ʻOku Ou ʻIlo ʻe Toe Hāʻele Mai ʻa Sīsū Kalaisi

Te ke lava ʻo fakaʻaongaʻi e lēsoni mo e ʻekitivitī ko ʻení ke lahi ange ai hoʻo ʻilo ki he kaveinga ʻa e Palaimelí he māhina ní.

Te ke lava ʻo fakakaukauloto atu ki hano fua koe ʻe Sīsū mo foaki atu kiate koe ha tāpuaki? Ko e meʻa ia naʻá Ne fakahoko ki he fānau Nīfai ʻi he Tohi ʻa Molomoná hili ʻEne toetuʻú.

“Pea naʻe hoko ʻo pehē naʻá ne fekau ke ʻomi ʻenau fānau īkí.

“Ko ia naʻa nau ʻomi ʻenau fānau īkí ʻo tuku ʻa kinautolu ʻi he funga kelekelé ʻo takatakai ʻiate ia, pea naʻe tuʻu ʻa Sīsū ʻi honau lotolotongá. …

“… Pea naʻá ne fua hake ʻa ʻenau fānau īkí, takitaha, ʻo ne tāpuakiʻi ʻa kinautolu mo hūfakiʻi ʻa kinautolu ki he Tamaí” (3 Nīfai 17:11–12, 21).

ʻOku tau ʻilo ʻe toe hāʻele mai ʻa Sīsū ʻo nofo ʻi māmani mo kitautolu. Te Ne hoko ko hotau Tuʻi mo hotau Pule. ʻE hoko ia ko ha taimi ʻo e melino mo e fiefia kiate kinautolu ʻoku mateuteu ke feʻiloaki mo Iá.

ʻOku ʻofa ʻa Sīsū ʻiate kimoutolu ʻo hangē pē ko ʻEne ʻofa ʻi he fānau Nīfaí. Te mou lava ʻo teuteu ke mamata kiate Ia ʻi Heʻene toe hāʻele maí ʻaki haʻamou angaʻofa ki he niʻihi kehé, ʻaki haʻamou talangofua, ʻaki hono fai hoʻomou ngaahi lotú, pea mo hono fili ʻa e totonú. Te mou toki mateuteu ai ki he taimi te Ne toe hāʻele mai aí!