ʻIkai Toe Maʻunimā Au: Ko ʻEku Fononga ke Ikunaʻi ʻa e Ponokalafí
Naʻe ʻikai ke u teitei fakakaukau ʻi heʻeku hoko ko ha finemuí, ʻe hoko ʻa e ponokalafí ko ha faʻahinga meʻa te u fekuki mo ia.
Tā fakatātaaʻi ʻe Jim Madsen
Naʻe ʻikai ke u teitei fakakaukau ʻe hoko ʻa e maʻunimā ʻe he ponokalafí ko ha palopalema ʻa ha taʻahine. Naʻe fakamoʻoniʻi ʻeku fehalākí ʻi hoku taʻu 16 nai. Naʻá ku maʻu ha vitiō ponokalafi, pea koeʻuhí naʻá ku tokotaha pē pea fieʻilo, naʻá ku mamata ai. Hili e ʻuluaki taimi ko iá, naʻá ku ongoʻi naʻe hangē kuo pau ke u mamata ha meʻa ʻi he ʻaho kotoa pē. Naʻe fakaʻau ʻo maʻunimā au ʻe he ponokalafí.
Naʻe ngaohi au ʻe he mamata he ponokalafí ke u ongoʻi halaia. Naʻá ku ʻilo naʻe hala, ka naʻe ʻikai ke u fai ʻe au ha meʻa ke taʻofi ia. Naʻe ʻikai ke u teitei fiefia, pea naʻá ku ongoʻi ʻuli mo uesia ʻi he ngaahi fakatauele ʻuli ʻa Sētané. Ka naʻák u kei maʻu pē ha ngaahi founga ke mamata ai koeʻuhí ke fakatōliʻa ʻeku holí. Naʻe fakaiku hono maʻunimā aú ki ha ngaahi faihala lahi ange. Naʻá ku loi ki he taha kotoa pē: ki hoku tokouá, ʻeku faʻeé, pea kovi tahá, ki he ʻEikí pea mo au. Naʻá ku pehē pē kiate au he ʻikai kovi ha toe foʻi heleʻuhila pē taha, pea he ʻikai kovi fēfē ha toe foʻi talanoa ʻuli pē ʻe taha.
Naʻá ku kei ʻalu pē ki he lotú, Mutualé, mo e seminelí, ka naʻe ʻikai ke u maʻu e loto totonú pe Laumālié ʻiate au. Naʻá ku ʻitangofua, ko ia naʻe ʻikai ke u maʻu ai ha meʻa mei he ngaahi lēsoní. Naʻe tuku e totongi ʻeku vahehongofulú, lotú, mo e lau e folofolá. Naʻá ku ongoʻi halaia, ka naʻe ʻikai pē ke u lava ʻo taʻofi. Naʻá ku fakaʻau ʻo kovi ange ʻi he ʻaho kotoa pē.
Faifai, pea tapui ʻeku lava ʻo sio he ponokalafí. ʻI he kamataʻangá, naʻá ku ongoʻi masiva ʻi he ʻikai ke ʻi ai e ponokalafí, ka ne u fakatokangaʻi kuo liliu ke lelei ange ʻa e ngaahi meʻá. Naʻe kehe ʻeku ngaahi angafaí. Naʻe ʻikai ke u sio ponokalafi ʻi he ʻaho kotoa pē. Naʻá ku kei maʻu pē ha ngaahi ongo ke sio ai, ka naʻe lelei ange ʻeku tekeʻi kinautolú. Hili ha taʻu ʻe ua hono maʻunimā au ʻe he ponokalafí, naʻe kamata ke u lotua maʻu pē ha mālohi pea tuku ʻaupito ʻeku toe mamata aí. Ka naʻá ku kei ongoʻi ʻuli pē ʻi loto. Naʻá ku ʻilo ne fie maʻu ke u talanoa mo e pīsopé. Ka naʻe ʻikai ke u lava ʻo fakahoko ia.
Ne faifai, pea hili haʻaku fanongo ki he fakamatala ʻa ha kakai tokolahi kau ki heʻenau foua e founga ʻo e fakatomalá mo e ngaahi faingataʻa ne nau ikunaʻí, naʻá ku ongoʻi naʻe fie maʻu moʻoni ke u talanoa mo ʻeku pīsopé. Naʻá ku toe fakatokangaʻi foki naʻe mole ha tāpuaki lahi ʻi he Siasí meiate au: ko hoku tāpuaki fakapēteliaké.
Naʻá ku fokotuʻu leva ha taimi ke u talanoa ai mo ʻeku pīsopé.
Naʻá ku ongoʻi mā heʻeku hū atu ki he ʻōfisi ʻo ʻeku pīsopé he pō ʻo hoku ʻinitaviú. Naʻá ku manavasiʻi naʻa sio mai pē kiate au peá ne talamai ʻoku ʻikai ha toe ʻamanaki ʻi heʻeku palopalemá pea kuó u keli pē ʻe au ha luo kuo fuʻu loloto ke toe hao mei ai. Naʻá ku manavasiʻi naʻa ʻikai ke toe tatau ʻene vakai mai kiate aú. Ka ʻi heʻeku fakamatala ange ki ai e meʻa kotoá, naʻá ne malimali mai ʻi he ʻofa mo fakafanongo moʻoni. Naʻe tokanga moʻoni kiate au. Hili ʻeku talanoa mo ʻeku pīsopé mo ngāueʻi ha ngaahi meʻa, naʻe faifai peá ne talamai kuó u maʻa.
Ko e ngaahi taʻu naʻe maʻunimā ai au ʻe he ponokalafí ko e taimi faingataʻa taha ia ʻi heʻeku moʻuí, ka naʻá ku ongoʻi mātuʻaki fiefia ʻi heʻeku mavahe mei he ʻōfisi ʻeku pīsopé kuó u ongoʻi maʻá. Naʻe hangē ia kuo huʻi atu mei hoku umá ha kavenga mamafa ne lau taʻu ʻeku fuá. Naʻá ku fiefia he lava ke maʻu hoku tāpuaki fakapēteliaké mo maʻu ʻi he tuʻunga taau ʻa e sākalamēnití mo toe maʻu ʻa e Laumālié. Naʻá ku ongoʻi hangē ha taha foʻoú. Ne talamai foki ʻe he kakaí ʻoku kehe hoku fōtungá pea ne ʻi ai ha malama makehe ʻiate au. Naʻá ku fiefia ange he taimi kotoa pē mo maʻu ha fakakaukau lelei ange ki he meʻa kotoa pē.
ʻOku ou ʻilo te tau lava ʻi he tokoni ʻa e ʻEikí ke liliu mo ikunaʻi ʻa e maʻunimaá. Pea ʻoku ʻikai fie maʻu ia ke tau manavasiʻi ke talanoa mo ʻetau pīsopé, koeʻuhí he te ne tokoniʻi kitautolu ʻi heʻetau fakatomalá ka tau lava ʻo toe ongoʻi maʻa tuʻunga he Fakalelei ʻa Sīsū Kalaisí.