Pōpoaki ʻa e Faiako ʻAʻahí
Ko e Misiona Fakalangi ʻo Sīsū Kalaisí: Ko e ʻAlo pē Taha Naʻe Fakatupú
Ako ʻi he faʻa lotu ʻa e fakamatala ko ʻení pea feinga ke ke ʻilo e meʻa ke vahevahé. ʻE fakatupulaki fēfē ʻe he mahino ʻo e moʻui mo e misiona ʻo e Fakamoʻuí hoʻo tui kiate Iá mo tāpuekina ai kinautolu ʻokú ke tokangaʻi ʻi he faiako ʻaʻahí? Ke maʻu ha fakamatala lahi ange, ʻalu ki he reliefsociety.lds.org.
Tuí, Fāmilí, Fakafiemālié
ʻOku ui hotau Fakamoʻui ko Sīsū Kalaisí ko e ʻAlo pē Taha Naʻe Fakatupú koeʻuhí he ko Ia toko taha pē he māmaní kuo ʻaloʻi ʻi ha faʻē matelie mo ha Tamai taʻe-faʻa-mate. Naʻá Ne maʻu ʻa e ngaahi mālohi fakalangí mei he ʻOtua, ko ʻEne Tamaí. Pea mei Heʻene faʻē ko Melé, naʻá Ne maʻu mei ai ʻa e tuʻunga matelié pea moʻulaloa ai ki he fiekaiá, fieinuá, ongosiá, mamahiʻiá, mo e maté.1
Koeʻuhí ko Sīsū Kalaisí ko e ʻAlo pē Taha ia Naʻe Fakatupu ʻo e Tamaí, naʻá Ne lava ʻo tuku hifo ʻEne moʻuí mo toe toʻo hake ia. ʻOku akoʻi ʻe he folofolá “ʻi he fakalelei ʻa Kalaisí,” te tau lava “ʻo toetuʻu” (Sēkope 4:11). ʻOku tau toe ʻilo foki ko e taha kotoa ʻe “lava ke fokotuʻu hake ia ʻi he taʻe-faʻa-mate ki he moʻui taʻengatá” kapau te tau “tui” (T&F 29:43).
ʻI he fakaʻau ke mahino kakato ange kiate kitautolu hono ʻuhinga ʻo e hoko ʻa Sīsū ko e ʻAlo pē Taha Naʻe Fakatupu ʻo e Tamaí, ʻe tupulaki ʻetau tui kia Kalaisí. Naʻe pehē ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e tui kia Sīsū Kalaisí ko e tui mo e fakapapauʻi ia ʻo (1) Hono tuʻunga ko e ʻAlo Tofu Pē ʻe Taha ʻo e ʻOtuá ne Fakatupú, (2) ʻEne Fakalelei taʻe-fakangatangatá, mo (3) ʻEne Toetuʻu moʻoní.”2 Kuo ʻosi fakamoʻoni e kau palōfita ʻo onopōní: “[Ko Sīsū Kalaisi] ʻa e ʻAlo Tofu pē ʻe Taha ʻo e Tamaí naʻe Fakatupú ʻi he kakanó, ko e Huhuʻi ʻo e māmaní.”3
Mei he Folofolá
Sione 3:16; Tokāteline mo e Ngaahi Fuakava 20:21–24; Mōsese 5:6–9
Mei Hotau Hisitōliá
ʻOku tau lau he Fuakava Foʻoú kau ki ha kau fafine, ne ʻilo honau hingoá pea ʻikai ʻilo ha niʻihi, naʻa nau tui kia Sīsū Kalaisi, ako mo moʻui ʻaki ʻEne ngaahi akonakí, mo fakamoʻoniʻi ʻEne ngāué, ngaahi maná, mo Hono ngeiá. Naʻe hoko ʻa e kau fafiné ni ko ha kau ākonga faʻifaʻitakiʻanga mo ha kau fakamoʻoni mahuʻinga ʻi he ngāue ʻo e fakamoʻuí.
Hangē ko ʻení, naʻe fakamoʻoni mālohi ʻa Maʻata ki he fakalangi ʻo e Fakamoʻuí ʻi he taimi naʻá ne lea ai kiate Ia, “ʻOku ou tui ko e Kalaisí ʻa koe, ko e ʻAlo ʻo e ʻOtuá, ʻa ia naʻe totonu ke haʻu ki māmaní” (Sione 11:27).
Ko ha niʻihi ʻo e kau fuofua fakamoʻoni ki he fakalangi ʻo e Fakamoʻuí ko ʻEne faʻē ko Melé, mo e fefine naʻá ne tokoua ʻaki ko ʻElisapetí. Hili pē ʻaʻahi ʻa e ʻāngelo ko Kepalelí kia Melé, naʻá ne ʻalu leva ʻo ʻaʻahi kia ʻElisapeti. Pea ʻi he taimi pē naʻe fanongo ai ʻa ʻElisapeti ki he fetapa ʻa Melé, “naʻe fakafonu [ia] ʻi he Laumālie Māʻoniʻoní” (Luke 1:41) mo ne fakamoʻoni ʻe hoko ʻa Mele ko e faʻē ʻa e ʻAlo ʻo e ʻOtuá.