Hoko ko ha Kāingalotu Lelei Ange ʻi he Fengāueʻaki mo e Ngaahi Tui Fakalotu Kehé
ʻOku nofo ʻa e taha naʻá ne faʻú ʻi ʻIutā, USA.
Ko e taimi ʻoku tau ngāue fetākinima ai mo kinautolu ʻo e ngaahi tui fakalotu kehé, ʻoku ʻikai ngata pē ʻi heʻetau langa hake hotau tukui koló mo hotau ngaahi vā fetuʻutakí ka ʻoku tau hoko foki ai ko ha kau ākonga lelei ange.
ʻOku faʻa kole ʻe he kau taki ʻo e Siasí ki he kāingalotú ke nau kau mo e kau loto moʻoní—tatau ai pē pe ko e hā ʻenau tui fakalotú—ʻi he ngāue tokoní pea mo e ngaahi meʻa ki he moʻui angamaʻá. Pea ʻoku faʻa tā pē ʻe he kau taki ʻo e Siasí ʻa e sīpingá. Naʻe maʻu kimuí ni mai ʻe Palesiteni Tietā F. ʻUkitofa, fakataha mo hono uaifi ko Halietá, ha fakalāngilangi Fakataʻu ʻo e Tokoni ʻOfa Fakaetangatá (Humanitarian of the Year award) mei he Ngaahi Ngāue Tokoni Fakakolo ʻa e Katoliká (Catholic Community Services); naʻá ne pehē ko e mālie ʻo e “ongo Siamane, ne siasi Lūtelo kimuʻá, kuó na hoko ʻeni ko ha ongo Māmonga faivelenga kuo fakalāngilangiʻi ʻe he kau Katolika ʻi he ʻIunaiteti Siteiti ʻo Ameliká.”1
Kuo talia lelei ʻe he kāingalotu he funga ʻo e māmaní e kole ke umataha mo e kau mēmipa ʻo e ngaahi kautaha kehé ʻo tokoni. Kuo ongo kiate au ha fakamatala ki ha ngaahi uooti ʻo e Siasí ʻoku nau tō ngoue fakakolo, fai ha ngaahi konifelenisi ʻa e ngaahi tui fakalotú ʻi he ngaahi ʻulungaanga maʻá, pea mo fakahoko ha ngaahi fakamaʻa fakakolo mo e ngaahi siasi kehé.
Kuó u ʻilo ʻi heʻeku ngāue mo kinautolu ʻo e ngaahi tui fakalotu kehé, ʻoku moʻoni e fakalotolahi meia ʻEletā Kueniteni L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá: ʻOku ʻikai ngata pē ʻi hono langa hotau tukui koló ʻe he ngāue tokoni fakamātoato mo fakaʻapaʻapá ka ʻokú ne toe ʻai foki ke tau tupulaki fakakātoa mo fakafoʻituituí ʻi heʻetau ʻofa ki he ʻOtuá mo ʻEne fānaú.”2
Ko Hono Fakaleleiʻi Ange ʻo e Māmaní
Naʻe hiki mai ki hoku koló he ngaahi taʻu siʻi kuo hilí ha faifekau Pelesipiteliane, ʻo fie tokoni ki hono kaungāʻapí kotoa, kae ʻikai ko hono kāingalotú pē. ʻI heʻene feinga ke tokoni he tukui ʻapi ne tokolahi taha ai ʻa e kakai Siasí, ʻi he anga fakakaumeʻa, fie tokoni, mo fakaafe ki he ngaahi paati fakafiefia ʻa e kaungāʻapí, naʻe kamata ke kau atu ʻa e kāingalotu ʻo e uōtí ʻi he ngaahi ngāue tokoni ʻofa hono kāingalotú; naʻá ne fakahoko fakataha mo hono kaungāʻapi ʻo e ngaahi tui fakalotu kehekehé ha kumi paʻanga naʻe tokoni lahi ki ha fāmili Siasi naʻe ʻi ai haʻanau ngaahi fakamole fakafaitoʻo naʻe fie maʻu ke totongi leva.
