Mei he Musungú ki he Kaungāmeʻá
Naʻe fakahoko ʻe ha kiʻi ngāue maʻamaʻa ʻa ha faifekau matuʻotuʻa ha manatu tuʻuloa.
Ko ha musungu ʻi ha fuʻu ʻakau? Ko e hā naʻe fai ʻe he musungú he fuʻu ʻakaú? Pea ko e hā ʻene meʻangāue naʻá ne fakaʻaongaʻi ke tuʻusi vave ʻaki e ngaahi vaʻá?
ʻE lava ke fai e faʻahinga fehuʻi peheé ʻi he ʻatamai ʻo e kakai ʻIukanitaá ʻi heʻenau mamata ki ha (musungu) muli ʻokú ne fakaʻaongaʻi ha kili fakamaka ke ʻauhani e ngaahi vaʻa mōmoá mei ha fuʻu ʻakau fakamalumalu. Ko ha meʻa fakaofo ʻa e meʻangāué ʻiate ia pē ki he kakai ʻo e feituʻú. Kuo teʻeki ai sio hanau tokolahi ʻi ha meʻa pehē kimuʻa.
Ka naʻe toe fakaofo ange kiate kinautolu ʻa e musungú. Naʻe ʻauhani ʻe ʻEletā Lōlani Hālisi, ko ha faifekau matuʻotuʻa mei ʻIutā, USA, ʻa e vaʻa ki he vaʻa, ʻo tuʻusi e ngaahi konga mōmoá mei he ngaahi vaʻa opeopé. Naʻe fakatumutumu ʻa e kakai ʻi laló ʻi he fai ʻe ha muli ha faʻahinga meʻa pehē maʻa hanau taha.
Ko hono fakaikú, ne hoko e kihiʻi ngāue tokoni ʻa ʻEletā Hālisí ko ha fakaʻilonga e kamata ʻo ha anga fakakaumeʻa mo ha taha naʻe ʻikai ke fie kau ki ha meʻa ʻi he Siasí pe ha taha mei ai.
Ko e Maheni mo Kotifilií
Naʻe fakahoko ʻe ʻEletā Lōlani Hālisi mo Sisitā Sēneti Hālisi ha ngāue fakafaifekau māhina ʻe 23 ʻi he Misiona ʻIukanitā Kemipalá. Ko Sisitā Hālisí, ko ha neesi kuo lesisita, pea naʻe ui ia ko ha faleʻi fakafaitoʻo ki he kau faifekaú. Ko ʻEletā Hālisí, ko ha taha maʻu vāhenga mālōlo ʻi he puleʻi e langá, te ne lava ʻo ngaahi ha meimei faʻahinga meʻa pē ʻi he ʻunivēsi, tokangaʻi e ngaahi fale ʻo e Siasí mo e ngaahi meʻalele ʻa e misioná.
Taimi nounou pē mei heʻena tūʻuta atu ki ʻIukanitaá, naʻe totongi ʻe ʻEletā mo Sisitā Hālisi ha mēmipa ʻo e Siasí he feituʻú, ko Mele, ke tokoni ʻi hono fakamaʻa hona ʻapí.
Ne papi ʻa Mele ʻi he taʻu ʻe tolu kimuʻá. ʻOku pehē ʻe Sisitā Hālisi, “Naʻe fakaʻau pē ke ma ʻofa ai. Naʻá ne tokoni ʻo akoʻi kimaua ʻi he ngaahi founga ʻa ʻIukanitaá.”
Ko e lahi ange ʻena maheni mo Melé, ko e lahi ange ia e māfana honau kaungāmeʻá. Naʻá na ʻilo vave ki hono husepāniti ko Kotifilí—ko ha tangata lelei ka naʻá ne fakamamaʻo pē mei he kāingalotu ʻo e Siasí, tautautefito ki he ongo faifekaú. ʻOku fakamatalaʻi ʻe Sisitā Hālisi ʻo pehē, “Naʻe ʻikai ke ne teitei fakangofua e ongo faifekaú ki hono ʻapí.” Neongo ia, naʻe kei fie maʻu pē ʻe Mele ʻa Kotifilī ke feʻiloaki mo kinaua.
Naʻá ne fakaafeʻi ʻa e ongo Hālisí ke na ʻaʻahi nounou ange. ʻOku pehē ʻe Sisitā Hālisi, “Naʻe ʻikai ha meʻa te ma ʻamanaki ki ai. Naʻá ma talaange pē kia Kotifilī ʻoku hoko ʻa Mele ko homa kaungāmeʻa mamae he taimí ni, pea ʻokú ma fie maheni mo hono fāmilí.” Naʻe talanoa ʻa Kotifilī mo kinaua ka naʻe ʻikai māfana ki he fakakaukau ke maheni lahi ange mo kinaua ʻo mavahe mei ha maheni pē.
Naʻe liliu kotoa ia ʻi he ʻaho naʻe aʻu atu ai ʻa ʻEletā Hālisi mo ha ngaahi mīsini meʻangāue, mo ha tuʻunga, ʻo kole ke tokoni angé.
Ko e Liliuʻangá
Naʻe ʻātakaiʻi e ʻapi ʻo Kotifilī mo Melé ʻe ha ʻuluʻakau lalahi mo ngapulopulou naʻe lahi ai ha ngaahi vaʻa ne mōmoa pea mo ha ngaahi vaʻa lalahi naʻe ope mai ki honau funga falé.
