ʻOku ou manako ke lau e ngaahi peesi ʻa e fānaú fekauʻaki mo e moʻui ʻa e kau palōfitá mo Sīsū Kalaisí. ʻOku fakamālohia ʻeku fakamoʻoní ʻi heʻeku lau e fakamoʻoni ʻa e niʻihi kehé. ʻOku tokoni e Liahoná ke u fili ʻa e totonú mo tauhi e ngaahi tuʻunga ʻo e Siasí. ʻOku toe tokoni foki ke u ongoʻi ofi ange ki he Tamai Hēvaní.
Kamila K., taʻu 11, Malēsia Hihifo
ʻAilini C., taʻu 8, Kuatemala
Naʻe ʻaʻahi ʻemau Palaimelí ʻi ha ʻaho ʻe taha ki he Temipale Sao Paulo Palāsilá. Naʻe fakaʻofoʻofa ange ʻa e ngoué ʻi ha toe ngoue kuo faifaiangé peá u mamata ai. Ne mau ako ʻoku makatuʻunga ʻi he ngaahi fuakava ʻoku tau fai ʻi he temipalé, ʻa ʻetau lava ke moʻui mo hotau fāmilí ʻi he kotoa ʻo ʻitānití. Naʻe lea e palesiteni ʻo e temipalé kiate kimautolu ʻi he loki talitalí, ʻa ia naʻa mau mamata ai ʻi ha ngaahi tā-valivali fakaʻofoʻofa. Naʻá ku maʻu ha ongo mātuʻaki māfana mo fiefia, pea naʻe talamai ʻe heʻeku faʻeé ko e Laumālie Māʻoniʻoní ia heʻene fakamoʻoniʻi mai kiate au ko e meʻa naʻá ku akó ʻoku moʻoni. Naʻá ku maʻu ha fakamoʻoni ko e temipalé ko e fale ia ʻo e ʻEikí.
Lenato B., taʻu 8, Palāsila
Ko Lenato mo hono fāmilí ʻi hono papitaisó
Naʻe fakaʻamu ʻa Maulisiō H., taʻu 7, mei Mekisikoú, ke papitaiso pea mo talangofua koeʻuhí ke lava ʻi ha ʻaho ʻo hū ki he temipalé. Naʻá ne feinga ke hoko ko ha faʻifaʻitakiʻanga lelei ki hono tehina ko Tanielá.
Ko Tanielá, taʻu 3, mei Hongokongo, ko e siʻi taha ia ʻi hono fāmilí. Naʻá ne angaʻofa mo fofonga malimali, pea ʻoku manako ke tokoni ki he niʻihi kehé. ʻOku pole maʻu pē ke lotu ʻi he lotú pea ʻi ʻapi foki, pea ʻoku saiʻia ke tuʻu mo ʻene tamaí ʻo fakafeʻiloaki ki he kāingalotu ʻo e uōtí ki muʻa ʻi he houalotu sākalamēnití. ʻOku toe saiʻia foki ke ne tānaki ʻa e ngaahi tohi himí mo fakamaau ʻa e falelotú ʻi he hili ʻa e lotú. Naʻá ne tā ha sīpinga ʻi ha ʻaho ʻe taha ki heʻene faʻeé ʻi ha taimi naʻá ne fakaafeʻi ai ha kiʻi tamasiʻi naʻe fetaulaki mo ia heʻene ʻalu ki he lotú ke na ō ki he lotú.
ʻOku saiʻia e fānau ʻo e Kolo Saiení, ʻi Kaiana Falanisē, ʻi hono fakahoko ʻenau polokalama Palaimeli ʻi he houalotu sākalamēnití. ʻOku nau fiefia ke lau ʻenau ngaahi kongá mo hiva lelei ʻaupito. ʻOku nau saiʻia ʻi he Palaimelí. Ko e taha e hiva ʻoku nau manako taha aí ko e “Fānau Au ʻa e ʻOtuá” (Ngaahi Himi, fika 193).