Naʻe pehē ʻe he ʻAposetolo ko ʻOasoni F. Uitinií (1855–1931), “ʻOku fakaʻaongaʻi ʻe he ʻOtuá ha kakai tokolahi ki hono fakahoko ʻEne ngāue maʻongoʻonga mo fakaofó. … ʻOku fuʻu lahi fau, fuʻu faingataʻa, ke fai pē ʻe ha toko taha.”3 ʻE lava ke fakahoko ha ngaahi meʻa maʻongoʻonga ʻi he taimi ʻoku fetākinima ai ʻa e kakai leleí. Naʻe hoko e ngāue ʻa e faifekau ʻi homau feituʻú ke fokotuʻu ai ha kōmiti fakakolo ʻa e ngaahi tui fakalotu kehekehé, fakataha mo e Fineʻofa homau siteikí, ʻo fai ha konifelenisi ʻa e houʻeiki fafiné ʻo nau foaki ai ha nāunau haisini mo ha ngaahi tohi ki he ngaahi kautaha kumi hūfangá. ʻOku hoko e ngaahi fakafehokotaki ko ʻeni ʻo e ngaahi tui fakalotu kehekehé ke lava ai e kau mēmipa ʻo e siteikí ʻo tokoniʻi ha fakatahaʻanga lotu ke fafanga ha kakai kumi hūfanga tokolahi pea mo tokoni ʻo ka fie maʻu ʻe ha siasi ha kau ngāue tokoni makehe ʻi he fale ʻo e kau tukuhāusiá.
Kuo ʻosi fakahā ʻe Palesiteni Tōmasi S. Monisoni ki he kāingalotú, “ʻOku ʻi ai hatau fatongia … ke ngāue fekoekoeʻi mo e ngaahi siasi pea mo e ngaahi kautaha kehé,”4 pea kuo tāpuekina ʻe he meʻá ni ʻa e māmaní ʻo mahulu atu ʻi he tokoni ʻofa faketangatá. ʻI ha lea ne fai ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, ki he kau taki faka-Kalisitiane ʻi he ʻIunaiteti Siteití, naʻá ne fakamatalaʻi ai ha ngaahi pōtalanoa ʻa e kau Kalisitiane Siasí mo e siasi ʻEvangelioó naʻe fai ʻi he ʻUnivēsiti Pilikihami ʻIongí.5 Ko e ola ʻe taha ʻo e ngaahi konifelenisi ko ʻení ko e kole fakamolemole ha taki lotu ʻiloa ʻi hono fakafōtungahalaʻi ʻo e tui faka-Māmongá ʻe ha niʻihi ʻi hono kakaí.6 Naʻe pehē ʻe ʻEletā Hōlani fekauʻaki mo e faʻahinga fakafehokotaki peheé, “ʻOku ngali kehe, ka ʻoku ou tui ko e konga ʻeni ʻo ha fokotuʻutuʻu fakalangi ʻo ha ngaahi meʻa ʻoku hoko ʻi he ngaahi taimi faingataʻá ni.”7
Ko Hono Fakaleleiʻi Ange Hotau Ngaahi Vā Fetuʻutakí
