Maʻuʻanga Tokoni ki Hono Akoʻi e Fānaú ʻi he LDS.org
Kuo taʻu lahi ʻa hono hanga ʻe he kau faiakó mo e kau takí pea mo e ngaahi mātuʻá ʻo tānaki atu ʻa e Friend mo e makasini Liahoná ki heʻenau akoʻi ʻo e ongoongoleleí. ʻOku lava ke maʻu fakahangatonu atu mei he ʻinitanetí ha niʻihi ʻo e ngaahi maʻuʻanga tokoni tatau pē ko ʻení mei he LDS.org pea kuo fokotuʻutuʻu ia ke ke maʻu ngofua ʻa e ngaahi tokoni fakalēsoni ʻokú ke fekumi ki aí.
ʻE lava ke ke kumi ki he ngaahi maʻuʻanga tokoní ʻo fakatatau mo hono tefitó, pe faʻahingá pe fika ʻo e lēsoni Palaimelí ʻi he lea faka-Pilitāniá ʻaki haʻo fakahū ʻa e “Resources for Teaching Children [Maʻuʻanga Tokoni ki Hono Akoʻi ʻo e Fānaú] ʻi he search bar he LDS.org. ʻE lava foki ke ke hū ki he peesi ko ʻení mei he peesi ʻo e ngaahi tohi lēsoni ʻa e Palaimelí.
ʻE maʻu atu foki e konga ki he ngaahi taumuʻa ʻo e Maʻuʻanga Tokoni ki Hono Akoʻi ʻo e Fānaú ʻi he lea faka-Sipeiní mo e faka-Potukalí, ʻa ia ʻe lava ke ke hū ki ai mei he LDS.org pe peesi ʻuluaki ʻo e Liahoná fakatouʻosi ʻi he ngaahi lea fakafonua ko ʻení.
ʻOku kau he ngaahi maʻuʻanga tokoní ha ngaahi talanoa, ʻekitivitī, ngaahi fakamatala mei he Liahoná pea mo ha ngaahi mītia kehe kuo fakangofua ʻe he Siasí ki hono akoʻi ʻo e fānaú ʻi ʻapi pe ʻi he lotú. ʻE tānaki atu ha ngaahi tefito kehe ʻi he māhina takitaha.