Toʻu Tupú
Te u Lava Nai ʻo Foaki ha Tohi ʻa Molomona?
ʻOku nofo e tokotaha ʻoku ʻaʻana e talanoá ʻi Uāsingatoni, USA.
Naʻe fakaafeʻi ʻeku kalasí heʻeku faiako seminelí ʻi he lolotonga hoku ʻuluaki taʻu ʻi he akoʻanga māʻolungá ke mau foaki ha Tohi ʻa Molomona ki homau kaungāmeʻa teʻeki Siasí. Neongo naʻá ku mātuʻaki mā ʻaupito, ka naʻá ku tali ʻa e fakaafé.
Ne u feinga ʻi ha ngaahi ʻaho siʻi ke u lotolahí, ka naʻe faifai pē peá u foaki ange ki hoku kaungāmeʻa ko Pilitenī ʻa e tohí he lolotonga ʻo e maʻumeʻatokoni hoʻataá mo fai haʻaku kiʻi fakamoʻoni nounou. Naʻe fakamālō mai ʻa Pilitenī koeʻuhí ko e tohí.
Naʻe hiki ʻa Pilitenī ʻi he ʻosi ʻo e taʻu fakaako ko iá, ka naʻá ma kei fetuʻutaki pē. Naʻá ne fakamatala mai hono ʻapiako foʻoú pea ʻoku meimei ko hono kaungāmeʻá kotoa ko e kau mēmipa ʻo e Siasí, ka naʻe ʻikai ke ne teitei talanoa mai kiate au ha meʻa fakalaumālie.
Naʻe liliu ia kimuʻa peá u ʻalu ʻo ngāue fakafaifekaú. Naʻá ku maʻu ha pōpoaki meia Pilitenī ʻo talamai ʻoku ʻi ai haʻane ongoongo lelei kiate au: ʻe papitaiso ia, peá ne naʻe fie fakamālō mai kiate au ʻi heʻeku hoko ko hono kaungāmeʻá mo tā-sīpinga leleí.
Naʻe ʻave ʻe he ʻOtuá ha kiʻi tamasiʻi taʻu 15 naʻe mā naʻe ʻikai haʻane taukei he ngāue fakafaifekaú ʻo fakahinohinoʻi ia ke ne vahevahe ʻa e ongoongoleleí mo ha taha naʻá ne ʻafioʻi te ne tali. ʻI heʻetau fakafanongo ki he Laumālié, ʻoku ou ʻiloʻi te tau lava kotoa ʻo maʻu ha kakai ʻoku tau feohi ʻoku nau tatali ke ako ki he ongoongolelei kuo toe fakafoki maí. ʻOku ou ʻiloʻi kapau te tau tokoni ke ʻomi ha foʻi toko taha pē ki he ʻEikí, “hono ʻikai ke lahi pehē fau ʻa [ʻetau] fiefiá fakataha mo ia ʻi he puleʻanga ʻo [ʻetau] Tamaí!” (T&F 18:15)