ʻI heʻetau ngāue mo e niʻihi kehé, ʻe lava ha ngaahi fakahinohino pau ʻo tokoni ke mahuʻingamālie ange ʻetau fengāueʻakí pea taʻofi hano fai ha meʻa fakatupu mamahi. Naʻá ku nofo ʻi ha taimi ʻi ha kolo lahi peá u pole ke u tokoni ʻi ha polokalama akoʻi fakalotofonua ʻa ha siasi he feituʻú, naʻe fakaʻatā ki he kakaí—ka ne u toki ʻilo naʻe ʻikai tali ʻe he tokotaha naʻe pulé ʻeku mēmipa ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe fakalotoʻi au ʻe he meʻa ne u aʻusia ko ʻení ke u fakamahuʻingaʻi ha tokoni ʻa ha taha pē ʻo tatau ai pē pe ʻoku siasi hā (pe ʻikai kau ki ha siasi). ʻOku ou muimuiʻi ʻi he loto houngaʻia ha taha ʻoku tokanga ke ako fekauʻaki mo e Siasí, ka ʻoku ou toe ʻilo foki ʻoku tau fakahoko fakamātoato ʻe kitautolu Kau Māʻoniʻoni ʻi he Ngaahi ʻAho Kimui Ní ʻa e tukupā ʻa Sīsū ke tau ʻofa ʻi hotau kaungāʻapí, fakakofuʻi ʻa e telefuá, fafangaʻi ʻa e fiekaiá, mo ʻaʻahi ki he kau pōpulá (vakai, Mātiu 25:34–36) ʻo ʻikai ʻamanaki ke fakaului kinautolu ʻoku nau maʻu [ʻetau tokoní] pe ko kinautolu ʻoku ngāue mo kitautolú. ʻOku ʻikai teitei fie maʻu ʻe he fetakinima fakavahaʻa siasi ʻoku moʻoni mo fakaʻapaʻapá ha faʻahinga kulupu, kau ai kitautolu, ke fakaʻikaiʻi ʻene tui fakalotú. Ka, ʻokú ne poupouʻi kinautolu ʻoku kaú ke “ʻoua ʻe fakakikihi mo ha siasi” (T&F 18:20) pea “fakakofuʻi ʻa [kinautolu] ʻaki ʻa e haʻi ʻo e manavaʻofá” (T&F 88:125).
Naʻe maʻu ha fakahinohino ʻaonga ʻe taha mei ha taki fakasiteiki fakapotopoto ʻi homau feituʻu ne fuʻu tokolahi ai ʻa e Siasí. Naʻá ne faleʻi ʻa e kāingalotu ne ngāue fakataha mo e ngaahi tui fakalotu kehé ke ʻoua te nau “puleʻi” ʻaki haʻanau fakaaoao ʻi he ngaahi faituʻutuʻuní pe tuʻunga fakatakimuʻá ka ke nau ngāue fealēleaʻaki mo tuku ki he taha kotoa ke ne “maʻu ʻa e faingamālie tatau” (T&F 88:122). Naʻe toe poupouʻi foki ʻe he taki ko ʻení, ʻa ia kuo lahi fau ʻene taukei he fengāueʻaki mo e ngaahi siasi kehé, ʻa e kāingalotú ke nau fakatupulaki ha vā fetuʻutaki lelei. Kuó ne ʻilo, ko ha niʻihi kuo ʻosi ngāue fakataha mo e Kāingalotu ʻo e Ngaahi ʻAho Kimui Ní, kuo nau ʻiloʻi ʻoku nau ngāue mālohi mo angalelei ka ʻoku nau mahuʻingaʻia ange ʻi he ʻai ke ʻosi ʻa e ngāué ʻi he fakatupulaki ha feohi fakakaungāmeʻá.
