Lea ‘a ‘Eletā M. Lāsolo Pālati ki he Kāingalotu ʻi ʻIulopé
ʻOku fie maʻu e tui naʻe fakahaaʻi ʻe he kau fuofua paionia ʻi ʻIulopé, ʻo kapau ʻoku fie ʻunuakiʻi ʻe he Kāingalotu ʻo e Siasí ʻa e puleʻanga ʻo e ʻOtuá ki muʻa, ko e lea ia ne fai ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá, lolotonga ha fakamafola naʻe fai ki he kāingalotu ʻo e Siasí ʻi Sueteni, Tenimaʻake, Finileni pea mo Noaue.
Naʻe fehuʻi ʻa ʻEletā Pālati, “Ko e hā e tuʻunga ʻe aʻu ki ai e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi homou ngaahi fonuá hili ha taʻu ʻe 20 mei heni? Ko e hā e tali te tau fai ki he kau fuofua kāingalotu Sikenitinēvia ʻo e Siasí ʻo kapau he ʻikai ke tau lava ʻo lipooti ange naʻe tatau ʻetau tuí, lototoʻá mo ʻetau ngaahi ngāué pea mo kinautolu, mo fai hotau lelei tahá ke fakamālohia ʻa e Siasí ʻi he uooti, kolo, siteiki mo e vahefonua kotoa pē?”
Ko e fakamafolá ko ha konga pē ia ʻe taha ʻo e ʻaʻahi fakamuimui ne toki fai ʻe ʻEletā Pālati ki Sitokaholoma, Suetení; Lonitoni, ʻIngilaní; pea mo Pālesi ʻi Falaniseé.
Naʻe fakataha ʻa ʻEletā Pālati mo e kau faifekau ʻoku ngāue ʻi Suetení pea naʻá ne lea ki he kakai lalahi kei talavou ʻi Sitokaholomá. Naʻe fakamafola e fakataha ko iá ki ha ngaahi falelotu ʻe 402 ʻi he ʻĒlia ʻIulopé. Naʻá ne lea ʻo fekauʻaki mo e mahuʻinga ʻo e malí pea mo fakamamafaʻi ʻa e ngaahi fili ʻoku fai ʻe he kakai lalahi kei talavoú ʻo kau ki hono hanga ʻe heʻenau moʻui ʻaki ʻa e ongoongoleleí ʻo fakamahino mai ʻa e kahaʻu ʻo e Siasí. Naʻá ne fakatukupaaʻi kinautolu ke nau ʻomi ha foʻi toko taha ki he Siasí pe fakafoki mai ha taha ki he Siasí kimuʻa he fakaʻosinga ʻo e taʻú.
Naʻe lea foki ʻa ʻEletā Pālati ki he kāingalotu ʻo e Siasí ʻi ha konifelenisi ʻi Sikenitinēvia naʻe fakamafola ki he ngaahi ʻapisiasi kotoa ʻi Suetení, Tenimaʻake, Finileni pea mo Noaue. ʻOku feʻunga e tokolahi ʻo e kāingalotu ʻo e Siasí ʻi he ngaahi fonua Nōtiká, mo ha toko 23,000 tupu ʻi ha haʻofanga lotu ʻe 123.
ʻI Lonitoni ʻi ʻIngilaní, naʻe fakataha ai ʻa ʻEletā Pālati mo ʻEletā Hōsei Teisila, ko e Palesiteni Fakaʻēlia ʻIulopé, mo e kau faifekau ʻoku ngāue ʻi Lonitoni mo e ongo Misiona Lonitoní mo Lonitoni Sauté. Naʻe laungeau ha kau faifekau ne nau fakafanongo ki he fakamoʻoni ʻa ʻEletā Pālatí pea nau ongoʻi ʻene loto manavakāvakava ki he ngāue fakafaifekaú.
ʻI Falaniseé, naʻe fakataha ai ʻa ʻEletā Pālati mo ha kau faifekau ʻi Vesailasi. Naʻá ne toe afe foki ke ʻaʻahi ki he feituʻu ʻe tuʻu ai e Temipale Pālesi Falaniseé he kahaʻú, ʻa ia naʻe fanongonongo ʻi he konifelenisi lahi ʻo ʻOkatopa 2011.