Fakatomalá

ʻOku hanga ʻe he Fakalelei ʻa e Fakamoʻui ko Sīsū Kalaisí ʻo ʻai ke malava ʻa e fakatomalá, pea kuo pau ke fakatomala hotau taha kotoa.

ʻOku fakamatalaʻi ʻe ʻEletā Peletilī D. Fositā ʻo e Kau Fitungofulú ʻi ha fakamatala he peesi 54–55 ʻo e makasini e māhina ní, ʻoku tau manavasiʻi he taimi ʻe niʻihi ʻi he taimi ʻoku fie maʻu ai ʻe he mamafa ʻo e angahalá ke vete ki ha pīsope pe palesiteni fakakoló. Neongo ia, “[ko] kinautolu kuo nau ʻosi fononga ʻi he hala ʻo e fakatomalá ʻoku ʻikai ngata pē ʻi he malava ke fai e fonongá ka ko e taimi kuó ke ʻi ai ai peá ke vakai maí, ko e meʻa ʻeni te ke mamata ki aí:

Te ke lava ʻo fai ʻeni. Pea ʻi hoʻo fai iá, ʻe lelei ange ʻa e meʻa kotoa. …

“Ko hoʻo kamatá pē, te ke ongoʻi fiemālie.…

“ʻE tokoni atu kiate koe hoʻo pīsopé ʻi he meʻá ni. Te ke ʻofa ai pea ʻikai toe ngalo ia.”

Ngaahi Fokotuʻu ki hono Akoʻi ʻo e Toʻu Tupú

Lau mo hoʻo kau taʻu hongofulu tupú ʻa e konga fekauʻaki mo e fakatomalá ʻi he Ki Hono Fakamālohia ʻo e Toʻu Tupú. Aleaʻi ʻa e ngaahi tāpuaki te tau lava ʻo maʻu tuʻunga he Fakaleleí mo e founga ʻoku malava ai ʻe he fakatomalá ke fakahoko ʻení.

Te ke lava foki ʻo vahevahe hoʻo fakamoʻoni ki he fakatomalá mo e Fakaleleí pea mo ʻena mahuʻinga ki hoʻo moʻuí. Mahalo foki te ke fie kole ki hoʻo kau taʻu hongofulu tupú ke vahevahe atu ʻenau fakamoʻoni ki he fakatomalá. Pea ka taau, te ke lava ʻo fakaafeʻi ʻa e fānau taʻu hongofulu tupú ke nau tokoni ki honau ngaahi tokoua pe tuofāfine kei īkí ʻi he ʻekitivitī ʻoku fakamatalaʻi atu ʻi laló.

Ngaahi Fokotuʻu ki hono Akoʻi ʻo e Fānaú

Koeʻuhí ke fakatātaaʻi e ʻuhinga ʻo e nofo maʻu ʻi he hala kuo fekau ʻe he ʻEikí ke tau muimui aí, fakakaukau ke ke ngāue ʻaki ha kiʻi kā meʻavaʻinga (pe ha kiʻi vakapuna, vaka, pe kiʻi saliote) ʻi ha lēsoni fakataumuʻa. Fakaʻaongaʻi ha mape pea kole ki he kiʻi tamasiʻí ke ne ʻunuakiʻi māmālie ʻa e kaá mei ha feituʻu ʻi he mapé ki ha feituʻu ʻe taha. Fehuʻi ange, “Ko e hā ʻoku fie maʻú kapau ʻe kamata ke hē ʻa e kaá mei he halá?”

Ko e taimi ʻe mahino ai kuo pau ke fakafoki mai ki he hala totonú ha meʻalele, kapau ʻe hē, fehuʻi ange pe ʻoku tatau fēfē ʻeni mo e fakatomalá. Fakamatalaʻi ange ʻoku ʻi ai ha taimi ʻe niʻihi ʻi heʻetau fononga ʻi he moʻuí, kuo pau ke liliu ʻetau tūkufuá ke fakapapauʻi ʻoku tau taumuʻa ki he feituʻu tonú. Te tau lava ʻo fai ʻeni he taimi ʻe niʻihi ʻiate kitautolu pē. Ka ʻi he taimi ʻe niʻihi ʻoku tau fie maʻu ha tokoni. Kole ki he fānaú ke nau fakamatala ki ha taimi naʻa nau tokoniʻi ai pē kinautolu, mo ha taimi naʻe tokoniʻi ai kinautolu ʻe ha niʻihi kehe, pea mo e ngaahi founga ʻe lava ai ʻo tokoniʻi kinautolu ʻe he Tamai Hēvaní mo Sīsū Kalaisi. Manatuʻi ʻi hoʻo akoʻi ʻa e tefito ko ʻení ko e fānau ʻoku siʻi hifo ʻi he taʻu valú ʻoku ʻikai fie maʻu ke nau fakatomala, ka ʻoku mahuʻinga ke nau ako ki he tefitoʻi moʻoni ʻo e fakatomalá.

Aleaʻi ʻenau ngaahi talí mo kinautolu pea talanoa ki he anga ʻene hoko ʻa e fakatomalá ko ha meʻaʻofa mei he Tamai Hēvaní mo Sīsū Kalaisi pea tau lava ai ʻo toe foki kiate Kinaua.