Kuo fakapapauʻi ʻe heʻeku taukei ʻi he ngāue fakakoló mo fakaakó ʻoku mālohi ʻa e Laumālié ʻi he taimi ʻoku fakataha ai ha kakai kehekehe ʻi ha ngāue ʻaongá. ʻOku teke ʻe he ʻofa fakatokouá mo e loto haohaoá ʻa e ngāué ki muʻa ʻo laka ange ia ʻi he ngāue lahi ʻoku faí.8
Naʻe pehē ʻe ha tokotaha Siasi naʻe lea ʻi ha konifelenisi fakavahaʻa siasi ʻoku tokoni e fetuʻutaki mo e niʻihi kehé kiate kinautolu ʻoku ʻikai kau heʻetau tui fakalotú ke mahino lelei ange kitautolu kiate kinautolu.9 Naʻe akoʻi ʻe ha taha poto ʻe taha, ʻoku ʻikai ke tau siasi, ha seminā ʻo e Tui Faka-Māmongá ʻi ha ʻunivēsiti ʻiloa. Naʻá ne ʻilo naʻe fie ako ʻene kau akó ki he Siasí “koeʻuhí pē … he naʻe ohi hake kinautolu ke nau tui ko e tui fakalotú ko e meʻa faka-Sētane, ka ko ʻenau maheni mo e ngaahi kaungāmeʻa Māmongá mo e kaungā ngāué naʻe ʻikai tatau ia mo e lau koiá.”10
Ko Hono Fakaleleiʻi Ange Kitautolú
ʻOku ʻikai ngata he tokoni e ngāue fakataha mo e niʻihi kehé ke nau maʻu ha mahino kiate kitautolu, ka ʻokú ne fakalotolahiʻi kitautolu ke tau ako meiate kinautolu pea ke tau fakatokangaʻi lahi ange ko e ʻOtuá “ʻoku ʻikai filifilimānako” (T&F 1:35). ʻOkú Ne tokoni ki he kakai lelei ʻi he tui fakalotu mo e anga fakafonua kotoa pē ʻi heʻenau feinga ke fakatupulaki e moʻui ʻEne fānaú.
ʻOku tokoni hono fakatokangaʻi ko ʻeni e lelei ʻi he niʻihi kehé ke tau loto fakatōkilalo—ʻo fehangahangai ia mo e kau Fālesi naʻe valokiʻi ʻe Sīsū ʻi heʻenau hīkisia fakalaumālié (vakai, Mātiu 23) pe ko e kakai Sōlamí, ʻa ia naʻe fakamatalaʻi ʻe he Tohi ʻa ʻAlamaá naʻe mavahe mo fiemeʻá (vakai, ʻAlamā 31). ʻOku ʻai ʻe he tali e lelei ʻi he niʻihi kehé ke tau lava ʻo hoko ko ha kakai lelei ange.
He ʻikai ngata pē ʻa e lava ke mafola ʻetau ʻofá mei he siakale vāofi ʻo e fāmilí ka te ne kāpui mo hotau kaungāmeʻá pea aʻu ki hotau kaungāʻapí—pea naʻa mo hotau filí. Naʻe fakamatala ha mēmipa ʻo e Siasí naʻe ngāue he vaʻa fakakautau ʻa ʻAmeliká–ʻi he Tau Lahi Hono II ʻa Māmaní ʻi Siapani ki heʻene fekuki mo ʻene fehiʻa ʻi he kakai Siapaní. Neongo ia, hili hono talitali ia ʻe he kakai ʻo e koló ki he falelotu faiʻanga lotu ʻi Siapaní, naʻá ne fakatokangaʻi “naʻe ongo honau laumālié kiate au, pea naʻá ku ongoʻi ha liliu fakaofo ʻi heʻeku ngaahi ongo kiate kinautolú. Naʻe mōlia hoku loto tāufehiʻá. … Naʻá ku fakakaukau ki he meʻa naʻe hoko ʻi he falelotú pea mo e liliu fakaofo naʻá ku ongoʻi ki he kakai ʻi aí.”11
