʻe teuteu homau fāmilí—ʻa ʻeku ongomātuʻá, hoku tokouá, pea mo au—ʻi ha taimi lōloa ke lava hoku tokouá ʻo ngāue fakafaifekau. Ko e taimi kotoa pē ne mau talanoa ai fekauʻaki mo ʻene hoko ko ha faifekaú, naʻá ku fakakata mo ia, ʻo u talaange te u ʻofa ange ki ai ka te u fiefia ke tokotaha pē.
Naʻe faifai pea aʻu mai e ʻaho ke ʻoatu ai ʻene pepa ngāue fakafaifekaú. Naʻá ne feinga ke ola lelei ʻene akó, pea naʻa mau ngāue mālohi kotoa ke fakahū ha paʻanga ki heʻene ngāue fakafaifekaú.
ʻI ha ʻaho ʻe taha, ne telefoni mai ai ʻa e palesiteni fakasiteikí kiate kimautolu ʻo fakahā mai kuo maʻu e uiuiʻí. Naʻe fakakaukau hoku tokouá ke fakaava ʻa e tohí ʻi he ʻosi e maʻu meʻatokoni efiafi ʻi ʻapí. Naʻe ui ia ke ngāue ʻi he Misiona Mekisikou Siti Hahaké.
Naʻe ʻikai fuoloa mei ai kuo mau tuku ia ki he malaʻe vakapuná mo lea fakamāvae ki ai. Naʻe ʻikai lava ʻeku fineʻeikí ke tuku ʻene tangí ʻi heʻemau fokí, ka naʻe ʻikai ke u tangi. Ka ʻi he ʻosi ha houa ʻe ua mei ai, naʻá ku fakatokangaʻi fakafokifā hake he taimi naʻá ku ʻi he loki naʻá ma faʻa mohe ai mo hoku taʻoketé, he ʻikai ke u toe sio ki ai ʻi ha taimi lōloa. Pea ko au leva heni ʻa e tokotaha naʻe ʻikai ke toe lava ʻo taʻofi hoku loʻimatá, peá u tangi mo tangi. Naʻe kuku au ʻe heʻeku ongomātuʻá mo fakanaʻanaʻa, pea naʻa mau ongoʻi kotoa ha fiefia lahi pea mo ha mamahi lahi ʻi he taimi tatau pē.
Talu mei he ʻaho ko iá, mo ʻeku lotu ki he Tamai Hēvaní ʻo kole ki Ai ke Ne tokangaʻi hoku taʻoketé ʻi heʻene ngāué.
Naʻe akoʻi au ʻe hoku taʻoketé kuo pau ke u teuteu mo au foki ke ngāue fakafaifekau. Kuo pau ke u taau ke maʻu ʻa e lakanga fakataulaʻeikí, ʻalu ki he seminelí, mo lavaʻi ʻa e ngaahi taumuʻa ʻi he Ko Hono Fakahoko ʻa Hoku Fatongia ki he ʻOtuá. Naʻá ne akoʻi au ke u ngāue mo tānaki ha paʻanga, lau e ngaahi folofolá, mo talangofua ki hoku kau takí.
ʻOku ou fie ngāue fakafaifekau mo au foki koeʻuhí ke lava mo ha kakai kehe ʻo maʻu ʻa e ngaahi tāpuaki ʻo e ongoongoleleí mo ʻiloʻi ʻoku moʻoni.