Ne Ma Ō Mai ke Maʻu ʻEma Meʻaʻofá

Uolotā ʻEmiliō Posata Lotuliko, Kolomupia

Ko e taimi naʻá ku hoko ai ko e mēmipa ʻo e kau palesitenisī fakavahefonuá, naʻá ku tokoni ki hono fakafekauʻaki ha ʻekitivitī ʻa ia naʻe foaki ai ʻe he kāingalotu homau vahefonuá ha ngaahi meʻavaʻinga ki he fānau masivesiva naʻe nofo ʻi he kolo ko Soaká ʻi Kolomupia. Ne mau maʻu ha tokoni fakaofo mei he kāingalotú kotoa. Naʻe ʻikai ke kei foʻou ʻa e ngaahi meʻaʻofá kotoa, ka ko e lahi tahá naʻe kei ʻi he tuʻunga fakaʻofoʻofa.

Ko e taimi naʻe ʻosi ai ʻemau fakaheka e ngaahi meʻaʻofá ki he ʻū pasi te nau ʻave kimautolu ki he kolo lahí, naʻe haʻu ha kiʻi taʻahine kei siʻi kiate au mo ha foʻi pulu pelesitiki naʻe ʻosi lahi hono fakaʻaongaʻí mo mavauvau. Naʻá ku pukepuke ʻa e foʻi pulú mo fakakaukau pe ko hai naʻá ne foaki ha foʻi pulu motuʻa pehē. Naʻá ku lī ʻa e foʻi pulú ʻi heʻeku taʻefiemālié ki he lalo seá.

Naʻe kamata hivaʻi heʻemau toʻu tupú ha ngaahi himi Kilisimasi ʻi he taimi naʻa mau aʻu atu aí. Naʻe tohoakiʻi mai heʻenau hivá, fakataha mo honau tatā Kilisimasí ha fānau tokolahi. Ko e taimi naʻa mau kamata tufa ai ʻa e ngaahi meʻaʻofá, naʻe toe ui ʻe he fānau ko iá ha fānau kehe. Naʻe ʻikai hano taimi kuo ʻosi kotoa ʻemau ngaahi meʻaʻofá hono tufa.

ʻI he ʻamanaki ke mau mavahé, naʻá ku fakatokangaʻi atu ha kiʻi tamasiʻi taʻu valu nai ʻoku lele hangatonu mai kiate kimautolu, mo taki pē hono kiʻi tokoua siʻisiʻí. ʻI heʻena aʻu maí, naʻe pehē mai leva ʻa e kiʻi tamasiʻi lahí, “Ne ma ō ke maʻu ʻema meʻaʻofá. Naʻe ʻikai haʻaku toe lea he naʻe ongo moʻoni ki hoku lotó ʻa ʻene loto-maʻá.

Naʻá ku fakamatala ange ki ai kuo ʻosi ʻa e ngaahi meʻaʻofá. Naʻá ne tali mai, “ʻOku ʻikai mahuʻinga ia kapau ʻoku ʻikai haʻaku meʻaʻofa, ka kuo pau ke ʻi heni e meʻaʻofa hoku kiʻi tehiná.”

Ne u fakakaukau leva ki he foʻi pulu naʻá ku lī ki he lalo seá. Naʻá ku talaange leva ki he ongo tamaikí ʻoku ʻi ai haʻaku meʻaʻofa ʻe taha ka ʻoku ʻikai matamatalelei.

Naʻá ne pehē mai, “ʻE tatau ai pē pe ko e hā. Ko e meʻaʻofá ia.”

Naʻá ku kaka leva ki he loto pasí ʻo ʻomi ʻa e foʻi pulú. ʻI he taimi naʻá ku ʻoange ai ki he kiʻi tamasiʻí, naʻe tōtuʻa ʻene fiefiá. Naʻe punopuna ʻi he loto houngaʻia, ʻo ne pehē, “Ko ha foʻi pulu! Ko e meʻaʻofa ia naʻá ku kole ki he tamasiʻi ko Kalaisí ke ne ʻomi maʻakú.” Naʻe hoko atu ʻene punopuna fiefia takaí ʻi heʻena foki atu mo hono tokoua lahí mo ʻena meʻaʻofa fakakoloá ni.

Naʻá ku tuʻu fakalongolongo pē ai ʻo tangi ʻi hono ʻōʻōfaki au ʻe ha ongoʻi nonga mo e loto fakafetaʻí. Naʻe ongo kiate au e tokanga mo e taʻe-siokita ʻa e tokoua lahí ki hono kiʻi tehiná, pea naʻá ku fakaʻamu loto pē te u vēkeveke pehē ke tāpuekina ʻa e niʻihi kehé ʻo hangē ko e vēkeveke ʻa e kiʻi tamasiʻi lahí ke tāpuekina hono kiʻi tehiná.

ʻI he lue fiefia atu ʻa e ongo kiʻi tamaikí, naʻá ku manatu ki he ʻofa ʻa e Fakamoʻuí kiate kitautolú. Naʻe ʻikai teitei ngalo ʻiate Ia ʻa e kiʻi tamasiʻi ʻi he tafaʻaki moʻungá ʻa ia naʻá ne kole ha kiʻi foʻi pulu ki he Kilisimasí.