Naʻe kamata ngāue leva ʻa ʻEletā Hālisi. Naʻe ngāue he funga ʻakaú ʻi ha houa ʻe fā ʻo tuʻutuʻu ha ngaahi vaʻa naʻe aʻu ʻo inisi ʻe 10 (senitimita ʻe 25) honau matolú. Naʻe fuoloa moʻoni ʻa e ngāué. ʻOku pehē ʻe ʻEletā Hālisi, “Naʻá ku meimei fute ʻe 20 (mita ʻe 6) nai mei he kelekelé.” ʻI he lue hake ʻa e kakaí, naʻe ʻikai ke nau faʻafaʻa tui ki he meʻa ne nau mamata ki aí.
Naʻe ʻohovale foki mo Kitifilī. ʻOku pehē ʻe Sisitā Hālisi, “Naʻá ne fakamālō lahi ʻaupito kiate kimaua.” Naʻa mo ha fanga kiʻi ngāue iiki hangē ko e ʻauhani ʻo ha fuʻu ʻakau ʻe lava pē ke fakatuʻutāmaki ʻaupito. ʻOku fakamatalaʻi ʻe Sisitā Hālisi ʻo pehē, “Naʻe ʻikai haʻana paʻanga ki ha meʻa fakafaitoʻo.” Hangē ko ʻení, kapau ʻe tō ha taha mei ha fuʻu ʻakau pea fasi hono nimá pe vaʻé, mahalo te nau tuku ke moʻui pē ʻiate kinautolu.
Naʻe fakatoka ʻe he fuʻu fokotuʻunga ʻakau he kelekelé ha fakavaʻe ʻo ha feohi fakakaumeʻa mahuʻinga. ʻOku pehē ʻe Sisitā Hāisi, “Naʻe kamata mei ai e faʻa hū mai ʻa Kotifilī ʻo fakafeʻiloaki mai kiate kimaua.” Naʻe kamata foki ke talitali lelei ʻe Kotifilī mo Mele ha kau mēmipa kehe ʻo e Siasí ki hona ʻapí.
Ko e Kolosi Atu he Vaitafe Nailá
Naʻe fakaʻau ke toe vāofi ange ʻa ʻEletā mo Sisitā Hālisi pea mo Kotifilī mo Mele ʻi he fakalau atu ʻa e ngaahi māhiná. Ne iku ʻo hoko ʻa e kaungāmeʻa ko ʻení ko ha mālohi mo ha tokoni ki he fāmili Hālisí ʻi he taimi ne hoko ai ha meʻa fakamamahi taʻeʻamanekina he vaeuaʻangamālie ʻo ʻena ngāue fakafaifekaú. Ne na maʻu ha tala kuo mālōlō siʻena tamasiʻi ko Palatí ʻi ha fakatuʻutāmaki he hala lahí.
Ko e taimi pē ne ʻilo ai ʻe Mele mo Kotifilī e meʻa ko ʻení, naʻá na tui leva hona vala lelei tahá pea hangatonu mai ʻi ha fononga faingataʻa ke ʻi he tafaʻaki hona ongo kaungāmeʻa ʻofeiná.
ʻOku tokosiʻi pē ha kakai ʻi ʻIukanitā ʻoku ʻi ai haʻanau meʻalele. ʻOku nau lue lalo pē pe totongi ha tekisī. Ko e tekisī angamahení ko ha boda boda, ko ha paiki ʻoku faʻa fakatokangaʻi ʻoku heka ai ha kakai ʻe toko ono nai ʻi he taimi pē taha.
ʻOku fakamatalaʻi ʻe Sisitā Hālisi ʻo pehē, “ʻOku fakatuʻutāmaki e heka ʻi ha boda boda he fakapoʻulí. Naʻá na kolosi ʻi he Vaitafe Nailá ʻi ha boda boda ʻi he fakapoʻulí.”
Hili ʻena fononga ʻi ha ngaahi hala fakatuʻutāmaki he valenga poó ʻi ha fakamole lahi ʻa naua peé, ne fotu atu ʻa Kotifilī mo Mele ke “tangi fakataha mo kinautolu ʻoku tangí” pea mo “fakafiemālie ʻa kinautolu ʻoku ʻaonga ki ai ʻa e fakafiemālié” (Mōsaia 18:9). ʻI he efiafi ko iá, ne kanokato ai ʻa e ongoʻi ʻofá pea mo e ʻofá. Ko Mele mo Kotifilī ia naʻá na fai ʻa e tokoní. ʻOku pehē ʻe Sisitā Hālisi, “Naʻe mātuʻaki fakaʻofoʻofa.” Naʻe fokotuʻu ange ʻe Mele ke nau tūʻulutui kotoa ʻo lotu. Naʻe kau atu ʻa Kotifilī ʻo ʻikai toe momou.
Naʻe folau ʻa ʻEletā mo Sisitā Hālisi ki Kalefōnia ʻi he USA, ki he meʻafakaʻeiki ʻo Palatí. Hili ia peá na foki ki ʻIukanitā ke fakaʻosi ʻena ngāue fakafaifekaú. Kuo ʻi ʻIutā ʻeni ʻa Lōlani mo Sēneti Hālisi ka ʻoku nau kei vāofi pē mo Mele mo Kotifilī.
Ko e tokoní ko ha kī ia te ne lava ʻo fakaava ʻa e ngaahi matapā naʻe mei tāpuniʻi kiate kitautolu. Hangē ko hono akoʻi ʻe Palesiteni Tōmasi S. Monisoní, “[Ko e taimi] ʻoku fakaʻauha ai ʻe he tokoni taʻe-siokitá ʻa e loto siokitá, ʻe fakahoko leva ʻe he mālohi ʻo e ʻOtuá ʻEne ngaahi taumuʻá” (“Loto Vēkeveke pea Taau ke Ngāue,” Liahona, Mē 2012, 68).