Ko e meʻa tatau pē, ko e taimi ʻoku tau talitali moʻoni ai ʻa e niʻihi kehé ki hotau lotolotongá, te nau lava ʻo liliu mo kinautolu. Naʻe tohi ʻe ha Kalisitiane Lotu Fakaʻevangeliō ne ʻosi mei he ʻUnivēsiti Pilikihami ʻIongí fekauʻaki mo ʻene aʻusiá mo fakamatalaʻi ʻene ʻuluaki feinga ke teketekeʻi ʻa e fānau ako Siasí. Kae hili ha faifai peá ne maʻu ha kaungāmeʻa leleí, naʻá ne fakahoungaʻi “ʻa e fakamamafa naʻá ku ongoʻi naʻe fai ʻe he Kau Māʻoniʻoni ʻi he Ngaahi ʻAho Kimui Ní ki he ofi ʻa e ʻOtuá ki he faʻahinga ʻo e tangatá. Ne kamata ke mahino kiate au lolotonga ʻeku feinga ke pukepuke e tuʻunga haohaoa ʻo e ʻOtuá [ʻi hoku ʻatamaí], kuó u liʻaki ai e ofi mai ʻa e ʻOtuá [kiate aú]—pea naʻe tokoni lahi e ʻilo ko ʻení kiate au.”12
Naʻe fakahaaʻi ʻe ʻEletā Hōlani ʻi heʻene lea ki he kau taki faka-Kalisitiané “[ʻoku] ʻi ai ha faingagataʻa ʻi hono ako ha meʻa foʻou ʻo kau ki ha taha kehe. ʻOku hanga maʻu pē ʻe he ngaahi fakakaukau foʻoú ʻo uesia ʻa e ngaahi fakakaukau motuʻá, pea ko ia ai kuo pau ke fai hano toe fakakaukauʻi, fokotuʻutuʻu, mo toe langalanga hake ʻetau mahino ki māmaní.”13 ʻI he fakakaungāmeʻa ko ia ki he kakai ʻo e ngaahi tui fakalotu kehé, ʻoku ou faʻa fakatokangaʻi ʻoku ou ʻanalaiso homau faikehekehé, ʻo feinga ke fakafaikehekeheʻi ʻa e kehekehe ʻo e ʻulungaanga fakafonuá mei he ngaahi kehekehe fakatokāteliné, ka ʻi he taimi tatau pē ʻoku ou feinga ke fakahoungaʻi ʻa e meʻa mahuʻinga kotoa pē mo fakaʻofoʻofa te nau foakí. ʻOku moʻoni pē, ʻoku faʻa tuʻu fakatuʻutāmaki he taimi ʻe niʻihi ʻa e fokotuʻutuʻu ha meʻa foʻoú, ka mahuʻinga maʻu pē. ʻOku ou fakatokangaʻi ʻoku ou liʻaki ha meʻa lahi ange mei hoku ngaahi ʻulungaanga fakafonuá ka u haʻu ʻo ofi ange ki he uho ʻo e ongoongoleleí.
Naʻe fakaafeʻi ʻe ha ngaahi kulupu Siasi hoku kaungāmeʻa faifekaú ke lea ʻi he tefito ko e “ʻofa ʻi hotau kaungāʻapí neongo ʻa e kehekehe ʻo e tui fakalotú,” pea naʻá ne aʻusia hono tali lelei ʻe kinautolu naʻe ʻi aí. ʻI he tafaʻaki ʻe tahá, naʻá ne fakaafeʻi ha Kāingalotu tokolahi ʻo e Siasí, kau ai mo au, ke lea ʻi ha ngaahi faiʻanga lotu kehekehe ʻi he tefito tatau. ʻI he ʻosi ʻa e lotú, naʻá ku fakatokangaʻi ne ʻātakaiʻi au ʻe he haʻofanga lotú ko e fie talanoa mo fie fāʻofua kiate au, pea aʻu ʻo tō honau loʻimatá ʻi he feʻofaʻaki mo e femahinoʻaki ʻo e ʻofa mo e mahino. ʻI he ngaahi aʻusia pehení, naʻá ku fakatokangaʻi ʻoku moʻoni e aofangatuku ʻa ʻEletā Hōlaní:
“ʻI he taimi te tau vakai atu ai ʻo fakalaka ʻi he lanu e kakaí, kulupu fakamatakalí, siakale fakasōsialé, siasí, fale lotú, fale lotu lahí, tuʻutuʻuni fakalotú, mo e fakamatala ʻo e tuí, pea fai hotau lelei tahá ke vakai totonu pe ko hai kinautolu—ko e fānau ʻo e ʻOtua tatau—ʻoku hoko ha meʻa lahi mo ʻaonga ʻi loto ʻiate kitautolu pea te tau toe vāofi ange ai mo e ʻOtua ko ia ʻoku hoko ko e Tamai kiate kitautolu kotoá.”14